Uyshinlik oila tomorqasida gul yetishtirib, bir mavsumda 20 mln soʻm daromad olmoqda

Uyshinlik aka-uka Nuraddin va Omonboy Jalolovlar tomorqasida gulchilik bilan shugʻullanishadi. Dastlab Nuraddin Jalolov oʻz tomorqasida ixchamgina issiqxona qurib, gul urugʻlarini undirishga kirishganida koʻpchilik: “bizning sharoitda gulchilikdan ham daromad olish mumkinmi, juda mayda ish-ku?” deya ishonmadi. Lekin Nuraddin birinchi yiliyoq sarf-xarajatlarini tiklashdan tashqari, anchagina foyda ham koʻrganini bilganlar halol va fidoyi mehnatning samarasi yuqori boʻlishini anglashdi.

Bundan 4-yil oldin oʻz tomorqasining bir qismida gulchilik xoʻjaligini yurita boshlagan Nuraddin Jalolovning issiqxonasida ayni kunda 8 ming tupga yaqin turli xil iforli va manzarali gul navlari mavjud. Bu ishlarda Nuraddin Jalolovga butun oila aʼzolari, ayniqsa, qizlari Ozoda va Maftuna yaqin koʻmakdosh. Oila faqat gulchilikning oʻzidan yiliga 15-20 mln. soʻm daromad oladi.

Darvoqe, Nuraddin Jalolov gulchilikni aslida ukasi Omonboydan oʻrgangan edi. Eʼtibor qilsa, ukasi uyidan chiqmay, oʻz tomorqasida butun oilasini, farzandlarini ish bilan taʼminlab, yaxshigina daromad topayotir. Omonboy akasiga gulchilik sirlarini oʻrgatdi. Aka ukadan oʻrganib, gulchi boʻldi. Omonboy esa gulchilik xoʻjaligi orqasidan umr yoʻldoshi va farzandlarining barcha orzularini roʻyobga chiqardi, xonadonini jihozladi. Faqat gulchilikning oʻzidan keladigan yillik daromadini 20 mln. soʻmga yetkazdi.

Ayni kunda xonadon tomorqasida 15 ming tupdan ziyod gul navlari oʻstirilmoqda. Omonboy Jalolovning tomorqasida ayni ish qizigan payt. Gulchilikdan tashqari, ertagi sabzavot va poliz ekinlari ekishda va parvarishlashda unga umr yoʻldoshi Zebogul Yusupova, farzandlari Mohiraxon va Dilshodbeklar yaqindan yordam berishmoqda.

Pobiya YOʻLDOShEVA.