FERMER XOʻJALIKLARI DALALARIDA PAXTA YIGʻIM-TERIMI QIZGʻIN DAVOM ETMOQDA

Mamlakatimizning barcha hududlaridagi kabi shu kunlarda tumanimizda ham paxta yigʻim-terim ishlari qizgʻin tusga kirgan. Terimchilar erta koʻklamdan to shu kunga qadar boʻlgan davr mobaynidagi mashaqqatli mehnat evaziga yetishtirilgan moʻl hosilni ob-havo ochiqligidan unumli foydalangan holda qisqa muddatlarda sifatli yigʻib-terib olishga harakat qilishmoqda.

Joriy yilda tumandagi “Amudaryotex” xorijiy korxonasi paxta-toʻqimachilik klasteri bilan shartnoma tuzgan 348 ta fermer xoʻjaliklarida 13 ming 900 gektar maydonga chigit ekilgan edi. Zamonaviy seyalkalar yordamida yerga qadalgan chigitlar bir tekis unib chiqishiga erishildi. Yoz oylarida agrotexnik tadbirlar oʻz vaqtida bajarilgani natijasida dalalarda moʻl hosil toʻplandi. Rejaga koʻra, bu yilgi mavsumda 44 ming 650 tonnalik sarbaland paxta xirmonini bunyod etish maqsad qilingan boʻlib, terim ishlari qizgʻin davom etmoqda.

Qilichboy ovulidagi Qahramon Saparboyev rahbarlik qilayotgan “Saparboyev Qahramon” fermer xoʻjaligida ham erta bahorda  50 gektar maydonga chigit qadaldi. Xoʻjalikning 22 nafar pudratchisi, tajribali dehqonlari hamjihatlikda fidokorona mehnat qilib, moʻl hosil toʻplashga erishishdi. Mavsum boshidan yigʻim-terim ishlariga 55 nafardan ortiq terimchilar jalb qilindi. Birinchilardan boʻlib paxta yigʻim-terimiga kirishilgan xoʻjalikda 100 tonna paxta topshirish reja qilingan boʻlib, shu paytga qadar 65 tonna hosil yigʻishtirib olindi.

Toryop mahallasidagi Qoʻshmurod Jumatov rahbarlik qilayotgan “Koʻklan Anorgul” fermer xoʻjaligida 74 gektar yerda moʻl hosil yetishtirilgan boʻlsa, paxta maydonlaridan birinchi terimning oʻzidayoq 100 nafarga yaqin terimchilar yordamida 80 tonna paxta hosili yigʻib olindi. Bu yil oʻrtacha hosildorlik gektariga 20 tsentnerni tashkil qildi. Dalalardagi hosil choʻgʻini hisobga olgan fermer xoʻjaligi dehqonlari hosildorlikni 25-30 tsentnerga yetkazish uchun astoydil mehnat qilmoqdalar. Xoʻjalik paxtakorlari har biri kuniga 180-200 kg.gacha paxta terishmoqda.

Barcha xoʻjaliklarda terimchilarga dala boshida bepul tushlik qilib berilmoqda. Oʻz vaqtida berilayotgan issiq tushlik terimchilarning gʻayratiga gʻayrat qoʻshmoqda. Ilgʻorlarning fermer xoʻjaligi tomonidan alohida ragʻbatlantirilayotgani ham terim surʼatini yanada oshirmoqda.

Paxta dalalarida terim ishlari avj pallaga kirgan. Qabul maskanlaridagi xirmonlar koʻkka boʻy choʻzmoqda. Yanada yuksak xirmon barpo etish maqsadida paxta terimini jadallashtirayotgan fermer xoʻjaliklari soni ham kundan kunga ortib bormoqda.

O.Xudoyberganova