SINOVLI KUNLARDA XALQIGA YeLKADOSh BOʻLAYoTGAN DEPUTAT

El shaʼnini er yigitlar koʻtaradi. Ha, intilib, orzu maqsadlari yoʻlida kurashib, hayotda oʻz oʻrnini topgan, el-yurtimizga fidoyi xizmat qilayotgan oʻgʻlonlar bilan qancha faxrlansak oz. Boisi ular tumanimiz, respublikamiz taraqqiyotiga munosib hissa qoʻshish bilan birga bugungiday sinovli kunlarda ogʻir sharoitga tushib qolgan yurtdoshlariga ham madad boʻlishmoqda.

Qoraqalpogʻiston Respublikasi Joʻqorgʻi Kengesiga tumanimizning Oʻrta qalʼa okrugidan saylangan deputat Otabek Davletov ana shundaylar toifasidan. U Mangʻit shahrida tugʻilgan, oʻrta maktabni tamomlagach, Moskvadagi Timiryazev nomidagi qishloq xoʻjaligi akademiyasida oʻqidi. Keyinchalik 2004-yilda Oʻzbekiston Respublikasi Prezidenti huzuridagi davlat va jamiyat qurilishi akademiyasini tamomladi. U oʻz mehnat faoliyati davomida qator maʼsul lavozimlarda, Amudaryo tumani hokimligida, shu yil 28-maygacha esa “Qoraqalpoq agroximiya” aktsionerlik jamiyati direktori vazifasida ishladi.

U xalqning faol ishonchli vakili sifatida Oʻrta qalʼa saylov okrugi saylovchilari bilan tez-tez uchrashib, aholi turmush tarzi bilan tanishib, muammolarini oʻrganib, ijobiy hal qilinishi uchun intiladi.

Otabek Davletov ayni kunlarda pandemiya sharoitidan kelib chiqib, tumanimiz hududlarida boʻlib, “Saxovat va koʻmak” umumxalq harakati doirasida belgilangan rejalarning bajarilishini taʼminlash, koronavirus pandemiyasining iqtisodiyotimizga salbiy taʼsirini kamaytirish maqsadida amalga oshirilayotgan chora-tadbirlarni aholi orasida keng targʻib qilib, ularni sinovli kunlarni birgalikda, hamjihatlikda yengishga, oilasi bagʻrida daromad topishga daʼvat etmoqda.

Shuningdek, oʻz saylov okrugi hududidagi ijtimoiy himoyaga muhtoj, boquvchisini yoʻqotgan va imkoniyati cheklangan shaxslar mavjud oilalarni aniqlab, ijtimoiy qoʻllab-quvvatlashga ham intilmoqda.

Otabek Davletov shu kunlarda tumanimizda boʻlib, tadbirkorlar va ishbilarmonlar harakati OʻzLiDeP tuman Kengashi deputatlik guruhi rahbari, Mahalla va oilani qoʻllab-quvvatlash boʻlimi boshligʻi birinchi oʻrinbosari Muqaddas Beknazarova hamrohligida aholi hayoti bilan tanishdi, muammolarini oʻrgandi hamda oʻrganish jarayonida aniqlangan Mangʻit shahrining Oybek nomli, Boʻston mahallalari, Amir Temur nomli, Toshyop, Oʻrta qalʼa ovullari va Bogʻ, Arna boʻyi mahallalarida istiqomat qiluvchi jami 21 ta ijtimoiy himoyaga muhtoj, 29 ta boquvchisini yoʻqotgan oilalarga xayr-ehson qildi. Har bir oilaga 25 kilogramlik bir qopdan un, 6 litr oʻsimlik yogʻi, 6 kilogrammdan shakar, 10 kilogrammdan guruch, 1 kilogrammdan quruq koʻk choy tarqatdi.

Saxovat,  xayr-ehson qilish, ogʻir kunlarda bir-birovga hamdard, suyanchiq boʻlish kishi hayotini bezaydigan savobli amallardandir. Xalqimizning bu boqiy va qadimiy qadriyatlari koronavirus pandemiyasiga qarshi oʻrnatilgan karantin davrlarida, ayniqsa, yaqqol namoyon boʻlayotir.

Ogʻir va sinovli kunlarda muntazam ravishda 50 ta oilani ijtimoiy qoʻllab-quvvatlayotgan deputat Otabek Davletov Qoraqalpogʻiston Respublikasi Joʻqorgʻi Kengesining navbatdan tashqari boʻlib oʻtgan turtinchi sessiyasida Qoraqalpogʻiston Respublikasi Joʻqorgʻi Kengesi Raisi oʻrinbosari boʻlib saylandi.

Tumanimizdan yetishib chiqqan iqtidorli, salohiyatli va shu bilan birga elparvar inson Otabek Davletovning ushbu masʼuliyatli lavozimda ham xalqimizga sidqidildan fidoyi xizmat qilishiga astoydil ishonamiz.

Oygul RAJABOVA.