PREZIDENTIMIZ BMT MINBARIDAN TURIB MINTAQAVIY MUAMMOLAR HAQIDA OʻZBEK TILIDA NUTQ SOʻZLADILAR

Oʻzbekiston Respublikasi Prezidenti Sh. M. Mirziyoyevning Birlashgan Millatlar Tashkiloti Bosh Assambleyasining 78-sessiyasida soʻzlagan nutqini qiziqish va hayajon bilan tingladim. Prezidentimiz oʻz nutqlarida hamjihatlik va amaliy hamkorlik ruhini saqlash, umumiy manfaatlarni ziddiyatlardan ustun qoʻygan holda mamlakatlarni jipslashtirish zarurligini eʼtirof etib: “Asosiy maqsadimiz mamlakatlarimiz va xalqlarimizning bugungi kuni va istiqboli  uchun masʼuliyatni har tomonlama chuqur anglash, ochiq va konstruktiv hamkorlikka tayyor barcha tomonlarni global muloqotga jalb qilishdan iborat ekanligini taʼkidladilar”. Prezidentimiz global va mintaqaviy kun tartibidagi eng dolzarb masalalar yechimiga qaratilgan muhim takliflarni ilgari surdilar. 

Bugun davlatimiz oldida turgan ustuvor vazifalardan biri Jahon savdo tashkilotiga aʼzo boʻlishdir. Aholi turmush darajasining yaxshilanishi hisobiga 2017-yildan beri kambagʻallik ikki baravar qisqardi. Prezidentimiz shu haqda soʻz yuritarkanlar 2030-yilgacha uni 7 foizga tushirish reja qilinganligini qayd qildilar.. 2024-yilda Oʻzbekistonda Birlashgan Millatlar Tashkiloti shafeligida "Ijtimoiy himoya: barqaror taraqqiyot sari yoʻl" butunjahon konferentsiyasini oʻtkazish taklifi ilgari surildi.

Oʻzbekiston davlati yaxshi qoʻshnichilik, oʻzaro hamkorlik, barqarorlik  va rivojlanish muhitini mustahkamlash yoʻlidan boradi. Davlat chegaralari, transport koridori va suvdan foydalanish boʻyicha muammolar bartaraf qilindi.Mintaqa davlatlari oʻrtasida savdo 2,5 barobar, qoʻshma korxonalar soni 5 barobar oʻsgan. Oʻzbekiston mintaqada iqtisodiy markazga,  Sharq va Gʻarbni, Shimol va Janubni bogʻlaydigan transport-kommunikatsiya koʻprigiga aylanib, dunyoda unga qiziqish tobora kuchaymoqda."Bizning nafaqat tariximiz, balki kelajagimiz, hayotiy muhim manfaatlarimiz ham umumiy va mushtarakdir. Mintaqaviy hamkorlikni kengaytirishdan boshqa yoʻlimiz yoʻq va boʻlishi ham mumkin emas. "Ayollarning bunyodkorlik salohiyatini roʻyobga chiqarish masalalarini muhokama qilish va tajriba almashish maqsadida Oʻzbekistonda Osiyo xotin-qizlari forumi oʻtkazish taklif qilindi.

Bugun  hamyurtlarimiz Orol dengizi fojeasidan aziyat chekayotganligi sir emas. Bu fojea oqibatlarini bartaraf qilish yoʻlida koʻrilayotgan choralar, mintaqaviy iqlim oʻzgarishlarining salbiy oqibatlari, suv bilan taʼminlanganlik darajasining kamayib borishi tufayli Birlashgan Millatlar Tashkiloti Bosh kotibining Suv resurslari boʻyicha  maxsus vakili lavozimi taʼsis etilishi, Markaziy Osiyoda suvni tejovchi texnologiyalar platformasi yaratilishi va mintaqada qabul qilingan. “Yashil taraqqiyot” dasturi doirasida tizimli hamkorlikning yoʻlga qoʻyilishi qoʻllab-quvvatlandi. "Biz Birlashgan Millatlar Tashkiloti Bosh Assambleyasining" Markaziy Osiyo global iqlim tahdidlari qarshisida: umumiy farovonlik yoʻlidagi hamjihatlik"rezolyutsiyasini qabul qilish  va uning asosiy mazmunini Samarqandda boʻlib oʻtadigan xalqaro iqlim forumida muhokama qilishni taklif qilamiz",-deb taʼkidladilar Prezidentimiz.

Shuningdek, dinlararo bagʻrikenglik va hamjihatlikni keng targʻib qilish maqsadida Oʻzbekistonda YuNESKO shafeligida Dinlararo muloqot  va bagʻrikenglik xalqaro markazini tashkil etish taklif etildi. Islom dinining ezgulik  va insonparvarlik mohiyatini ochib berish, ajdodlarimizning boy ijodiy merosini oʻrganish maqsadida 2024-yil Oʻzbekistonda "Islom – tinchlik va ezgulik dini" mavzusida xalqaro konferentsiya oʻtkazishni taklif qildilar.

Afgʻoniston muammolariga eʼtibor qaratgan Prezidentimiz bu davlat bilan yaxshi qoʻshnichilik munosabatlari tomonlar uchun manfaatli ekanligi, bu davlatning muzlatib qoʻyilgan aktivlarini hududdagi oʻtkir ijtimoiy muammolarni bartaraf qilishning maqbul variantlarini ishlab chiqishga qaratish lozimligiga eʼtibor qaratdilar.  Hurmatli Prezidentimizning shunday yuksak minbardan turib, eng dolzarb muammolarga dunyo hamjamiyatining eʼtiborini jalb qilganlari, ona tilimiz boʻlgan  oʻzbek tilining jahon minbaridan yangraganligi shu millat farzandi sifatida har birimizni toʻlqinlantirishi tabiiy.

Sanobar XOʻJAMURODOVA, Qoralpogʻiston xalq oʻqituvchisi, Joʻqorgʻi Kenges deputati, 40-sonli maktab direktori.