Бокс бўйича хотира турнири ўтказилди

Ҳар йили 9 май куни юртимизда умумхалқ байрами — Хотира ва қадрлаш куни кенг нишонланади. Бу сана — юртдошларимизнинг Ватан озодлиги ва тинчлиги йўлида кўрсатган жасорати, фидойилиги ва мардлигини эъзозлаш, уларнинг хотирасини ёд этиш, орамиздаги фахрийларни қадрлаш куни сифатида катта аҳамият касб этади.

Ушбу муҳим сана муносабати билан мамлакатимизнинг турли ҳудудларида хотира тадбирлари билан бир қаторда, ёшлар ўртасида соғлом турмуш тарзини тарғиб этувчи спорт мусобақалари ҳам ташкил этилмоқда. Шундай мусобақалардан бири Амударё туманининг Тўлқин овулида бўлиб ўтди.

7-8 май кунлари бокс бўйича Қорақалпоғистон Республикаси чемпиони ва халқаро турнирлар ғолиби Фурқат Ражапов хотирасига бағишлаб спортнинг бокс тури бўйича ўтказилган хотира турнири мусобақалари муросасиз жангларга бой бўлди.

2009-2010, 2011-2012 йилларда туғилган ўсмирлар ўртасида ўтказилган мусобақанинг биринчи кунида саралаш баҳслари, иккинчи кунида финал баҳслари ва тантанали тақдирлаш маросими ўтказилди. 8 май куни ўтказилган финал баҳсларида ҳамда тақдирлаш маросимида туман ҳокими Собир Хўжаметов, республика ишчи гуруҳ вакили Зиёдулла Маҳмудов, туман ҳокими ўринбосари Нодирбек Камолов, идора ва ташкилотлар раҳбарлари иштирок этдилар.

Мусобақаларда республикамизнинг турли туманларидан ўқувчи-ёшлар ва спорт мактабларининг вакиллари фаол иштирок этдилар. Тадбир аввалида Иккинчи жаҳон уруши қатнашчилари ва меҳнат фахрийларига ҳурмат бажо келтирилиб, уларнинг мардлик ва жасоратлари ёдга олинди.

Мусобақалар дўстлик ва ҳамжиҳатлик руҳида ўтди. Ҳар бир боксчи ғалаба учун курашди, ўзининг жисмоний тайёргарлиги ва спортга бўлган меҳрини намоён этди. 10 та вазн тоифасида ўтказилган мусобақалар якуний натижаларига кўра энг кучлилар ғолибликни қўлга киритди. Туман ҳокими Собир Хўжаметов бошчилигида раҳбарлар хотира турнири ғолиб ва совриндорларига туман ҳокимлиги томонидан тайёрланган диплом, медаль ва эсдалик совғаларини топширдилар.

Қайд этиш жоизки, бугунги глобаллашув даврида жисмоний тарбия ва спорт ҳар қачонгидан ҳам муҳим аҳамият касб этмоқда. Айниқса, ёш авлодни соғлом, иродали ва мақсадга интилувчан қилиб тарбиялашда спортнинг, жумладан, бокснинг роли беқиёсдир.

Бокс — бу фақат жисмоний кучни эмас, балки ақл-заковат, сабр-тоқат ва руҳий барқарорликни талаб қиладиган спорт тури. У ёшларнинг ҳар томонлама ривожланишида, саломатлигини мустаҳкамлашда ва иродасини чиниқтиришда муҳим воситадир.

Улуғ айёмлар арафасида ташкил этилаётган бу каби спорт тадбирлари ёш авлод қалбида тарихимизни унутмаслик, аждодларимиз жасоратини ёдга олиш, Ватанга садоқат, фахр ва миннатдорлик туйғуларини уйғотиш билан бирга, соғлом турмуш тарзини оммалаштиришда муҳим аҳамият касб этади.

 Чарос Арслонова, туман ҳокимлигининг Ахборот хизмати раҳбари.