BOʻSh ISh OʻRINLARI YaRMARKASIDA 109 TA KORXONA-TAShKILOT 245 TA VAKANT LAVOZIMLARNI TAKLIF ETDI

Amudaryoda tuman hokimligi, tuman Prokuraturasi, Majburiy ijro byurosi tuman boʻlimi va Aholi bandligiga koʻmaklashish markazi bilan hamkorlikda boʻsh ish oʻrinlari yarmarkasi tashkil etildi.

18-yanvar kuni tuman Madaniyat boʻlimi binosida boʻlib oʻtgan mazkur tadbirda sektorlar rahbarlari, Majburiy ijro byurosi tuman boʻlimi va Aholi bandligiga koʻmaklashish markazi, tegishli korxona-tashkilotlar, tadbirkorlik subʼektlari masʼullari qatnashishdi. Yarmarkaga band boʻlmagan xotin-qizlar, yoshlar, ish izlayotgan aliment toʻlovchi fuqarolar, nogironligi boʻlganlar ham tashrif buyurishdi.

Ishsiz fuqarolar bandligini taʼminlash maqsadida oʻtkazilgan yarmarkaning ochilish marosimida soʻzga chiqqan tuman prokurori Aziz Roʻzmetov boʻsh ish oʻrinlari, yoʻllanma olish, ishga joylashish tartibi toʻgʻrisida maʼlumotlar berdi. Shuningdek, tuman Ichki ishlar boʻlimi boshligʻi Jamoladdin Yusupov, tuman hokimi oʻrinbosari Rashid Salayev, Majburiy ijro byurosi tuman boʻlimi hamda Aholi bandligiga koʻmaklashish markazi masʼullari ham fuqarolarning ish bilan taʼminlanishi, mehnat muhofazasiga oid amaldagi qonunchilik kabilar yuzasidan tushunchalar berib oʻtishdi.

Yarmarkada tumandagi 109 ta korxona va tashkilotlar 245 ta boʻsh ish oʻrinlari bilan qatnashdi. Vakant ish oʻrinlari mavjud boʻlgan ushbu korxona va tashkilotlar oʻz faoliyati haqida batafsil maʼlumot beruvchi koʻrgazmali stendlari, tarqatma materiallarini ishtirokchilar eʼtiboriga havola etishdi. Shuningdek, tumandagi tijorat banklari tadbirkorlik faoliyatini boshlash istagida boʻlgan fuqarolarga imtiyozli kredit paketlari toʻgʻrisida maʼlumotlar joylashtirilgan bukletlarni tarqatib, ulardan foydalanishni tavsiya qilishdi. Tijorat banklar masʼullari ish izlovchilarga tavsiya etilayotgan foizli kredit va garov talab etilmaydigan mikrokreditlar olish tartibi toʻgʻrisida batafsil tushunchalar berishdi.

Boʻsh ish oʻrinlari yarmarkasida vakant oʻrinlar bilan qiziqib, murojaat qilgan 92 nafar fuqarolarning 25 nafarini ayollar, 7 nafarini ogʻir turmush sharoitida yashovchi xotin-qizlar, 24 nafarini yoshlar, 6 nafarini taʼlim muassasalari bitiruvchilari, 6 nafarini jazodan ozod etilganlar, 3 nafarini mehnat muhojirlari tashkil qildi. Ulardan 61 nafariga oʻzlarining kasb mutaxassisliklari boʻyicha korxona-tashkilotlarda ishlash uchun yoʻllanma berildi va ishga joylashtirildi. Shuningdek, 10 nafar fuqaroga maslahatlar berildi. Haq toʻlanadigan jamoat ishlariga 12 nafar shaxs jalb etildi. Kasbga oʻqitishga 9 nafar fuqaro yoʻnaltirildi.

Ishsiz xotin-qizlar, yoshlar hamda Majburiy ijro byurosi Amudaryo tuman boʻlimi ish yurituvidagi aliment qarzlarini undirish, ishsiz aliment toʻlovchi fuqarolarning bandligini taʼminlash maqsadida oʻtkazilgan “Boʻsh ish oʻrinlari yarmarkasi”da 14 nafar ayollar, 20 nafar yoshlar, 3 nafar bitiruvchilar, 17 nafar ishsiz aliment toʻlovchi fuqarolar, 1 nafar jazodan ozod etilgan shaxs, 2 nafar mehnat muhojirlari ishga joylashtirildi.

Yarmarka davomida ish izlovchi fuqarolarga malakali mutaxassislar tomonidan bandlik sohasida qiziqtirgan masalalar boʻyicha maslahatlar berilib, huquqiy va amaliy yordamlar koʻrsatildi. Shuningdek, aholini ish bilan taʼminlash toʻgʻrisidagi qonun asosida oilaviy tadbirkorlikni yoʻlga qoʻyish, tarmoqli marketing orqali daromad topish boʻyicha ham yoʻl-yoʻriqlar, tavsiyalar berildi.

O.Xudoyberganova.