NAVROʻZ ChORLOVI

Yomgʻir yogʻib oʻtgan bogʻlarda, qarang,

Kurtaklar marjonday tizilib qoldi.

Amu qirgʻoqlari ajib maysarang,

Yerning uygʻongani sezilib qoldi.

Yomgʻirdan suv ichgan maysalar xurram,

Lahzalar qadridan soʻzlayotir - chin.

Sabolar bazmidan rang olgan ayyom -

Navroʻz ogʻushida uygʻondi Ochun!

Azizim, koʻrdingmi, sevinchdan porlab,

Etagin toʻldirib koʻk terdi bola.

Tumshugʻida loyni tutgancha yo Rab,

Qaldirgʻoch in qurdi shu bugun! Tongda!

Daryo toʻlqinlari dillarga koʻchdi,

Davralar kengligin qara, ajoyib!

Samoda qushlar ham juftlashib uchdi,

Chamanlar ishqida qanotin yoyib!

Moziy ertaklari aytildi bir-bir,

Kuy chaldi mugʻanniy ertakdagiday...

Sen ham davraga kel. Kelsang-chi axir,

Gullashga oshiqqan gul kurtagiday!

Ana! Sumalakning chorlovi keldi,

Alyorlar yangradi qadim Turonda.

Arshi aʼlolardan xush havo keldi,

Bahorlar boshlandi Oʻzbekistonda!

Robiya.