Oʻrmonlar – yashil boyligimiz

Mamlakatimiz hududidagi oʻrmonlar tabiiy koʻpayish xususiyatiga ega boʻlishiga qaramasdan mutaxassislar tomonidan ham oʻrmonzorlarni intensiv rivojlantirish boʻyicha tizimli ishlar amalga oshiriladi.

Qipchoq davlat oʻrmon xoʻjaligi tasarrufidagi 16 ming 540 gektar yerning 3 ming 348 gektar yeri yashil oʻrmonzorlar bilan qoplangan. Qolgan yer maydonlarida yangi oʻrmonzorlar barpo etish, urugʻchilik va koʻchatchilik, qishloq xoʻjaligi ekinlarini ekish va parvarishlash, dorivor oʻsimliklar urugʻlarini tayyorlash va ekish, shuningdek, qoʻshimcha tarmoqlar faoliyatini yoʻlga qoʻyish va rivojlantirish yoʻnalishlarida ish olib boriladi.

Oʻtgan yil davomida oʻrmon barpo etish, urugʻchilik va koʻchatchilik yoʻnalishida  amalga oshirilgan ishlar samarali boʻldi. Yillik rejaga koʻra, 3 ming 650 kilogramm turli xil oʻrmon butalari urugʻi tayyorlanishi koʻzda tutilgan boʻlib, ayni kungacha 36 ming 456 kg, urugʻlar tayyorlandi. Shundan 35 ming 656 kg. saksovul, 1 ming 800 kg. qorabaroq urugʻlari terilib, Orol dengizining qurigan tubida yashil hudud barpo etish uchun yetkazib berildi.

Qipchoq davlat oʻrmon xoʻjaligi hududidagi qumloqlarda yangi oʻrmonlar barpo etish boʻyicha olib borilayotgan ishlar tufayli ayni paytda 28 gektar qumli hududga saksovul koʻchatlari oʻtqazilib, 45 gektar maydonga saksovul urugʻlari ekildi. Mavsum oxirigacha yana 27 gektar qumli hududga saksovul koʻchati va 45 gektar yerga saksovul urugʻlari ekilib, qumli hududlardagi saksovulzorlarni 145 gektarga yetkazish rejalashtirilgan.

Oʻrmonzorlar barpo etish va buyurtmachi tashkilotlarga zarur koʻchatlarni shartnoma asosida yetkazib berishga ham alohida ahamiyat qaratilmoqda. Ayni paytda oʻrmon xoʻjaligidagi 3 gektarlik niholxonada noyob daraxt koʻchatlarining tumanimiz iqlim sharoitiga moslashtirilgan navlari parvarishlanmoqda. Ushbu koʻchatlar buyurtmachilarga oʻz vaqtida, sifatli yetkazib berilishi  uchun xoʻjalikda faoliyat yurituvchi 44 nafar malakali mutaxassis va ishchilar masʼul.

Qishloq xoʻjaligi mahsulotlari yetishtirish uchun ajratilgan 6 gektarlik unumdor yer maydoni ayni paytda bahorgi ekish ishlariga tayyor holatga keltirildi. Oʻrmon xoʻjaligida ozuqabop oʻsimliklar, shuningdek, dorivor giyohlar ham parvarish qilinadi. Naʼmatak, tirnoqgul, yaʼni kalendula kabi dorivor oʻsimliklar yetishtiriladi. Xoʻjalik tomonidan 2020-yilda belgilangan reja asosida 90 tonna dorivor oʻsimliklar qismlari yigʻilib, qayta ishlovchi farmatsevtika sanoati korxonalariga yetkazib berish rejalashtirilgan.

Xoʻjalikda asalarichilik va parrandachilik ham yoʻlga qoʻyilgan. 132 ta oiladan iborat asalari uyalarida mavsumda moʻl va shifobaxsh, betakror oʻrmon asali yetishtiriladi. Yaqin vaqt ichida parrandalar umumiy sonini mingtaga, mayda shoxli mollar sonini 111 boshga yetkazish rejalashtirilmoqda. 7 sotix maydondagi issiqxona xoʻjaligida esa 200 tup limon koʻchatlari parvarish qilinmoqda.

Ochiq maydonlarda yetishtirilayotgan anor, anjir, daraxtlaridan tashqari tut, qayragʻoch, tol, terak va boshqa koʻchatlar tumanimiz fermer xoʻjaliklari hududlaridagi ariq va yoplar boʻyiga ekildi.

Xoʻjalikda Birlashgan millatlar tashkilotining taraqqiyot dasturi loyihasi asosida qiymati 31 ming yevrolik asal va boshqa mahsulotlarni qadoqlash tsexi tashkil etildi. Mazkur tsex hajmi har xil shisha va plastmassa idishlarda tayyor mahsulotlarni qadoqlashga moʻljallangan.

Yashil oʻrmonzorlar – umumxalq mulki, uni asrash, boyitish har birimizning burchimiz. Shu bois, mazkur hududda oʻzboshimchalik bilan ov qilish, daraxt kesish, yaylovlarda ruxsatsiz chorva mollarini boqish, olov yoqish holatlariga qarshi muntazam ravishda profilaktik tadbirlar olib boriladi. Bu hududlar – nafaqat yashil boyligimiz, balki tumanimiz iqlimi va tabiatini muvozanatda saqlab turishga xizmat qiluvchi kislorod fabrikasidir. Unga ziyon yetkazishga hech birimizning haqqimiz yoʻq.

Robiya YOʻLDOShEVA.