Korruptsiyaga qarshi kurashda OAVning oʻrni ortib bormoqda

Korruptsiyaga qarshi kurashishda ommaviy axborot vositalarining oʻrni alohida. Ommaviy axborot vositalari jamiyatda korruptsiyaga nisbatan murosasiz muhitni shakllantirish, aholining huquqiy ongi va madaniyatini oshirish, korruptsion holatlarni fosh etish va bu borada jamoatchilik nazoratini kuchaytirishda muhim vosita hisoblanadi. Ular orqali aholi korruptsiyaning zararli oqibatlari haqida xabardor boʻladi, ushbu illatning oldini olish va unga qarshi kurashish yoʻllarini oʻrganadi. “Taraqqiyot koʻzgusi” gazetasi tahririyatining Oʻzbekiston Respublikasi Oliy Majlis huzuridagi Fuqarolik jamiyati institutlarini qoʻllab-quvvatlash jamoat fondi tomonidan moliyalashtirilgan “Biz korruptsiyaga qarshimiz!” nomli grant loyihasi ham ushbu maqsadlarga qaratilgani bilan ahamiyatlidir.

Loyiha doirasida gazetada aholini ushbu illatdan xabardor qilish maqsadida tahliliy maqolalar eʼlon qilish, jamoatchilik faollarining chiqishlarini tashkil qilish orqali targʻibot ishlarini olib borish, joylarda uchrashuvlar tashkil etish, ishtirokchilarga milliy qonunchilikdan koʻchirmalar va huquqiy maʼlumot tarqatish orqali aholining xabardorligini oshirish koʻzda tutilgan.

Bundan tashqari, loyiha doirasida davlat xizmatchilarining xabardorligini oshirishga hissa qoʻshish maqsadida ularga korruptsiyaga qarshi kurashish boʻyicha amaldagi qonunchilikdan koʻchirmalar tarqatish ham koʻzda tutilgan. Buning ahamiyati shundaki, davlat xizmatchilari korruptsiyaga qarshi kurashishda oldingi safda turadigan shaxslardir. Ularning korruptsiyaga oid qonunchilikni chuqur bilishi, oʻz vazifalarini bajarishda shaffoflik va halollik tamoyillariga amal qilishi ushbu illatga barham berishda hal qiluvchi ahamiyatga ega. Agar davlat xizmatchilari oʻz huquq va majburiyatlarini, shuningdek, korruptsion harakatlar uchun belgilangan jazolarni aniq bilsalar, bu ularni korruptsiyaga aralashishdan saqlaydi va jamiyatda adolatli boshqaruv tizimini shakllantirishga yordam beradi.

Loyiha koordinatorlari Amudaryo tumani Sanitariya-epidemiologik osoyishtalik va jamoat salomatligi boʻlimi hamda tuman Madaniyat boʻlimida boʻlib, davlat xizmatchilari bilan uchrashuv oʻtkazdi va ularga korruptsiyaning ijtimoiy oqibatlari, jamiyat va davlat rivojiga salbiy taʼsiri haqida batafsil maʼlumotlar berib, tarqatma materiallar tarqatdilar.

Davlat xizmatchilarining korruptsiyaga aralashishi davlatning iqtisodiy salohiyatiga jiddiy putur yetkazadi. Byudjet mablagʻlarining talon-toroj qilinishi, investitsiya muhitining yomonlashishi, iqtisodiy oʻsishning sekinlashishi kabi oqibatlar yuzaga keladi. Ijtimoiy jihatdan esa aholining davlatga boʻlgan ishonchi yoʻqoladi, ijtimoiy tengsizlik kuchayadi, adolatsizlik kayfiyati avj oladi. Siyosiy oqibatlar esa davlat boshqaruvining samaradorligini pasaytiradi, xalqaro maydonda mamlakat obroʻsiga salbiy taʼsir koʻrsatadi va demokratik qadriyatlarga putur yetkazadi.

Shu sababli loyiha doirasida jamiyatda korruptsiyaga nisbatan murosasiz muhitni shakllantirish, aholining, davlat xizmatchilarining huquqiy ongi va madaniyatini oshirish, korruptsion xavf-xatarlarni kamaytirish va davlat boshqaruvida shaffoflikni taʼminlashga hissa qoʻshish koʻzda tutilgan.

“Taraqqiyot koʻzgusi” gazetasi tahririyatining bu kabi tashabbuslari korruptsiyaga qarshi kurashda jamoatchilikning faol ishtirokini taʼminlashda muhim ahamiyat kasb etadi. Ommaviy axborot vositalari, davlat organlari va fuqarolik jamiyati institutlarining hamkorligi esa korruptsiyasiz jamiyat qurish yoʻlidagi eng samarali yoʻldir. Bunday loyihalar aholining huquqiy savodxonligini oshirib, korruptsiyaga qarshi kurashda har bir fuqaroning masʼuliyatini kuchaytiradi va Oʻzbekistonda adolatli va shaffof jamiyat qurishga xizmat qiladi.