QUYoSh PORLAGAN UYDA

Tibbiyot ilmining dahosi, buyuk alloma Abu Ali Ibn Sinoning “Quyosh kirmagan uyga kasallik kiradi”, – degan mashhur gapi bor. Yaʼni, bu biz yashayotgan uyimizning eshik va derazalarini tez-tez ochib, uning havosini tozalab, yangilab turmasak, yorugʻlik va quyosh nuridan unumli foydalanmasak, xonadondagi kichik bakteriyalar jonlanib, koʻpayadi va shu uyda yashovchilarning sogʻligiga taʼsir qiladi. Agar bu hikmatni maʼnaviyat quyoshi boʻlmish kitobga nisbatan qoʻllasak-chi? Adabiyot, maʼrifat ahli hamisha kitobni oftobga oʻxshatishgan va buyuk allomaning soʻzlarini “Kitob kirmagan uyga maʼrifatsizlik, zulmat kiradi”, deb ifodalashgan.

Haqiqatdan ham, kitob kirmagan, oʻqilmaydigan uyda fikrlar sayoz, dunyoqarash tor, muammolar koʻp va yechimsiz boʻladi. Bunday xonadonlarning katta-yu kichigida mustaqil fikr boʻlmaydi. Kim qayoqqa yetaklasa, ketaveradi, turli maʼnaviy tahdidlarga duchor boʻladi. Ularni yoʻldan ozdirish oson kechadi. Sababi, bunday oilalarda yorugʻlik, nur yoʻq, qalblar esa qattiq boʻladi. Aksincha, kitob, gazeta va jurnallarga oshno oilalarda, toza havo, sogʻlom muhit hukmron. Kitob oilaga nur boʻlib, oftob boʻlib kirib keladi. Qalblarni eritadi, koʻngillarga ezgulik urugʻini sochadi, bilimingizni boyitib, dunyoqarashingizni kengaytiradi. Kitob kirgan va oʻqilayotgan xonadondagi bolalarning koʻngli oq, dili pok boʻlib ulgʻayadi, kelajakka teran nigoh bilan boqadi. Hayoti davomida paydo boʻladigan savollarga aql-zakovat bilan javob topadi, vaziyatni toʻgʻri baholay oladi. Kitob – oddiy tasavvurimizni moʻʼjizaga aylantiradi.

Yildan-yilga yuksalib, chiroy ochib, qaddini tiklab borayotgan ona Vatanimizga kitob oʻqiydigan, sogʻlom fikrlaydigan, sogʻlom ruhiyatli bolalar, yoshlar kerak. Shunday ekan, aziz tengdoshlar, yaxshi kitoblar doimo hamrohingiz boʻlsin, xonadoningiz hamisha oftobning, dilingiz esa kitobning zarrin nurlaridan yorishib, porlab tursin.

Nodira JOʻLLIBOYeVA.