PREZIDENTIMIZNING BMT MINBARIDAN BILDIRGAN TAKLIF VA TAShABBUSLARI QALBIMDA IFTIXOR UYGʻOTDI

AQShning Nyu-York shah­rida 23-sentyabr kuni boʻlib oʻtgan BMT Assam­bleya­sining 80-yubiley sessiyasi minbaridan turib, muhtaram Preziden­timiz Sh. M. Mirziyoyev oʻz­bek tilida nutq soʻzladilar. Men bir ijodkor sifatida davlatimiz rahbarining yuksak minbardan turib, ona tilimiz qadrini dunyo miqyosida yanada baland koʻtarganlaridan cheksiz gʻururlandim. Qolaversa, dunyo miqyosidagi global muammolar haqida oʻzbek tilida fikr yuritib, tilimizning naqadar jarangdorligiga sessiya ishtirokchilarining eʼtibor­larini qaratgan­laridan faxrlandim.

Bundan 8-yil avval Prezidentimiz ushbu minbardan turib, oʻshanda ham sof oʻzbek tilida Markaziy Osiyoni tinchlik va yaxshi qoʻshnichilik hamda sheriklik makoniga aylantirishga qaror qilganlarini bildirganini esladim. Bu galgi chiqish­larida esa Prezidentimiz mamnuniyat bilan: "Biz bu strategik maqsadga toʻla erishdik, yopiq chegaralar, hal etilmagan bahs-nizolar tarixda qoldi", — deb taʼkidladilar.

Haqiqatan ham, bugungi Markaziy Osiyo dunyo hamja­miyati koʻz oʻngida tom maʼnoda barcha yoʻnalishlar boʻyicha yuqori darajada integratsiyalashayotgan, millatlararo to­tuvlik, iqtisodiyoti bar­qa­ror rivojlanayotgan hu­dudga aylanib bormoqda. Albatta, bu jarayonda Oʻzbekiston doʻstona muloqot, tashabbuskorlik, millatlar va elatlarni birlashtiruvchi kuch, tinchlik va taraqqiyot tayanchi sifatida oʻzini namoyon etmoqda.

Prezidentimiz BMT minbaridan turib nafaqat Markaziy Osiyo mintaqasi, balki butun dunyo mamlakatlari xalqlari hayotiga daxldor global muammolarga toʻxtalib, qator taklif va tashabbuslarni ilgari surdilar.

Xususan, Prezidentimizning Butunjahon professional taʼlim sammitini oʻtkazish, Afgʻoniston orqali transport, energetika koridorlarini rivojlantirish, terrorizmga qarshi kurashish boʻyicha mintaqaviy markazni tashkil etish, yoshlar uchun global harakat platformasini yaratish ka­bi taklif va tashabbuslari xalqaro hamjamiyat uchun dolzarb ahamiyatga ega boʻldi.

Prezidentimiz Afgʻonistondagi bugungi vaziyat, Gʻazoda, Ukrainada boʻlayotgan urushlar xalqaro miqyosda investitsiya oqimlarini, tovar va xizmatlar aylanishini izdan chiqarib, butun dunyo tadbirkorlik muhi­tini yomonlashtirayotganini taʼ­­kidladi.

Bundan tashqari, ekologiya va qurgʻoqchilik masalalarida harakatlarni birlashtirish, qishloq joy­larda xotin-qizlarni ish bilan taʼminlash, munosib mehnat sharoitlarini yaratish, ularni ijtimoiy himoyalash borasida Osiyo xotin-qizlar forumini doimiy platformaga aylantirish borasida tak­lif­larini bildirdilar.

Ayniqsa, "Jahon yoshlarining tinchlik sari harakati"ni taʼsis etish va uning qarorgohini Oʻzbekistonda joylashtirish toʻgʻrisidagi Prezidentimizning taklifi eʼtiborga munosib boʻldi. 

Shu bilan birga Prezidentimiz: "Yoshlar — tinchlik, taraqqiyot va hamkorlik gʻoyalarini tashuvchi re­surs", — deb munosib baho berdilar.

Men Prezidentimizning BMT yuksak minbaridan turib bildirgan har bir tashabbus va takliflarining Markaziy Osiyo va dunyo xalqlari hayotiga daxldorligi nuqtai nazaridan juda katta siyosiy-ijtimoiy va iqtisodiy ahamiyat kasb etishini va davlatlar, millatlar va elatlar kelajagi yoʻlidagi muhim qadam deb bilaman va ana shu jarayonlarda bir ijodkor sifatida oʻzimning ham ishtirok etishimdan faxr­lanaman.

XONIMJON RAJABOVA,
Oʻzbekiston Yozuvchilar uyushmasi aʼzosi,
Xalq deputatlari Amudaryo tuman Kengashi deputati.