ILGʻOR TERIMChILAR RAGʻBATLANTIRILMOQDA

Yurtimizda joriy yilgi paxta yigʻim-terimi mavsumi ham qizgʻin tarzda davom etmoqda. Paxta yigʻim-terimida fermerlarga yaqindan koʻmaklashayotgan terimchilar uchun zarur shart-sharoitlar yaratilgan boʻlib, ularni ragʻbatlantirib borishga alohida eʼtibor qaratilmoqda. Paxta dalalarida “oq oltin”ni terishda eng yuqori koʻrsatkichga erishgan ilgʻor terimchilar aniqlanib, tegishli mutasaddilar, fermer xoʻjaliklari tomonidan munosib ragʻbatlantirilib, qimmatbaho sovgʻalar topshirilmoqda.

Tumanimizda ham paxta yigʻim-terimida faol ishtirok etayotgan terimchilarni ragʻbatlantirish borasida qator ishlar amalga oshirilmoqda. Shu bilan birga masʼullar tomonidan terimchilar uchun yaratilgan shart-sharoitlar, terim haqlarining toʻlanishi, majburiy mehnatga jalb etmaslik kabilar holati oʻrganilib, tegishli choralar koʻrilmoqda.

Har yili paxta-terim mavsumida boʻlgani kabi bu yil ham tuman Mudofaa ishlari boʻlimi boshligʻi boshchiligidagi boʻlim shaxsiy tarkibi hamda joriy yilgi safarbarlik rezervi xizmatiga olingan fuqarolar tumandagi fermer xoʻjaliklarida paxta yigʻim-terimiga koʻmak berishmoqda. Dalalarda terimchilar bilan birgalikda terim surʼatini oshirib, “oq oltin” xirmonining yuksalishiga oʻz hissalarini qoʻshishmoqda.

Tuman Mudofaa ishlari boʻlimi boshligʻi Azizbek Januzakov ham Begzod Kamolov rahbarligidagi “Jayhun-Choykoʻl” fermer xoʻjaligi paxta dalalarida mehnat qilayotgan terimchilar bilan uchrashib, dildan suhbatlashdi. Boʻlim boshligʻi terimchilar bilan yurtimizdagi paxta yigʻim-terimi jarayoni, terimchilarga paxta dalasida yaratilgan shart-sharoitlar, ularga terim pullarining oʻz vaqtida berilayotgani, muammo va kamchiliklar xususida suhbatlashdi. Shundan soʻng, uyushmagan aholi orasidan terim jarayonlarida faol ishtirok etib, boshqalarga namuna koʻrsatayotgan 6 nafar terimchilarga turli xildagi oziq-ovqat mahsulotlaridan iborat sovgʻalar ulashildi.

Shu oʻrinda taʼkidlash kerakki, mamlakatimizda bu yilgi paxta yigʻim-terimiga alohida eʼtibor qaratilib, bu borada Vazirlar Mahkamasining «2020-yil paxta hosilini yigʻib-terib olish ishlarini uyushqoqlik bilan tashkil etish chora-tadbirlari toʻgʻrisida»gi qarori qabul qilindi. Qaror bilan qoʻlda terilgan har bir kilogramm paxta xomashyosi uchun birinchi terimda - 1 000 soʻmdan, ikkinchi terimda - 1 400 soʻmdan kam boʻlmagan miqdorda mehnat haqi toʻlanishi belgilab berildi.

Shuningdek, ushbu hujjatga koʻra paxta terish mashinalari bilan terib olingan har bir tonna paxta xomashyosi uchun 920 000 soʻmdan kam boʻlmagan xizmat haqi toʻlash belgilanib, paxta xomashyosi uchun mehnat va xizmat haqi har besh kunda, zarurat boʻlganda, har kuni toʻlash tavsiya etildi.

Qolaversa, hukumat qarorida koʻrsatilganidek, ishsiz hamda vaqtinchalik band boʻlmagan aholidan iborat terim otryadlari rahbarlari bilan mavsumiy ishga qabul qilish boʻyicha fuqarolik-huquqiy shartnomalar tuzilib, terim otryadlari rahbarlariga paxta xomashyosi yigʻim-terimi yakuniga qadar 2 million soʻmdan kam boʻlmagan miqdorda mehnat haqi toʻlanadi. Ushbu xarajatlar Bandlik va mehnat munosabatlari vazirligi huzuridagi Jamoat ishlari jamgʻarmasi mablagʻlari hisobidan qoplanadi.

Terimchilarga ish haqlarini oʻz vaqtida berish, ularni qoʻshimcha ragʻbatlantirish mehnat surʼati oshishini taʼminlaydi. Sovgʻalarga ega boʻlgan terimchilar ham oʻzlariga koʻrsatilgan  eʼtibordan juda xursand boʻldilar hamda tuman Mudofaa ishlari boʻlimi boshligʻiga minnatdorchilik bildirdilar.

Charos Arslonova, tuman hokimligining Axborot xizmati rahbari.