Uyda qoling

“Saqlanganni saqlar” – derlar,
Ushbu gapni esga oling.
Pandemiya tugaguncha
Uyda qoling, uyda qoling.

Eʼtiborsiz boʻlsak biz ham,
Dard koʻpayib borar kam-kam.
Boshdan oshsa xavfdir suv ham,
Uyda qoling, uyda qoling.

Ming shukurki ular borlar –
Omon boʻlsin shifokorlar.
Chin yurakdan uqtirarlar:
– Uyda qoling, uyda qoling!

Olaversak koʻchaga yoʻl,
Baʼzilarga bu kelar qoʻl,
Vijdonsizlar topar pul moʻl,
Uyda qoling, uyda qoling.

Oʻylab koʻrsak, balki hiyla,
Tabiatdan bu bir hiyla –
Butun boʻlsin har oila,
Uyda qoling, uyda qoling.

Oʻngga yursa koʻplar, birov
Chap yoqqa ham kirdi birrov,
Balki bular shunga toʻlov,
Uyda qoling, uyda qoling.

Posbonlarga qilmay jabr,
Birozgina qilsak sabr,
Bu hammasi tugar oxir,
Uyda qoling, uyda qoling.

Toza boʻlsa qalbda imon,
Alloh berar bizga imkon,
Barimiz boʻlgaymiz omon,
Uyda qoling, uyda qoling.

Ahmad NAFASOV.