BARChAGA OʻRNAK PILLAKOR OPA

Tumanimizda ipak qurti boqish hadisini olgan oilalar, mohir pillakorlar koʻp. Ular uy sharoitida bir quti ipak qurtidan 70 kg.dan oshirib, sifatli hosil yetishtirishmoqda. Ana shunday kasanachi pillakorlarimizdan bir boʻlgan Bogʻ mahallasida yashovchi Oʻringul opa Begimovaning mehnatkashligini alohida tilga olish joiz. Opa asli Xoʻjayli tumanida tugʻilib-oʻsib, 1985-yilda tumanimizga kelin boʻlib kelgan. Oʻringul opaning qaynonasi Tursunoy momo Qudanova xonadonda 1950-yillardan buyon mavsumiy ipak qurti boqib, parvarish qilardi.
Har ishga chaqqon Oʻringul opa ham darhol ishga kirishib, ipak qurti parvarishlashni Tursunoy momodan oʻrgandi va har yili birgalikda mehnat qilib, moʻl hosil yetishtirishdi. Mustaqil pillakor sifatida esa 1990-yildan ipak qurti parvarishi bilan shugʻullandi va doim ilgʻorlar safida keldi.
Oʻringul opa bu yilgi mavsumda bir quti ipak qurti parvarishlab, shartnomada belgilangan 55 kg. rejani ortigʻi bilan bajarib, 76 kg. mahsulot topshirdi.
- Ipak qurti boqish oilamiz uchun juda maroqli, - deydi ilgʻor pillakor. - Har yili bu mavsumni orziqib kutamiz. Albatta, ish bor joyda qiyinchiliklar boʻladi. Ammo ipak qurtini parvarishlash kishiga oʻzgacha huzur bagʻishlaydi. Ayniqsa, hosil yetilganidan keyin pilla terishni hammamiz birgalikda bajaramiz va bu biz uchun juda zavqli.
Oʻringul opa ipak qurti 4 yoshga toʻlguniga qadar uyida, katta xonasida parvarishlaydi. Bu davr ancha mashaqqatli hisoblanadi. Chunki ipak qurti ulgʻayganidan soʻng, yegulik yetkazib berish koʻproq mehnat talab qiladi. Shundan keyin mehnatning mahsuli koʻrinib, hosil yetiladi. Bu paytda oilaning barcha aʼzolari bel bogʻlab,  ishga tushadi va yigʻim-terim boshlanadi.
Pilladan bu yil ham moʻl hosil toʻplashga erishgan Oʻringul opani barchaga oʻrnak qilib koʻrsatsa arziydi.

Shohzod Qurbonboyev.