Soliq tizimidagi yangiliklar hamda oʻzgarishlarni tushuntirishga bagʻishlangan tadbir oʻtkazildi

Yurtimizda soliq siyosatini yanada takomillashtirish yuzasidan samarali chora-tadbirlar amalga oshirilmoqda. Shu maqsadda qabul qilingan yangi tahrirdagi Soliq kodeksi soliq yukini izchillik bilan kamaytirish, soliq solish tizimini soddalashtirish, soliq maʼmuriyatchiligini takomillashtirish, iqtisodiyotni jadal rivojlantirishga hamda ishbilarmonlik, investitsiyaviy faollikni oshirishga, sogʻlom raqobat muhitini shakllantirishga xizmat qiladi.

Kodeksda mamlakat taraqqiyotining tayanchi boʻlgan insofli, halol soliq toʻlovchilarni ragʻbatlantirish, yashirin faoliyat yuritayotganlarning qonuniy ishlashi uchun shart-sharoit yaratishga xizmat qiladigan normalar oʻz aksini topdi. Bundan koʻzlangan maqsad fuqarolar soliqdan qochish emas, balki uni vaqtida toʻlashdan manfaatdor boʻlishiga erishishdir. Aynan ushbu jihatlarni inobatga olgan holda yangi soliq tizimini yaratishning asosiy gʻoyasi tenglik, soddalik, aniqlik va samaradorlik kabi asosiy printsiplarga asoslandi.

Mamlakatimizda yangilanayotgan soliq tizimini, soliq islohotlarini aholiga yetkazish maqsadida qator targʻibot tadbirlari tashkil qilinmoqda. Tumanimizda ham bu boʻyicha tegishli choralar koʻrilib, tadbirkorlar oʻrtasida mutaxassislar tomonidan tushuntirish ishlari olib borilmoqda.

Joriy yilning 29-fevralida Oybek nomli mahallada  joylashgan “Jayhun-Amu-mebel” masʼuliyati cheklangan jamiyatiga qarashli mebel ishlab chiqarish tsexida tadbirkorlarga soliq sohasidagi yangiliklar haqida batafsil tushuncha berish maqsadida tadbir oʻtkazildi. Tadbirda tuman Davlat Soliq inspektsiyasi boshligʻi oʻrinbosari Odilbek Ashirboyev, inspektsiyaning soliq sohasidagi huquqbuzarliklar profilaktikasi shoʻʼba boshligʻi Marat Qoziyev ishtirok etdilar. Mutasaddilar barcha tadbirkorlarga bugungi kunda davlatimizda olib borilayotgan soliq siyosatidagi yangiliklar va oʻzgarishlar, tadbirkorlik subʼektlarining onlayn nazorat-kassa mashinalari bilan jihozlanish tartibi toʻgʻrisida tushuncha berib, bu boʻyicha amalga oshirilayotgan ishlar xususida soʻz yuritdilar.

Taʼkidlanganidek, mamlakat iqtisodiyotini uzoq muddatli rivojlantirish borasida keng koʻlamli islohotlar amalga oshirilayotgan sharoitda axborot texnologiyalari vositasida isteʼmolchilar, tadbirkorlik subektlari va davlat soliq xizmati organlarining uygʻunlashgan faoliyati alohida ahamiyat kasb etadi. Soliq tizimi sohasidagi munosabatlarni tartibga solish maqsadida Oʻzbekiston Pespublikasi Prezidentining 2019-yil 6-sentyabrda “Savdo va xizmat koʻrsatish sohasidagi hisob-kitoblar tizimiga zamonaviy axborot texnologiyalarini joriy qilish hamda ushbu sohada jamoatchilik nazoratini kuchaytirish chora-tadbirlari toʻgʻrisida”gi Farmoni eʼlon qilindi.

Mazkur Farmon savdo va xizmat koʻrsatish sohasini yanada erkinlashtirish, uning hajmini keskin oshirish, hisob-kitoblar tizimiga zamonaviy axborot-texnologiyalarini keng joriy qilish hamda ushbu sohada jamoatchilik nazoratini amalga oshirish uchun zarur shart-sharoitlar yaratishni koʻzda tutgan holda qabul qilingan edi. Unga koʻra 2020-yil 1-avgustdan oʻtgan yil yakunlari boʻyicha yillik tushumi besh milliard soʻmdan oshgan tadbirkorlik subʼektlari, 2021-yil 1-yanvardan oʻtgan yil yakunlari boʻyicha yillik yuz million soʻmdan oshgan yoki yil davomida ushbu chegaraviy miqdorga yetgan tadbirkorlik subʼektlari onlayn nazorat-kassa mashinalari, yoki virtual kassadan foydalanishga oʻtkazilishi belgilandi. Mazkur Farmon ijrosini taʼminlash boʻyicha Vazirlar Mahkamasining 2019-yili 23-noyabrdagi “Onlayn nazorat-kassa” tizimining qoʻllanilishini taʼminlash chora-tadbirlari toʻgʻrisida”gi qarori qabul qilinib, Davlat soliq qoʻmitasining tegishli qarorlariga asosan 3 ta onlayn nazorat-kassa mashinalari va 1 ta virtual kassa Davlat reyestriga kiritildi.

Tadbirda mana shu masalalar boʻyicha batafsil tushuncha bergan masʼullarga tadbirkorlar oʻzlarini qiziqtirgan savollar bilan murojaat qildilar va yanada koʻproq maʼlumotga ega boʻldilar.

Charos Arslonova, tuman hokimligining Axborot xizmati rahbari.