МЕҲНАТИ ЭЛГА МАНЗУР БЎЛАЁТГАН АЁЛ

Мамлакатимизда хотин-қизларни қўллаб-қувватлаш, уларнинг жамиятдаги мавқеини янада мустаҳкамлашга алоҳида эътибор қаратилмоқда. Хотин-қизларнинг фарзанд тарбиясида, турли соҳаларда, маҳаллалар тинч-осойишталигини сақлашда, ўзаро меҳр-оқибат, яхши қўшничилик муносабатларини мустаҳкамлашдаги хизматлари эътирофларга лойиқдир. Хотин-қизларга ижтимоий-иқтисодий, тиббий, ҳуқуқий кўмак бериш, уларни ҳар жиҳатдан қўллаб-қувватлаш мамлакатимизнинг  тараққиёт стратегиясида энг муҳим йўналишлардан бири сифатида белгиланган. Унинг  ижроси тизимли тарзда, ҳар бир маҳалла кесимида амалга оширилмоқда.

Айниқса, 2020 йилдан бошлаб, “Аёллар дафтари” тизими йўлга қўйилиб, дафтарга рўйхатга олинган аёллар билан алоҳида иш олиб борилиб, уларга манзилли кўмак берилаётганлиги ишсиз, ижтимоий ҳимояга муҳтож, ногиронлиги  бўлган хотин-қизлар турмушини яхшилашга хизмат қилаётир.

Матлуба Тўлиева Беруний номли маҳаллага, катта хонадонга келиб бўлиб тушди. Турмуш ўртоғи мавсумий ишларда ишлаб, рўзғор юкини бир ўзи тортиб юрган эди. Оилада икки фарзанд дунёга келгач, ташвишлари ҳам кўпайди. Шу боис, Матлуба ҳам ишлаб, даромад топишга, турмуш ўртоғига кўмакдош бўлишга интилди. 1-босқич “Аёллар дафтари”га киритилган Матлуба бу борада маҳалла хотин-қизлар фаоли  Маҳфуза Иброҳимовага маслаҳатга келди. Маҳалла фуқаролар йиғини масъуллари кенгашиб, Матлубанинг касб-кори борлиги, чеварлигини инобатга олиб, унинг имтиёзли кредит олишига ва ўз-ўзини банд қилиб, тикувчилик фаолиятини йўлга қўйишига кўмак беришди.

Матлуба Тўлиева давлатнинг ёрдамига кўз тикиб ўтиришни ўзига эп  кўрмай, жон-жаҳди билан ишга киришди. Ҳадемай, унинг ўзгача ихлос, маҳорат билан тиккан кийимлари кўпчиликнинг эътиборини торта бошлади, мижозлари кўпайди.

Одатда биз бозор расталаридаги тайёр кийимларни кўрганимизда, ё чевар қўлидан тайёр бўлган буюртмамизни олаётганимизда унинг шу ҳолга  келиши учун қанча меҳнат, вақт ва сабр-тоқат сарфланганини ўйлаб ҳам кўрмаймиз, тикувчиликни шунчаки оддийгина касб деб ўйлаймиз. Бироқ чеварнинг ишини бир зум кузатиб турсангиз, бу касбнинг игна билан қудуқ қазишдек машаққатли эканлигини англайсиз.

Ҳа, касбнинг яхши-ёмони бўлмаганидек, осони ҳам йўқ. Аммо тикувчининг касбига ихлоси унинг тиккан ҳар бир чокида акс этиб туради. Меҳнати маҳсули – тиккан кийимлари мижозларига манзур бўлганида кўнгли тоғдай юксалади.

Матлуба Тўлиева ишини қунт билан бажаради, буюртмачининг тана тузилишига мос фасон танлаб, бор маҳоратини буюртмани хушбичим, чиройли қилиб бажаришга сарфлайди, соатлаб тикув машинасига эгилиб ўтириб тайёрлаган кийими одамларга манзур бўлаётганидан қувонади. У доимий даромадга эга бўлиб, меҳнатлари самарасидан “Аёллар дафтари”дан чиқарилди.

Моҳир тикувчи, сабр-бардошли, кўнглида улкан-улкан орзулар билан ҳормай-толмай меҳнат қилиб, эл олқишини олаётган Матлуба Тўлиеванинг ишларига муваффақиятлар тилаб қоламиз.

Ойгул РАЖАБОВА.