“QUVNOQ STARTLAR” MUSOBAQASI BARChAGA QUVNOQLIK BAXSh ETDI

Prezidentimiz Shavkat Mirziyoyev tomonidan ilgari surilgan 5 ta muhim tashabbus ijrosi, mana bir  yildirki, yoshlar hayotidan muhim oʻrin egallab kelmoqda. Xususan, ularning boʻsh vaqtlarini mazmunli oʻtkazishlarini taʼminlash, sport inshootlaridan samarali foydalangan holda sportga keng jalb etish, turli sport musobaqalarini tashkil etish orqali yanada koʻproq yosh sportchilar kashf etilib, iqtidorlilar safi kengaymoqda.

Tumanimizda ham 5 ta muhim tashabbusning yoshlar hayotida oʻz samarasini berishini taʼminlash maqsadida turli tadbirlar tashkil qilinmoqda. Bu borada amalga oshirilayotgan ishlarning butun  mazmun-mohiyati sogʻlom turmush tarzini qaror toptirish orqali oʻsib kelayotgan yosh avlodni jismonan baquvvat, maʼnan yetuk insonlar sifatida  tarbiyalashdan iboratdir.

Tumanimizdagi 65-sonli umumtaʼlim maktabida 5 ta muhim tashabbus doirasida Oʻzbekiston Respublikasi Xalq taʼlimi Vazirligining 2020-yil 13-fevraldagi 47-sonli buyrugʻi asosida “Har bir kunimiz sport bilan!” shiori ostida oʻtkazilgan “Quvnoq startlar” sport musobaqalari ham yoshlar oʻrtasida sogʻlom turmush tarzini qaror toptirish, ularni sportga jalb qilgan holda boʻsh vaqtlarini mazmunli oʻtkazishga qaratilgani bilan muhim ahamiyat kasb etdi.

 Bahor bayramlari arafasida boʻlib oʻtgan musobaqalarni maktabning jismoniy tarbiya fani oʻqituvchisi Sanjar Oʻrozboyev tashkillashtirdi. Musobaqa uchun maktabning 6-9-sinflar oʻquvchilari orasidan teng asosda 12 nafar oʻgʻil va 12 nafar qiz bolalar saralab olinib, “Shunqorlar” va “Chaqqonlar” jamoalari tuzildi. Jamoalar oʻzaro boʻlib oʻtadigan  epchillik va kuchlilik bahslariga puxta hozirlik koʻrishdi.

Musobaqaning shaffof oʻtishini taʼminlash maqsadida oʻquvchilarning ota-onalari, “Daryo boʻyi” mahallasi aholi vakillari tomoshabin sifatida ishtirok etishdi. Musobaqa davomida 6 ta shart boʻyicha oʻzlarining epchilliklarini, zehnli hamda kuchliligini namoyish etib bellashgan jamoa aʼzolarining har bir harakatini tomoshabinlar alohida eʼtirof etdilar va olqishlari bilan ruhlantirib turdilar.

Toʻsiqlarni aylanib oʻtish, toʻsiqlar tagidan toʻsiqni yiqitmay emaklab oʻtish, koptokni yanglishmay manzilga yetkazish kabi turli xil qiziqarli oʻyinlarni har ikkala jamoa aʼzolari mahorat bilan bajardilar. Ikkala jamoaning aʼzolari ham bir-biriga samimiy munosabatda boʻlib, musobaqaning  qiziqarli bahslarga boy tarzda oʻtishi uchun sharoit yaratib bergan ustozlaridan minnatdor boʻlishdi. Chunki musobaqa oʻtkazilgan joyda  oʻquvchilar har bir shartni, bemalol bajarishlari uchun sport anjomlarining yetarli boʻlganligi muhim ahamiyatga ega boʻldi.

Qizgʻin bellashuvlar, bahslar asosida oʻtgan “Quvnoq startlar” musobaqasi haqiqatdan ham barchaga quvnoqlik bagʻishladi. Ota-onalar oʻz farzandlarining epchilliklarini va tirishqoqliklarini, marra sari dadil intilishlarini koʻrib, juda mamnun boʻldilar.

Musobaqa yakunida har ikkala jamoa aʼzolari maktab maʼmuriyati tomonidan munosib taqdirlandilar.

R.YOʻLDOShEVA.