TUMANIMIZGA KORONAVIRUS KIRIB KELIShI VA TARQALIShINING OLDINI OLIShGA QARATILGAN ChORALAR KUChAYTIRILMOQDA

Dunyoning 180 dan ziyod mamlakatiga tarqalgan koronavirus kun sayin koʻproq hududlarni qamrab olmoqda. dunyo boʻyicha koronavirusga chalinganlar, ushbu kasallik tufayli olamdan oʻtganlar soni ortib bormoqda. Ammo tuzalayotganlar, kasallikdan talofatsiz chiqayotgan davlatlar ham bor.

Mamlakatimizda ushbu infektsiya yuqtirgan ilk bemor 15-martda aniqlangan boʻlsa, bugunga kelib, koronavirusga chalinganlar soni ancha ortdi. Oʻta yuquvchan bu infektsiyaning keng tarqalib ketishining oldini olish boʻyicha davlatimiz tezkor chora-tadbirlar koʻrmoqda. Karantin holati joriy qilinib, aholidan zarurat boʻlmagan hollarda koʻchaga chiqmaslik, shuningdek vahimaga tushmasdan hamma birgalikda kasallikka qarshi kurashish soʻralmoqda, koʻpgina idora tashkilotlar masofadan turib ishlashga oʻtdi, oziq-ovqat doʻkonlari va dehqon bozorlaridan tashqari barcha savdo shoxobchalari faoliyati toʻxtatildi, 30-martdan boshlab umumiy oʻrta taʼlim maktablari oʻquvchilari uchun televizion darslar oʻtish yoʻlga qoʻyildi, koʻchada tibbiy niqobsiz yurishga qarshi jazo choralari kuchaytirildi.

Mana shunday sharoitda tumanimiz Tibbiyot birlashmasida ham koronavirus infektsiyasining kirib kelishi va tarqalishining oldini olish boʻyicha koʻpgina chora-tadbirlar amalga oshirilmoqda. Bu saʼy-harakatlar joriy yilimizning yanvar oyidan, yaʼni, yurtimizda ushbu kasallik qayd etilmagan vaqtdanoq boshlandi. Bu boʻyicha maʼmuriyatning maxsus ish rejasi tuzilib, unga koʻra, avval shifokorlar, keyin oʻrta tibbiyot xodimlari, sanitarkalar kasallikka qarshi kurashish boʻyicha maxsus oʻqitildi. Malakasi oshirilgan shifokorlar, hamshiralar ishtirokida tumanimizdagi barcha maktabgacha taʼlim tashkilotlarida, maktablarda, ovul va mahallalarda koronavirus infektsiyasini yuqtirib olishdan saqlanish qoidalari targʻib etildi. Shuningdek, tumanimizdan ketib, turli xorijiy davlatlarda boʻlib kelgan mehnat migrantlari uy karantiniga olinib, ulardan hudud shifokori, patronaj hamshiralar, mahalla profilaktika inspektori hamrohligida kuniga ikki mahal xabar olib, sogʻligʻini muntazam nazorat qilib borish yoʻlga qoʻyildi.

Shu kungacha tuman Tibbiyot birlashmasi, koʻptarmoqli markaziy poliklinika, qishloq oilaviy poliklinikalari va qishloq vrachlik punktlari shifokorlari va oʻrta tibbiyot xodimlari uchun 25-marta koronavirus etiologiyasi, klinikasi va profilaktikasi boʻyicha seminarlar oʻtkazildi.

Tibbiyotda kasallikni davolagandan koʻra, oldini olgan afzal degan qoida bor. Bugungi kunda tibbiyot xodimlari tumanimizga koronavirus infektsiyasi kirib kelishining oldini olish borasida targʻibot ishlarini olib borishayapti. Koʻchalarga, korxona, tashkilotlar binolariga ushbu infektsiyani yuqtirib olishdan saqlanish qoidalari aks ettirilgan plakatlar osildi.

Koʻrilayotgan buningdek choralar xotirjamlikka aslo asos boʻlolmaydi. Tuman tibbiyot birlashmasida agar kasallik qayd etilsa, bemorni darhol izolyatsiyaga olish va tezkor davo muoloajalarini boshlash uchun yuqumli kasalliklar shifoxonasida maxsus xonalar va dori-darmonlar zahirasi tayyorlab qoʻyildi.

Amalga oshirilayotgan buningdek saʼy-harakatlar xalqimizning sogʻligʻini saqlashga, ularni oʻta yuqumli kasallik – koronavirusdan himoya qilishga qaratilganligi bilan ahamiyatlidir.

O.RAJABOVA.