YuRTIMIZDA XOTIN-QIZLARNING JAMIYaTDAGI OʻRNI TOBORA MUSTAHKAMLANMOQDA

Xotin-qizlarning jamiyatda va oilada tutgan oʻrnini mustahkamlash, ijtimoiy faolligini oshirish, mahalla va oilani qoʻllab-quvvatlash maqsadida keng qamrovli ishlar amalga oshirilmoqda. Oʻzbekiston Respublikasi Prezidentining joriy yilning 18-fevral sanasida imzolagan “Jamiyatda ijtimoiy-maʼnaviy muhitni sogʻlomlashtirish, mahalla institutini yanada qoʻllab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari toʻgʻrisida”gi Farmoni bu boradagi ishlarni olib borishda muhim dasturulamal boʻlib xizmat qilmoqda.
Joriy yilning 30-sentyabr kuni tuman Mahalla va oilani qoʻllab-quvvatlash boʻlimida ushbu farmonda belgilangan vazifalar ijrosini taʼminlash, oila va xotin-qizlar bilan ishlash ish hujjatlarining, jumladan, “Ayollar daftari”ning yuritilishiga bagʻishlangan seminar boʻlib oʻtdi. Seminarni tuman Mahalla va oilani qoʻllab-quvvatlash boʻlimi boshligʻining birinchi oʻrinbosari Muqaddas Beknazarova olib bordi. Unda tumandagi fuqarolar yigʻinlari raislarining oila, xotin-qizlar va ijtimoiy-maʼnaviy masalalar boʻyicha oʻrinbosarlari ishtirok etdilar. Ishtirokchilarga ish hujjatlarining yuritilishi hamda tumanda “Ayollar daftari”ga kiritilgan xotin-qizlarni qoʻllab-quvvatlash, ularga har tomonlama koʻmak berish borasida tavsiyalar berildi.

Shuningdek, seminar davomida tumanimizdagi 663 nafar ijtimoiy koʻmakka muhtoj xotin-qizlar “Ayollar roʻyxati”ga kiritilganligi, shundan 163 nafari 1-sektor hududiga, 238 nafari 2-sektor, 165 nafari 3-sektor, 97 nafari esa 4-sektor hududiga toʻgʻri kelishi haqida maʼlumot berildi. Roʻyxatga kiritilgan ayollarning 88 nafari kam taʼminlanganligi, 336 nafari ijtimoiy himoyaga muhtoj boʻlganligi, 111 nafari boquvchisi boʻlmaganligi, 78 nafari ajrashgan ayollar, 26 nafari yolgʻiz onalar, 4 nafari nogironligi boʻlgan, 16 nafari nogiron farzandini tarbiyalayotgan, 4 nafarini notinch oilalardagi ayollar tashkil qilishi haqida aytib oʻtildi. Joriy yilning shu davrigacha “Ayollar daftari”ga kiritilgan xotin-qizlardan 331 nafarining bandligi taʼminlanganligi maʼlum qilindi.
Seminarda taʼkidlanganidek, yurtimizda xotin-qizlarni, ayniqsa, ijtimoiy himoyaga muhtoj ayollarni qoʻllab-quvvatlashga alohida eʼtibor qaratilmoqda. Oʻzbekiston Respublikasi Mahalla va oilani qoʻllab-quvvatlash vazirligining joylardagi boʻlinmalarida ishsiz, kam taʼminlangan va boquvchisini yoʻqotgan xotin-qizlarning alohida “Ayollar roʻyxat”lari shakllantirilib, roʻyxatga kiritilgan ayollarning bandligini taʼminlash borasida salmoqli ishlar olib borilmoqda.
Jumladan, bugungi kunda mamlakatimizda xotin-qizlarni qoʻllab-quvvatlash va ularning jamiyatdagi oʻrnini mustahkamlash borasida amalga oshirilayotgan islohotlardan biri sifatida Oliy taʼlim muassasalariga kirishda qizlar uchun ajratilayotgan oʻrinlarning koʻpaytirilganligi, qolaversa, tavsiyanoma asosida imtiyozli ravishda OTMlarga qabul qilinayotganligi ham yaqqol misol boʻla oladi.

Xususan, tumanimizdagi Oʻrta qalʼa ovulida yashovchi Diyora Toʻrabayeva tavsiyanoma asosida berilgan imtiyoz boʻyicha 170,1 ball bilan Nukus Davlat Pedagogika instituti Xorijiy til va adabiyoti, ingliz tili yoʻnalishiga qabul qilindi. Shuningdek, Durunki mahallasida yashovchi Barno Qadamboyeva ham tavsiyanoma asosida berilgan imtiyoz boʻyicha 173,4 ball toʻplab, Qoraqalpoq Davlat Universitetining matematika yoʻnalishida  oʻqish baxtiga muyassar boʻldi. Endilikda Diyora va Barno oʻzlari tanlagan ushbu oliy taʼlim muassasalarida davlat granti asosida oʻqishadi.

Tumanda joriy yilda oliy taʼlim muassasalariga oʻqishga kirish uchun tavsiyanoma olish maqsadida 184 nafar xotin-qiz tomonidan murojaatlar qabul qilinib, tegishli hujjatlar topshirildi. Bu boʻyicha tashkil qilingan ishchi guruh tomonidan mazkur hujjatlar batafsil oʻrganib chiqildi. Oʻrganish natijasida 90 nafar xotin-qizlarning belgilangan mezonlarga toʻla mos kelishi aniqlandi va bu boʻyicha xulosalar tayyorlandi. Shundan soʻng, ushbu xulosalarga koʻra tayyorlangan roʻyxat Qoraqalpogʻiston Respublikasi Mahalla va oilani qoʻllab-quvvatlash vazirligiga taqdim qilindi hamda tumanimizdagi 90 nafar xotin-qizlarga oshkoralik, adolatlilik, shaffoflik tamoyillariga asoslangan holda tavsiyanomalar berildi.

Charos ARSLONOVA, tuman hokimligining Axborot xizmati rahbari.