TOʻLQINLIKLAP KAPANTIN DAVPINI TOMOPQASIDA, QIZGʻIN MEHNAT JAPAYoNIDA OʻTKAZIShMOQDA

Toʻlqin ovuli tumanimizning yeri eng unumdor, odamlari mehnatkash, tilsiz zamin bagʻridan moʻl-koʻl hosil olishda koʻpchilikka ibrat boʻlgulik omilkorlar yashaydigan hududidir.

Qadim Amudaryo sohilida joylashgan ovul aholisi oʻz tomorqalarini haqiqiy daromad manbaiga aylantirishgan. Bu yerda tomorqa, chorva, parrandasi yoʻq xonadonning oʻzi yoʻq. Hozirgi kunda hududda 1360 ta xonadonda 7660 nafar aholi istiqomat qiladi. Ularning tomorqa yerlari 270 gektarni tashkil qiladi. Shu kungacha mazkur maydonlarning ertagi ekinlar ekiladigan qismiga kartoshka, piyoz, beda kabi ekinlar ekib boʻlinib, ayrimlari unib chiqa boshladi.

Ovulda tomorqasida issiqxona tashkil etib, qishda ham sarxil sabzavotlar yetishtirib, bozorlarimiz toʻkinligiga hissa qoʻshayotgan oilalar bor. Issiqxonalarda ertagi ekinlar koʻchatlarini yetishtirib, oʻz tomorqasiga koʻchirishdan tashqari, ovuldoshlarining ham tomorqalariga zarur koʻchatlarni yetkazib berayotganlar koʻpchilik.

Jami 19 ta issiqxonalarda yetishtirilgan ertagi karam, bulgʻor qalampiri, pomidor, bodring, baqlajon koʻchatlarini ochiq tomorqa yerlarga ekish ishlari boshlanib ketdi.

Hayitboy Yoʻldoshevning 16 sotixlik tomorqasi oilasini sabzavot, poliz mahsulotlari va mevalar bilan taʼminlabgina qolmay, qoʻshimcha daromad ham keltiradi. Uning oila aʼzolari koʻmagida ekkan ertagi piyoz, kartoshkalari unib chiqa boshladi, ertagi karam, qulupnay koʻchatlari rivoji yaxshi. Shuningdek, oʻtgan yilning kuzida ekilgan sarimsoqpiyoz barglari hozir isteʼmolga yarab qoldi.

Izlagan imkon topadi, deydi xalqimiz. Yurtimizga tarqalgan koronavirus  infektsiyasiga qarshi kurash kun sayin avj olib, shifokorlar uchun gʻoyat masʼuliyatli davrlar kechayotgan boʻlsa-da, shifokor Baxtiyor Muxtorov “Har bir oila – tadbirkor” dastur asosida kredit olib tashkil etgan issiqxonasidagi ishlarini ham oʻz holiga tashlab qoʻymadi. Hozir uning issiqxonasida ekilgan bodring, pomidorlar gullab, hosil  tugayotgan boʻlsa, karam, pomidor, bulgʻor qalampiri, qovun, tarvuz, handalak, baqlajon koʻchatlari ochiq maydonga koʻchirib oʻtqazishga tayyor boʻldi. Ovuldoshlari bu koʻchatlarni yaxshi niyatlar bilan sotib olib, tomorqasiga oʻtqazishmoqda. Issiqxonadagi ishlarda turmush oʻrtogʻi Nigora Shukurlayeva, qizi Nasibalar yaqin koʻmakchi.

Farhod Otajonov ham ovuldagi tomorqasini moʻl daromad manbai deya hisoblaydigan, yerning tilini biladigan insonlarning biri.

Uning 16 sotixlik tomorqasidagi  qoʻlbola issiqxonasida hozir rediska yetilib, isteʼmolga yarab qoldi. Ertagi  karam, bulgʻor qalampiri, pomidor, baqlajon koʻchatlarini esa koʻchirib oʻtqazishni boshlab yuborishdi. Shuningdek, olma, uzum, oʻrik, nok kabi daraxtlarning mevasi oilani yoz boʻyi taʼminlabgina qolmay bozorda sotishga ham ortadi.

Shifokorlar koronavirus infektsiyasi keng tarqalib ketmasligi uchun odamlarni iloji boricha uyda boʻlishga, jamoat joylariga borishdan saqlanishga chorlayotgan bir vaqtda toʻlqinliklar yaxshi kunlar umidi bilan tomorqasiga roʻzgʻori uchun zarur boʻladigan sabzavot, poliz ekinlarini ekish va moʻl hosil olish uchun tinmay mehnat qilmoqdalar.

Erta eksang, erta oʻrasan, deydi xalqimiz. Oʻz oilasi ehtiyojidan orttirib, ertagi ekinlar hosili bilan yurtdoshlarmiz dasturxonni toʻkinligiga  ham hissa qoʻshishga intilayotgan barcha dehqonlarga ham mehnatlaringiz barakasini bersin, deb qolamiz.

O.PAJABOVA.