TOʻYDA ChIQQAN JANJAL JINOYaTGA SABAB BOʻLDI

Qarindoshining toʻyiga kelgan Ikrom (ismlar oʻzgartirilgan) avjiga chiqqan oʻyin-kulgi, xursandchilikka qoʻshildi. Davraga chiqib, zavq bilan raqsga tushayotgan yaqinlari orasiga kirdi. Ayni qoʻshiqqa berilib oʻyin tushayotganida kimdir turtib yubordi. Kayfi oshgan togʻasi Javlon ekanligini koʻrib, eʼtibor bermasdan raqsni davom ettirayotganida bu yana takrorlandi. Jahli chiqqan Ikrom koʻpchilikning orasida boʻlishiga qaramasdan, Javlon bilan janjallashdi va kuchini koʻrsatib qoʻyish uchun unga bir musht tushirdi. Musht zarbidan yerga qulagan Javlon hushidan ketdi.

Shifoxonada oʻziga kelgan Javlonga bosh miyaning yopiq jarohati, oʻng yarimshari gematomasi, qattiq parda usti epidural va qattik parda osti subdural gematomasi va qonning singishi, boshning chap chekka asosiy suyagi chiziqli sinishi, chap chekka boʻlimi teri osti gematomasi ham yumshoq toʻqimasining lat yeyishi, dislokatsion sindrom, toʻrli parda ostiga qon quyilishi, oʻng taraflama gemiparezi, oʻng bilak teri sohasi qirilishi kabi jarohatlarda ifodalangan hayot uchun xavfli boʻlgan ogʻir  shikast yetkazilganligi aniqlandi.

Qarindoshiga shu darajada ogʻir shikast yetkazgan Ikrom oʻylamasdan qilgan harakati tufayli Oʻzbekiston Respublikasi JKning 104-moddasi 2-qismi “ye” bandida koʻrsatilgan jinoyatni sodir  qilganlikda ayblandi va bu ish sudda koʻrib chiqilib, jabrlanuvchi kechirganligi, moddiy zararni qoplaganligi sababli harakatdan toʻxtatildi.

Toʻyda janjal chiqarib, bir insonning sogʻligi yomonlashishiga sababchi boʻlgan Ikrom qilmishidan pushaymon boʻldi.

Umida Orazboyeva, Nukus shahar IIO FMB IIB  huzuridagi Tergov guruhi tergovchisi.