Jiydali qulonliklar bugungi sinovli kunlarni hamjihatlikda oʻtkazishmoqda

 Xalqimizda yer dehqonni boqadi degan hikmatli gap bor. Mehnatkash xalqimiz erta bahordan  moʻl-koʻl hosil, rizq-roʻz undirish ilinjida yer bilan tillashib, unga mehr qoʻyadi. Har bir niholni oʻz farzandi kabi tarbiyalaydigan, kun-u tun mehnat ishqi bilan yashaydigan asl dehqonlar Oq oltin ovulining Jiydali qulon aholi punktida ham umrguzaronlik qilishadi.

Jiydali qulonda 169 xonadon mavjud boʻlib, unda 943 nafar aholi yashaydi. Xonadon sohiblari mehnatda suyagi qotgan, yerning tilini, dehqonchilikning hadisini olgan insonlar. Hatto qachon, qaysi oyda, qanday yerga qanaqa ekinlar ekilishidan tortib, har soatda qanday parvarish qilishgacha bilishadi. Yil oʻn ikki oy tinimsiz mehnat qilishadi. Qish oylarida ham boʻsh oʻtirmasdan, issiqxona uchun  kerakli miqdorda toʻyintirilgan maxsus  tuproq tayyorlashadi. Fevral oyidayoq koʻchat oʻtqazishni boshlashadi. Bugungi kunda deyarli har bir xonadonda qoʻlbola issiqxona bor. Unda ertaki karam, pomidor, bodring, bulgʻor qalampiri, baqlajon, qovun, tarvuz, har xil navdagi gul koʻchatlari,  koʻkatlar, piyoz yetishtirishadi.

Butun dunyo boʻylab koronavirus kasalligi tarqalib, karantin eʼlon qilingan ayni kunlarda kimdir uyida yotib, kimnidir vahima bosib, tahlikada turgan bir kunda jiydali qulonliklar tomorqasidagi issiqxonasida oilaviy mehnat qilishmoqda. Tomorqalariga  issiqxonada yetishtirilgan sabzavot koʻchatlarni oʻtqazib, ortganini kam taʼminlanganlarga bepul berishayapti.

- Qishlogʻimiz yoshlari Possiya, Qozogʻiston davlatlari yoki Toshkentga borib, ish izlab, sarson-sargardon boʻlib yurishmaydi. Hovli, tomorqa, dala yumushlaridan ortmaydi. Chunki tomorqamizdan yiliga 3-marta ekin ekib olamiz. Ayni paytda mana bu 0,2 sotix yerda yetishtirgan piyozimizning oʻzidan 3 million daromad oldik. Shu dehqonchilik orqasidan 2 oʻgʻlimni uylantirib, 2 qizimni chiqardik, imorat solib, mashina oldik. Dalada qovun-tarvuz ham ekamiz, mol boqamiz. Xullas tirikchiligimiz binoyiday -, deydi Maryam opa Bobojonova.

Jiydali qulonda yashovchi mehnatkash ayollardan Norgul Xudoyorova, Jumagul opa Gapparovalar  ham 3-4 sotix yerga qurilgan issiqxonasidan har yili 10-12 million soʻmlik daromad olishadi. Ayni kunda ular butun aholi punkti boʻylab, xonadonlarga koʻchat yetkazib berishayapti. Qishloq aholisining yana bir xislati borki, ular nafaqat halol mehnatni ulugʻlashadi, balki ilm olishga ham qiziqishadi. Ota-onalar farzandlarini oʻqimishli, ilmli-bilimli qilishga intilishadi. Har yili bu qishloqdan 10-12  nafar yoshlar oliy taʼlimga oʻqishga kirishga muvaffaq boʻladi.

Ayni kunda Jiydali qulonda ish qizgʻin. Bekorchilik, uning orqasidan keladigan oʻzaro kelishmovchilik, urush-janjallar ham yoʻq, hammayoq tinch. Bir-biriga mehr-oqibatli, hamjihat aholi yashaydi. Sarishtalikka, tozalikka, bugungi kunda hammani tahlikaga solayotgan koronavirus infektsiyasidan saqlanish qoidalariga amal qilib, xonadonini, koʻchasini, mahallani  ozoda tutadigan kelin-qizlari bor.

Ha, birdamlikda koʻp sinovlarni, qiyinchiliklarni yengish mumkin. Birgalikda mutaxassislar berayotgan tavsiyalarga, karantin qoidalariga qatʼiy amal qilsak, albatta, bu kunlardan ham talofatlarsiz oʻtamiz.

Ziyoda Sadaddinova, Oq oltin ovul fuqarolar yigʻinining

Oila, xotin-qizlar va ijtimoiy-maʼnaviy

masalalar boʻyicha rais oʻrinbosari.