“ЯШИЛ МАКОН” УМУММИЛЛИЙ ЛОЙИҲАСИ ДОИРАСИДА ЧОЙКЎЛ ОВУЛИДА 0,9 ГЕКТАР МАЙДОНДА БОҒ БАРПО ЭТИЛДИ

Мамлакатимизда яшиллик даражасини ошириш, "Яшил макон" умуммиллий лойиҳасини изчил амалга ошириш орқали ҳудудларда экологик барқарорликни таъминлаш ва атроф-муҳитга зарарли таъсирларнинг олдини олиш борасида салмоқли ишлар амалга оширилмоқда.

Ўзбекистон Республикаси Вазирлар Маҳкамасининг 2024 йил 26 мартдаги "Жамоатчилик фикри асосида ишлаб чиқилган "Менинг боғим" лойиҳаларини шакллантириш ва молиялаш тартиби тўғрисида Низомни тасдиқлаш ҳақида"ги Қарори ижросини таъминлашга қаратилган саъй-ҳаракатлар натижасида аҳоли масканларида янги-янги боғ-роғлар, яшил ҳудудлар барпо этилмоқда.

Президент Фармонлари ва ҳукумат Қарорлари ижросини таъминлаш мақсадида Амударё тумани ҳокимининг 2025 йил 19 июнь санасида қабул қилинган қарорига мувофиқ айни кунларда туманнинг барча ҳудудларида яшил боғлар барпо этилиб, мазкур жараёнларда кенг аҳоли вакиллари ҳам фаол иштирок этишмоқда.

Барпо этилаётган боғлар учун мевали ва манзарали дарахтлар кўчатларини етказиб бериш ва уларнинг сифатли экилишини таъминлашга алоҳида эътибор қаратилмоқда.

Қипчоқ давлат ўрмон хўжалиги ўрмон фонди ер майдонларида 200 гектар майдонга 200 минг дона саксовул кўчатлари экиш орқали ҳимоя ўрмонзорлар яратиш режалаштирилган бўлиб, бу режа тўлиқ адо этилди.

"Яшил макон" умуммиллий лойиҳаси доирасида тумандаги корхона ва ташкилотлар билан 551 минг 857 дона мевали ва манзарали дарахт кўчатларини ўз вақтида етказиб бериш бўйича тузилган шартномага мувофиқ шу кунгача 200 минг дона кўчатлар етказиб берилди ва бу борадаги ишлар давом этмоқда.

Ўрмон хўжалиги тасарруфидаги 11,4 гектарлик кўчатхона майдонларида етиштирилаётган ясень, шарқ туяси, виргин арчаси, сумах, япон сафораси, катальпа, терак, тол ва бошқа турдаги кўчатлар тумандаги корхона ва ташкилотларга сифатли тарзда етказиб берилмоқда.

Мазкур йўналишдаги ишларнинг амалий исботи сифатида туманнинг Чойкўл овули ҳудудидаги 0,9 гектар майдонда "Яшил боғ" барпо этилганини келтириш мумкин. Мазкур боғ ҳудудига 663 дона қайрағоч, 597 дона ясень, жами 1260 туп дарахт кўчатлари ўтқазилди.

Кўчат экиш жараёнида Амударё тумани Маҳалла Кенгаши масъуллари, овул фуқаролар йиғини фаоллари, нуронийлар ва аҳоли вакиллари фаол иштирок этдилар. Экилган ҳар бир туп ниҳолнинг тупроққа илдиз қўйиб, униб-ўсиб кетишини таъминлаш мақсадида мутахассислар маслаҳатлари ва агротехника қоидаларига алоҳида аҳамият қаратилди.

"Яшил макон" умуммиллий лойиҳаси доирасида амалга оширилаётган боғ-роғлар, яшил майдонлар барпо этиш борасидаги бу каби ишлар туманнинг барча овул ва маҳаллаларида, корхона ва ташкилотлар ҳудудларида кенг жамоатчилик иштирокида сифатли амалга оширилмоқда.

РОБИЯ ЙЎЛДОШЕВА.