Sportchi qizlarga – Prezident sovgʻalari

Bugungi obod va faravon hayotimiz, Oʻzbekistonimizning jahon maydonida munosib obroʻ topishida eng asosiy omil - bu ham jismoniy, ham maʼnaviy jihatdan sogʻlom, hech kimdan kam boʻlmasdan, boshini baland koʻtarib yashaydigan barkamol avlodimizdir.

Sogʻlom bolaning dunyoga kelishi, baquvvat boʻlib oʻsib-ulgʻayishi koʻpgina talab va omillarga bogʻliq. Ular orasida shunday oʻta muhim, hal qiluvchi mezon borki, u ham boʻlsa bolaning jismonan sogʻlomligidir. Jismoniy jihatdan sogʻlomlikka esa sport bilan shugʻullanmasdan erishish mumkin emas. Shuni hisobga olgan holda mamlakatimizda istiqlolning ilk yillaridan boshlab sportni, ayniqsa bolalar sportini rivojlantirishga katta eʼtibor qaratilmoqda.

Xususan, xotin-qizlar sportini rivojlantirishga alohida gʻamxoʻrlik koʻrsatilayotgani qizlarimizning sogʻlom boʻlib ulgʻayishi va kelgusida barkamol avlod dunyoga kelishining kafolatidir.

Bir necha yildan beri mamlakatimizning barcha shahar va tumanlarida sport bilan shugʻullanayotgan umumtaʼlim maktablari, akademik litsey va kasb-hunar kollejlarining 6 yoshdan 18 yoshgacha boʻlgan oʻquvchi-qizlariga Prezident sovgʻalari – sport kiyimlari topshirilayotgani ham ana shunday gʻamxoʻrlikning amaldagi yana bir yorqin ifodasidir.

Bu yil ham bu ezga ish davom ettirilib, tumanimizdagi taʼlim muassasalarida tahsil olayotgan 1059 nafar qizlarimizga muhtaram Prezidentimizning sovgʻasi - sport kiyimlari tantanali ravishda topshirildi.

5-may kuni Amudaryo akademik litseyining tennis kortida shu masalaga bagʻishlangan tadbir oʻtkazildi.

Tadbirda tuman hokimining birinchi oʻrinbosari F.Sadullayev, 28-sonli maktabning sport murabbiysi G. Qalandarova, Amudaryo akademik litseyi oʻquvchisi Yu.Tursunboyevalar soʻzga chiqib, yuksak eʼtibor uchun Prezidentimizga minnatdorchilik bildirdilar.

Tantanali tadbirda Qoraqalpogʻiston Respublikasi Ichki ishlar vaziri Qurol Berdiyev ishtirok etdi.

Tadbir soʻngida sanʼatkorlar tomonidan kontsert dasturi namoyish qilindi.