Muhammad Yusuf tavalludining 60-yilligi oldidan

Zomin maktabi bugungi davr adabiyotiga shiddat va ishtiyoq bilan kirib kelayotgan har bir yosh ijodkorga keng imkoniyatlar eshigini ochib bermoqda. Qancha isteʼdodlarni yangidan kashf etmoqda. Yildan-yilga bu maktab vakillari soni ortib, ijodiy ishlari samarasi yuzaga chiqmoqda.

Talabalik yillarimda, 1999-yil avgust oyida Zomin togʻlari bagʻridagi Oʻriklisoy oʻquv va dam olish maskanida boʻlib oʻtgan yosh ijodkorlarning 3-anʼanaviy anjumanida qatnashib, buning guvohi boʻlganman. Koʻpgina yetuk shoir va yozuvchilar nazarida boʻldik. Jumaniyoz Jabborov, Usmon Qoʻchqor, Umida Abduazimova, Sayyora Toʻychiyeva, Sharofat Botirova, Muhammad Yusuf, Erpoʻlat Baxt, Muzaffar Ahmad, Zebo Mirzayevalar bilan boʻlgan iliq suhbat va uchrashuvlar unutilmas lahzalarni taqdim etdi.

Qoraqalpogʻiston Yozuvchilar uyushmasi yoʻllanmasi bilan Ajiniyoz nomidagi NDPI oʻqituvchisi Perdagʻaliy Dabilov, jurnalist Bahamdulloh Nurabullayev va men ham Zomin buloqlari, sharqiroq sharsharalarini oʻz koʻzimiz bilan koʻrish baxtiga muyassar boʻldik.

Oʻshanda "mangʻitlik shoira qizim bor ekan”, deb biz turgan sektsiyaga meni izlab kelgan yozuvchi va tarjimon eldoshimiz Muzaffar Ahmadni tanimaganimdan rosa xijolat boʻlganman. Ayniqsa, Muhammad Yusufning: "Qoraqalpoq shoirlarini oʻzim tahlil qilaman”, degani bizni hayajonga solgani hanuz koʻz oldimda.

Jildiragan soy ustiga joylashgan supada jilgʻalar qoʻshigʻini tinglab, dam olayotgan Muhammad Yusuf va Muzaffar Ahmadlar oldida tahlilda boʻldik. Qoraqalpoqcha oʻqilgan sheʼrlarni ixlos bilan tinglagan Muhammad Yusuf: "qoraqalpoq sheʼriyati menga huzur bagʻishlaydi. Qoʻshiqlari esa raqsi bilan uygʻun. Sheʼriyati millat ruhiyati bilan hamohang, 70-yillar yoshlari madhiga aylangan "Oydinlar” qoʻshigʻini, keling birga xirgoyi qilamiz”, degan taklifi ruhimizni koʻtardi. Perdegʻaliy hamda Bahamdulloh ogʻalar xirgoyi qilib boshlagach, Muhammad Yusuf ham joʻr boʻla boshladi. Shoir berilib xirgoyi qilardi. Xuddi Orol oydinlarida sayr qilib yurganday, goʻyo oʻzi ham qoraqalpoqning bir aziz bolasiday "Oydinlar"ga joʻr boʻlib, uning sehri bilan tebranardi. Afsuski, men bu qoʻshiqni bilmasdim. Buni sezgan rahmatlik shoirning:

- Siz-chi?! – degan savolini javobsiz qoldirdim. Shu paytdagi uyalganim shu darajaga borib yetdi-ki, oʻqishimga qaytgach, aynan qoraqalpoqcha sheʼr, qoʻshiq, folklor janriga jiddiy eʼtibor qarata boshladim. 2000-yillarning (2003-2004) boshlarida "Surxon” guruhi yakkaxoni Mahmud Namozov teleradio orqali bu qoʻshiqni yuksak ohanglarda ijro qilib chiqdi. Endilikda qoraqalpoq tiliga mehrim qattiq bogʻlandi. Menimcha Muhammad Yusuf mening qalbimga oʻz yurtimga boʻlgan samimiyat, diqqat, hurmat, sadoqat kabi xislatlarni chuqurroq joyladi.

Zominda "koʻz ochgan buloqlar” - fargʻonalik Yongʻin Mirzo, buxorolik Maqsud Asad, samarqandlik Guljamol Asqarova (Zulfiya nomidagi Davlat mukofoti sovrindori), Sevbora Latipova, andijonlik Nilufar Vohid, samarqandlik Gulshan Ermatova, oʻz XDP yetakchilaridan shoir Shuhrat Oriflarni bugungi yoshlar ovozi sifatida, ozod koʻngil kuychilari sifatida tinglayapmiz.

Adabiyotimizning bugungi, ertangi kuni haqida qaygʻuradigan rahmatlik Muhammad Yusuf kabi jonfidolar umri uzoq boʻlishini tilardim.

Sharofat XOLMURODOVA,

32-sonli maktabning qoraqalpoq tili va adabiyoti fani oʻqituvchisi.