Boʻsh ish oʻrinlari mehnat yarmarkasida 12 nafar fuqaro doimiy ishga joylashtirildi

Amudaryo tumani Kambagʻallikni qisqartirish va bandlikka koʻmaklashish boʻlimi tomonidan Oʻzbekiston Respublikasi Bosh prokuraturasi huzuridagi Majburiy ijro byurosi Amudaryo tumani boʻlimi bilan hamkorlikda boʻsh ish oʻrinlari mehnat yarmarkasi tashkil etildi. Ushbu yarmarkadan koʻzlangan asosiy maqsad ishsiz aliment toʻlovchilarning bandligini taʼminlash, ularning moddiy javobgarligini kuchaytirish orqali oilalarning ijtimoiy barqarorligini qoʻllab-quvvatlash va probatsiya hisobida turgan fuqarolar, nogironligi boʻlgan shaxslar kabi ijtimoiy himoyaga muhtoj guruhlarga doimiy ish oʻrni topishda yordam koʻrsatishdir.

Yarmarkada Oʻzbekiston Respublikasi Bosh prokuraturasi huzuridagi Majburiy ijro byurosi Amudaryo tumani boʻlimi boshligʻi Medetbay Ismetullayev, tuman Kambagʻallikni qisqartirish va bandlikka koʻmaklashish boʻlimi boshligʻi Ruslan Narimbetov, Ichki ishlar boʻlimi huzuridagi Probatsiya boʻlimi boshligʻi Ruslan Iskandarov hamda boshqa hamkor tashkilotlar, tijorat banklari va ish beruvchilar vakillari faol ishtirok etdi.

Yarmarkada tumandagi 31 ta korxona va tashkilotlar turli sohalar – sanoat, qishloq xoʻjaligi, xizmat koʻrsatish, taʼlim va boshqa yoʻnalishlardagi jami 133 ta boʻsh ish oʻrni bilan qatnashdi.

Kambagʻallikni qisqartirish va bandlikka koʻmaklashish boʻlimi xodimlari tomonidan yarmarka maydonida ishtirokchilar uchun qulay sharoitlar yaratildi. Ularga boʻsh ish oʻrinlari va ishga joylashtirish tartibi, ishsiz aholini kasb-hunarga oʻqitish dasturlari, xorijiy davlatlarda mavsumiy yoki doimiy ishga joylashtirish imkoniyatlari, mehnat huquqlari, mehnat muhofazasi va xavfsizlik qoidalari boʻyicha huquqiy maslahatlar berildi. Bu maʼlumotlar videoroliklar, bannerlar, maxsus broshyuralar va bukletlar orqali taqdim etildi, shuningdek, yakkama yakka suhbatlar va guruh maslahatlari ham oʻtkazildi.

Yarmarka yakunlariga koʻra doimiy ishga joylashtirilganlar soni 12 nafarga yetdi. Bular orasida 4 nafar aliment toʻlovchi va 8 nafar ishsiz fuqaro bor. Aliment toʻlovchilarning ishga joylashishi oilalarning moddiy taʼminotini yaxshilash, bolalar huquqlarini himoya qilish va ijtimoiy muammolarning oldini olishda muhim ahamiyat kasb etadi.

Bundan tashqari, 9 nafar fuqaroga mehnat qonunchiligi va mavjud vakansiyalar boʻyicha tanlovlarda ishtirok etish uchun huquqiy maslahat hamda amaliy yordam koʻrsatildi. Yarmarka davomida boʻlim xodimlari tomonidan jami 38 nafar fuqaroga turli yoʻnalishlar boʻyicha maslahatlar berildi. Jumladan ularning 15 nafariga mavjud ish oʻrinlariga joylashish, 11 nafariga kasb-hunar va tadbirkorlikka oʻqitish, 8 nafariga xorijiy davlatlarda ishga joylashtirish, 4 nafariga esa mehnat huquqlari va muhofazasi masalalari boʻyicha tavsiyalar berildi.

Amudaryo tumani Kambagʻallikni qisqartirish va bandlikka koʻmaklashish boʻlimi tomonidan bunday xayrli tadbirlar tizimli ravishda oʻtkazib kelinmoqda. Kelgusida ham shu kabi yarmarkalar, individual maslahatlar, kasb oʻqitish kurslari va xorijiy mehnat bozoriga chiqish dasturlari orqali aholi bandligini taʼminlash, kambagʻallikni qisqartirish va ijtimoiy adolatni mustahkamlash yoʻlidagi saʼy-harakatlar izchil davom ettiriladi. Bu tadbirlar nafaqat iqtisodiy oʻsishga, balki jamiyatdagi ijtimoiy-maʼnaviy barqarorlik va fuqarolarning davlatga boʻlgan ishonchini oshirishga ham xizmat qiladi.