“YaShIL MAKON” UMUMMILLIY LOYIHASI DOIRASIDA ChOYKOʻL OVULIDA 0,9 GEKTAR MAYDONDA BOGʻ BARPO ETILDI

Mamlakatimizda yashillik darajasini oshirish, "Yashil makon" umummilliy loyihasini izchil amalga oshirish orqali hududlarda ekologik barqarorlikni taʼminlash va atrof-muhitga zararli taʼsirlarning oldini olish borasida salmoqli ishlar amalga oshirilmoqda.

Oʻzbekiston Respublikasi Vazirlar Mahkamasining 2024-yil 26-martdagi "Jamoatchilik fikri asosida ishlab chiqilgan "Mening bogʻim" loyihalarini shakllantirish va moliyalash tartibi toʻgʻrisida Nizomni tasdiqlash haqida"gi Qarori ijrosini taʼminlashga qaratilgan saʼy-harakatlar natijasida aholi maskanlarida yangi-yangi bogʻ-rogʻlar, yashil hududlar barpo etilmoqda.

Prezident Farmonlari va hukumat Qarorlari ijrosini taʼminlash maqsadida Amudaryo tumani hokimining 2025-yil 19-iyun sanasida qabul qilingan qaroriga muvofiq ayni kunlarda tumanning barcha hududlarida yashil bogʻlar barpo etilib, mazkur jarayonlarda keng aholi vakillari ham faol ishtirok etishmoqda.

Barpo etilayotgan bogʻlar uchun mevali va manzarali daraxtlar koʻchatlarini yetkazib berish va ularning sifatli ekilishini taʼminlashga alohida eʼtibor qaratilmoqda.

Qipchoq davlat oʻrmon xoʻjaligi oʻrmon fondi yer maydonlarida 200 gektar maydonga 200 ming dona saksovul koʻchatlari ekish orqali himoya oʻrmonzorlar yaratish rejalashtirilgan boʻlib, bu reja toʻliq ado etildi.

"Yashil makon" umummilliy loyihasi doirasida tumandagi korxona va tashkilotlar bilan 551 ming 857 dona mevali va manzarali daraxt koʻchatlarini oʻz vaqtida yetkazib berish boʻyicha tuzilgan shartnomaga muvofiq shu kungacha 200 ming dona koʻchatlar yetkazib berildi va bu boradagi ishlar davom etmoqda.

Oʻrmon xoʻjaligi tasarrufidagi 11,4 gektarlik koʻchatxona maydonlarida yetishtirilayotgan yasen, sharq tuyasi, virgin archasi, sumax, yapon saforasi, katalpa, terak, tol va boshqa turdagi koʻchatlar tumandagi korxona va tashkilotlarga sifatli tarzda yetkazib berilmoqda.

Mazkur yoʻnalishdagi ishlarning amaliy isboti sifatida tumanning Choykoʻl ovuli hududidagi 0,9 gektar maydonda "Yashil bogʻ" barpo etilganini keltirish mumkin. Mazkur bogʻ hududiga 663 dona qayragʻoch, 597 dona yasen, jami 1260 tup daraxt koʻchatlari oʻtqazildi.

Koʻchat ekish jarayonida Amudaryo tumani Mahalla Kengashi masʼullari, ovul fuqarolar yigʻini faollari, nuroniylar va aholi vakillari faol ishtirok etdilar. Ekilgan har bir tup niholning tuproqqa ildiz qoʻyib, unib-oʻsib ketishini taʼminlash maqsadida mutaxassislar maslahatlari va agrotexnika qoidalariga alohida ahamiyat qaratildi.

"Yashil makon" umummilliy loyihasi doirasida amalga oshirilayotgan bogʻ-rogʻlar, yashil maydonlar barpo etish borasidagi bu kabi ishlar tumanning barcha ovul va mahallalarida, korxona va tashkilotlar hududlarida keng jamoatchilik ishtirokida sifatli amalga oshirilmoqda.

ROBIYa YOʻLDOShEVA.