ПРЕЗИДЕНТИМИЗ БМТ МИНБАРИДАН ТУРИБ МИНТАҚАВИЙ МУАММОЛАР ҲАҚИДА ЎЗБЕК ТИЛИДА НУТҚ СЎЗЛАДИЛАР

Ўзбекистон Республикаси Президенти Ш. М. Мирзиёевнинг Бирлашган Миллатлар Ташкилоти Бош Ассамблеясининг 78-сессиясида сўзлаган нутқини қизиқиш ва ҳаяжон билан тингладим. Президентимиз ўз нутқларида ҳамжиҳатлик ва амалий ҳамкорлик руҳини сақлаш, умумий манфаатларни зиддиятлардан устун қўйган ҳолда мамлакатларни жипслаштириш зарурлигини эътироф этиб: “Асосий мақсадимиз мамлакатларимиз ва халқларимизнинг бугунги куни ва истиқболи  учун масъулиятни ҳар томонлама чуқур англаш, очиқ ва конструктив ҳамкорликка тайёр барча томонларни глобал мулоқотга жалб қилишдан иборат эканлигини таъкидладилар”. Президентимиз глобал ва минтақавий кун тартибидаги энг долзарб масалалар ечимига қаратилган муҳим таклифларни илгари сурдилар. 

Бугун давлатимиз олдида турган устувор вазифалардан бири Жаҳон савдо ташкилотига аъзо бўлишдир. Аҳоли турмуш даражасининг яхшиланиши ҳисобига 2017 йилдан бери камбағаллик икки баравар қисқарди. Президентимиз шу ҳақда сўз юритарканлар 2030 йилгача уни 7 фоизга тушириш режа қилинганлигини қайд қилдилар.. 2024 йилда Ўзбекистонда Бирлашган Миллатлар Ташкилоти шафелигида "Ижтимоий ҳимоя: барқарор тараққиёт сари йўл" бутунжаҳон конференциясини ўтказиш таклифи илгари сурилди.

Ўзбекистон давлати яхши қўшничилик, ўзаро ҳамкорлик, барқарорлик  ва ривожланиш муҳитини мустаҳкамлаш йўлидан боради. Давлат чегаралари, транспорт коридори ва сувдан фойдаланиш бўйича муаммолар бартараф қилинди.Минтақа давлатлари ўртасида савдо 2,5 баробар, қўшма корхоналар сони 5 баробар ўсган. Ўзбекистон минтақада иқтисодий марказга,  Шарқ ва Ғарбни, Шимол ва Жанубни боғлайдиган транспорт-коммуникация кўпригига айланиб, дунёда унга қизиқиш тобора кучаймоқда."Бизнинг нафақат тарихимиз, балки келажагимиз, ҳаётий муҳим манфаатларимиз ҳам умумий ва муштаракдир. Минтақавий ҳамкорликни кенгайтиришдан бошқа йўлимиз йўқ ва бўлиши ҳам мумкин эмас. "Аёлларнинг бунёдкорлик салоҳиятини рўёбга чиқариш масалаларини муҳокама қилиш ва тажриба алмашиш мақсадида Ўзбекистонда Осиё хотин-қизлари форуми ўтказиш таклиф қилинди.

Бугун  ҳамюртларимиз Орол денгизи фожеасидан азият чекаётганлиги сир эмас. Бу фожеа оқибатларини бартараф қилиш йўлида кўрилаётган чоралар, минтақавий иқлим ўзгаришларининг салбий оқибатлари, сув билан таъминланганлик даражасининг камайиб бориши туфайли Бирлашган Миллатлар Ташкилоти Бош котибининг Сув ресурслари бўйича  махсус вакили лавозими таъсис этилиши, Марказий Осиёда сувни тежовчи технологиялар платформаси яратилиши ва минтақада қабул қилинган. “Яшил тараққиёт” дастури доирасида тизимли ҳамкорликнинг йўлга қўйилиши қўллаб-қувватланди. "Биз Бирлашган Миллатлар Ташкилоти Бош Ассамблеясининг" Марказий Осиё глобал иқлим таҳдидлари қаршисида: умумий фаровонлик йўлидаги ҳамжиҳатлик"резолюциясини қабул қилиш  ва унинг асосий мазмунини Самарқандда бўлиб ўтадиган халқаро иқлим форумида муҳокама қилишни таклиф қиламиз",-деб таъкидладилар Президентимиз.

Шунингдек, динлараро бағрикенглик ва ҳамжиҳатликни кенг тарғиб қилиш мақсадида Ўзбекистонда ЮНЕСКО шафелигида Динлараро мулоқот  ва бағрикенглик халқаро марказини ташкил этиш таклиф этилди. Ислом динининг эзгулик  ва инсонпарварлик моҳиятини очиб бериш, аждодларимизнинг бой ижодий меросини ўрганиш мақсадида 2024 йил Ўзбекистонда "Ислом – тинчлик ва эзгулик дини" мавзусида халқаро конференция ўтказишни таклиф қилдилар.

Афғонистон муаммоларига эътибор қаратган Президентимиз бу давлат билан яхши қўшничилик муносабатлари томонлар учун манфаатли эканлиги, бу давлатнинг музлатиб қўйилган активларини ҳудуддаги ўткир ижтимоий муаммоларни бартараф қилишнинг мақбул вариантларини ишлаб чиқишга қаратиш лозимлигига эътибор қаратдилар.  Ҳурматли Президентимизнинг шундай юксак минбардан туриб, энг долзарб муаммоларга дунё ҳамжамиятининг эътиборини жалб қилганлари, она тилимиз бўлган  ўзбек тилининг жаҳон минбаридан янграганлиги шу миллат фарзанди сифатида ҳар биримизни тўлқинлантириши табиий.

Санобар ХЎЖАМУРОДОВА, Қоралпоғистон халқ ўқитувчиси, Жўқорғи Кенгес депутати, 40-сонли мактаб директори.