MEHNATI ELGA MANZUR BOʻLAYoTGAN AYoL

Mamlakatimizda xotin-qizlarni qoʻllab-quvvatlash, ularning jamiyatdagi mavqeini yanada mustahkamlashga alohida eʼtibor qaratilmoqda. Xotin-qizlarning farzand tarbiyasida, turli sohalarda, mahallalar tinch-osoyishtaligini saqlashda, oʻzaro mehr-oqibat, yaxshi qoʻshnichilik munosabatlarini mustahkamlashdagi xizmatlari eʼtiroflarga loyiqdir. Xotin-qizlarga ijtimoiy-iqtisodiy, tibbiy, huquqiy koʻmak berish, ularni har jihatdan qoʻllab-quvvatlash mamlakatimizning  taraqqiyot strategiyasida eng muhim yoʻnalishlardan biri sifatida belgilangan. Uning  ijrosi tizimli tarzda, har bir mahalla kesimida amalga oshirilmoqda.

Ayniqsa, 2020-yildan boshlab, “Ayollar daftari” tizimi yoʻlga qoʻyilib, daftarga roʻyxatga olingan ayollar bilan alohida ish olib borilib, ularga manzilli koʻmak berilayotganligi ishsiz, ijtimoiy himoyaga muhtoj, nogironligi  boʻlgan xotin-qizlar turmushini yaxshilashga xizmat qilayotir.

Matluba Toʻliyeva Beruniy nomli mahallaga, katta xonadonga kelib boʻlib tushdi. Turmush oʻrtogʻi mavsumiy ishlarda ishlab, roʻzgʻor yukini bir oʻzi tortib yurgan edi. Oilada ikki farzand dunyoga kelgach, tashvishlari ham koʻpaydi. Shu bois, Matluba ham ishlab, daromad topishga, turmush oʻrtogʻiga koʻmakdosh boʻlishga intildi. 1-bosqich “Ayollar daftari”ga kiritilgan Matluba bu borada mahalla xotin-qizlar faoli  Mahfuza Ibrohimovaga maslahatga keldi. Mahalla fuqarolar yigʻini masʼullari kengashib, Matlubaning kasb-kori borligi, chevarligini inobatga olib, uning imtiyozli kredit olishiga va oʻz-oʻzini band qilib, tikuvchilik faoliyatini yoʻlga qoʻyishiga koʻmak berishdi.

Matluba Toʻliyeva davlatning yordamiga koʻz tikib oʻtirishni oʻziga ep  koʻrmay, jon-jahdi bilan ishga kirishdi. Hademay, uning oʻzgacha ixlos, mahorat bilan tikkan kiyimlari koʻpchilikning eʼtiborini torta boshladi, mijozlari koʻpaydi.

Odatda biz bozor rastalaridagi tayyor kiyimlarni koʻrganimizda, yo chevar qoʻlidan tayyor boʻlgan buyurtmamizni olayotganimizda uning shu holga  kelishi uchun qancha mehnat, vaqt va sabr-toqat sarflanganini oʻylab ham koʻrmaymiz, tikuvchilikni shunchaki oddiygina kasb deb oʻylaymiz. Biroq chevarning ishini bir zum kuzatib tursangiz, bu kasbning igna bilan quduq qazishdek mashaqqatli ekanligini anglaysiz.

Ha, kasbning yaxshi-yomoni boʻlmaganidek, osoni ham yoʻq. Ammo tikuvchining kasbiga ixlosi uning tikkan har bir chokida aks etib turadi. Mehnati mahsuli – tikkan kiyimlari mijozlariga manzur boʻlganida koʻngli togʻday yuksaladi.

Matluba Toʻliyeva ishini qunt bilan bajaradi, buyurtmachining tana tuzilishiga mos fason tanlab, bor mahoratini buyurtmani xushbichim, chiroyli qilib bajarishga sarflaydi, soatlab tikuv mashinasiga egilib oʻtirib tayyorlagan kiyimi odamlarga manzur boʻlayotganidan quvonadi. U doimiy daromadga ega boʻlib, mehnatlari samarasidan “Ayollar daftari”dan chiqarildi.

Mohir tikuvchi, sabr-bardoshli, koʻnglida ulkan-ulkan orzular bilan hormay-tolmay mehnat qilib, el olqishini olayotgan Matluba Toʻliyevaning ishlariga muvaffaqiyatlar tilab qolamiz.

Oygul RAJABOVA.