Boks boʻyicha xotira turniri oʻtkazildi

Har yili 9-may kuni yurtimizda umumxalq bayrami — Xotira va qadrlash kuni keng nishonlanadi. Bu sana — yurtdoshlarimizning Vatan ozodligi va tinchligi yoʻlida koʻrsatgan jasorati, fidoyiligi va mardligini eʼzozlash, ularning xotirasini yod etish, oramizdagi faxriylarni qadrlash kuni sifatida katta ahamiyat kasb etadi.

Ushbu muhim sana munosabati bilan mamlakatimizning turli hududlarida xotira tadbirlari bilan bir qatorda, yoshlar oʻrtasida sogʻlom turmush tarzini targʻib etuvchi sport musobaqalari ham tashkil etilmoqda. Shunday musobaqalardan biri Amudaryo tumanining Toʻlqin ovulida boʻlib oʻtdi.

7-8-may kunlari boks boʻyicha Qoraqalpogʻiston Respublikasi chempioni va xalqaro turnirlar gʻolibi Furqat Rajapov xotirasiga bagʻishlab sportning boks turi boʻyicha oʻtkazilgan xotira turniri musobaqalari murosasiz janglarga boy boʻldi.

2009-2010, 2011-2012-yillarda tugʻilgan oʻsmirlar oʻrtasida oʻtkazilgan musobaqaning birinchi kunida saralash bahslari, ikkinchi kunida final bahslari va tantanali taqdirlash marosimi oʻtkazildi. 8-may kuni oʻtkazilgan final bahslarida hamda taqdirlash marosimida tuman hokimi Sobir Xoʻjametov, respublika ishchi guruh vakili Ziyodulla Mahmudov, tuman hokimi oʻrinbosari Nodirbek Kamolov, idora va tashkilotlar rahbarlari ishtirok etdilar.

Musobaqalarda respublikamizning turli tumanlaridan oʻquvchi-yoshlar va sport maktablarining vakillari faol ishtirok etdilar. Tadbir avvalida Ikkinchi jahon urushi qatnashchilari va mehnat faxriylariga hurmat bajo keltirilib, ularning mardlik va jasoratlari yodga olindi.

Musobaqalar doʻstlik va hamjihatlik ruhida oʻtdi. Har bir bokschi gʻalaba uchun kurashdi, oʻzining jismoniy tayyorgarligi va sportga boʻlgan mehrini namoyon etdi. 10 ta vazn toifasida oʻtkazilgan musobaqalar yakuniy natijalariga koʻra eng kuchlilar gʻoliblikni qoʻlga kiritdi. Tuman hokimi Sobir Xoʻjametov boshchiligida rahbarlar xotira turniri gʻolib va sovrindorlariga tuman hokimligi tomonidan tayyorlangan diplom, medal va esdalik sovgʻalarini topshirdilar.

Qayd etish joizki, bugungi globallashuv davrida jismoniy tarbiya va sport har qachongidan ham muhim ahamiyat kasb etmoqda. Ayniqsa, yosh avlodni sogʻlom, irodali va maqsadga intiluvchan qilib tarbiyalashda sportning, jumladan, boksning roli beqiyosdir.

Boks — bu faqat jismoniy kuchni emas, balki aql-zakovat, sabr-toqat va ruhiy barqarorlikni talab qiladigan sport turi. U yoshlarning har tomonlama rivojlanishida, salomatligini mustahkamlashda va irodasini chiniqtirishda muhim vositadir.

Ulugʻ ayyomlar arafasida tashkil etilayotgan bu kabi sport tadbirlari yosh avlod qalbida tariximizni unutmaslik, ajdodlarimiz jasoratini yodga olish, Vatanga sadoqat, faxr va minnatdorlik tuygʻularini uygʻotish bilan birga, sogʻlom turmush tarzini ommalashtirishda muhim ahamiyat kasb etadi.

 Charos Arslonova, tuman hokimligining Axborot xizmati rahbari.