KARANTINDA HAM XALQIMIZ XIZMATIDAGI OTAXON

Xalqimiz boshidan oʻtkazayotgan bu sinovli davr har birimizni hushyor tortishga undaydi. Bu sinovlarni esa xalqimiz bir va ahil boʻlib, albatta, yengib oʻtadi. Bu ahillikni yurtimizda karantin eʼlon qilingandan buyon amalga oshirilayotgan hayriya tadbirlari, aholiga arzon narxlarda yetkazilayotgan mahsulotlar va Oʻzbekiston ahlining vaziyatni toʻgʻri tushungan holda uyda qolayotgani soʻzimizning yaqqol dalilidir.

Mana shunday, uyda qolsa ham bekor oʻtirmasdan xalqimiz xizmatiga shaylanganlardan biri Jumur ovul mahallasida istiqomat qiluvchi salkam yetmish yoshni qoralab qolgan Karimboy ota Rahimovdir. Ota karantin boʻlishiga qaramasdan uyda qolib, karantin qoidalariga rioya qilgan holda oʻgʻli, kelini, nevaralari bilan birgalikda tomorqasidagi issiqxonada xalqimizga har xil koʻchatlarni arzon narxlarda yetkazib berishni kanda qilmayapti. Pomidor, bodring, baqlajon, karam, bulgʻor qalampir koʻchatlarini yetishtiribgina qolmay, bolalari uydaligidan unumli foydalanib, ularning ham vaqti mazmunli oʻtishi uchun tomorqasida yana bir issiqxona qurdi. Unda pomidor va bodring yetishtirib, xalqimizga yetkazishni yoʻlga qoʻydi.

Karimboy ota issiqxonada koʻchatlar yetishtirishni oʻttiz besh yildan beri umr yoʻldoshi Kunzira momo bilan birgalikda amalga oshirmoqda. Bu borada ota ancha tajriba ham toʻplagan. Karimboy ota  farzandlari va nevaralari tarbiyasiga ham alohida eʼtibor berib kelmoqda. Uch nafar nevarasi oliy oʻquv yurti talabasi. Katta nevarasi Dinora Ajiniyoz nomidagi NDPIda, Venera Berdaq nomidagi QMUda, Mahmudjon esa Toshkent Temir yoʻllar institutida tahsil olishadi. Boshqa nevaralari esa hali maktab oʻquvchilari. Nevaralari ham uyda masofaviy oʻqishni davom ettirgan holda bobosining yordamchilari. Ular bu ishdan zavqlanishini va uyda qolib zerikmayotganliklarini aytishmoqda.

Bu oilaga koʻpchilikning havasi keladi. Yoshining ulugʻligiga qaramay ertangi kunga ishonch va umid bilan, vahimaga tushmasdan, xalqimizga oz boʻlsa ham nafi tegayotganidan mamnun. Ayniqsa, otaxonning shijoati tahsinga loyiq.

Halima OʻTAGANOVA, 48-sonli maktab oʻqituvchisi.