TAKPOPIY EKINLAP – XALQIMIZ DASTUPXONI TOʻKIN BOʻLIShIGA XIZMAT QILADI

 Dehqonchilikda tuproq unumdorligini saqlash va oshirish uchun keng qoʻllanilib kelinayotgan gʻoʻza-gʻalla qisqa navbatli almashlab ekish tizimidan tashqari, tuproqda koʻproq miqdorda organik qoldiq qoldiradigan hamda unumdorligini yaxshi tiklaydigan ekin turlarini ham ekish, qishloq xoʻjalik mahsulotlari yetishtirish miqdorini oshirish lozimligini davr taqozo etmoqda.

Tabiiyki, har bir fermer xoʻjaligi, tomorqa yer egasi ekinining hosili sifatli va salmoqli boʻlishini xohlaydi, ekin maydonlaridan samarali foydalanishga, koʻp daromad olishga intiladi. Shu maqsadda keyingi yillarda gʻoʻza maydonlari faqat gʻalla bilangina emas kuzgi kartoshka, sabzi, karam, mosh, sholi, piyoz dukkakli don va boshqada sabzavotlar bilan almashlab ekilmoqda. Bu usul tuproq unumdorligiga sezilarli taʼsir  koʻrsatishiga koʻpchilik oʻz faoliyatlarida ishonch  hosil qilmoqda. Qolaversa, gʻalladan boʻshagan maydonlarga takroriy ekinlar ekish va koʻzlanganiday hosil olish – yurtdoshlarimiz dasturxoni toʻkin, turmushi farovon boʻlishiga xizmat qiladi.

Ayni kunlarda tumanimiz fermer xoʻjaliklarida 2020-yil hosili uchun ekilgan bugʻdoylar donini yigʻishtirib olish, gʻalladan boʻshagan maydonlarga takroriy ekinlar ekish uchun tayyorgarlik boshlanib ketdi.

Mamlakatimizda oziq-ovqat xavfsizligini taʼminlash va tanqisligining oldini olishga, xalqimiz dasturxoni xilma-xil qishloq xoʻjalik mahsulotlari bilan toʻkin boʻlishiga hissa  qoʻshish maqsadida tumanimizda ham gʻalladan boʻshagan maydonlarga takroriy ekinlarni joylashtirish va moʻl hosil yetishtirish boʻyicha rejalar belgilab olindi. Shunga koʻra, gʻalladan boʻshagan maydonlarning 1803 gektariga takroriy ekinlar ekiladi. Shuning  258 gektariga sabzavot, 35 gektariga kartoshka, 400 gektariga mosh, 70 gektariga moyli ekinlar, 140 gektariga chorva uchun ozuqa ekinlari ekiladi. Takroriy ekinlarni  ekishga 11 tonna sabzavot, 105 tonna kartoshka, 14 tonna mosh, 180 tonna sholi, 1 tonna moyli ekinlar, 4 tonna ozuqa ekinlari urugʻlari tayyorlab  qoʻyildi.

Takroriy ekinlardan jami 11 983 tonna hosil olish rejalashtirilgan.

Ayni kunlarda gʻalladan boʻshagan dalalarda takroiy ekin ekishga tayyorlash uchun sugʻorish, tekislash ishlari davom etayapti.

Yurtimizda qariyb uch oydan ziyod vaqtdan beri davom etayotgan koronavirus pandemiyasi davrida ehtiyojmand oilalarni moddiy qoʻllab-quvvatlash, oziq-ovqat xavfsizligini taʼminlash, mavjud resurslardan aholi farovonligini oshirishda oqilona foydalanish maqsadida qabul qilgan tuman hokimining 2020-yil 1-iyun kungi qaroriga asosan tumanda har bir sektor hududida fermer xoʻjaliklarining gʻalladan boʻshaydigan maydonlaridan kam taʼminlangan, ishsiz, ekin ekishga imkoniyati bor oilalarning har biriga kamida 20 sotixdan yer maydoni ajratib berilmoqda. Aniqroq aytadigan boʻlsak, 1-sektor hududidan 10 ta kam taʼminlangan oilaga, 2 sektor hududidan 20 ta, 3 sektor hududidan 9 ta, 4 sektor hududidan 6 ta kam taʼminlangan, ekin ekishga imkoniyati bor oilalarga 20 sotixdan yer maydonlari ajratib berildi.

Bundan koʻzlangan vazifa ushbu ajratilgan maydonlarda moʻl hosil yetishtirilishiga erishish yerdan unumli foydalanilishi evaziga ehtiyojmand oilalarning iqtisodi yuksalishini taʼminlashdir.

Ilhom POLVONOV,
tuman Fermer, dehqon xoʻjaliklari va tomorqa yer egalari Kengashi raisi.