Eng qadimiy, asl milliy bayram

Ona zamin uzra quyoshning zarrin nurlari oʻlkamizga va qalbimizga iliqlik baxsh etib, yurtimizga Navroʻz tashrif buyurmoqda. Bu bayram barchamiz uchun sharqona yangi yil debochasi, maʼnaviyatimizning uzviy qismiga aylanib ketgan eng qadimiy, asl milliy bayram sifatida aziz va moʻʼtabardir.

Bir necha ming yillardan beri nishonlanib kelinayotgan ushbu bayramda mehr-muruvvat, vatanparvarlik, mehnatsevarlik kabi insoniy tuygʻular, inson va tabiat oʻrtasidagi uygʻunlik, dehqonchilik mavsumining boshlanishi oʻz ifodasini topgan. Shuning uchun ham asrlar osha bu bayram boqiy qadriyat, milliy marosim sifatida yashab kelmoqda. Zero, Prezidentimizning «Yuksak maʼnaviyat — yengilmas kuch» asarida qayd etilganidek, «Navroʻz bayrami biz uchun hayot abadiyligi, tabiatning ustuvor qudrati va cheksiz saxovatining, koʻp ming yillik milliy qiyofamiz, olijanob urf-odatlarimizning betakror ifodasidir».

Xalqimizning sevimli bayramlaridan biri boʻlgan Navroʻz nafaqat tabiat, balki inson qalbining ham uygʻonish, yangilanish faslidir. Shu sababli «Obodlik koʻngildan boshlanadi», degan hikmatli ibora bugun xalqimiz hayotining, bunyodkorlik va obodonlashtirish ishlarining muhim mezoniga aylandi. Navroʻz nafasi sezilishi bilan joylarda obodonlashtirish va koʻkalamzorlashtirish, ekin-tikin ishlari avjiga chiqmoqda. Hovli, koʻcha va xiyobonlarni saranjom-sarishta qilish, koʻchat oʻtqazish kabi xayrli ishlar amalga oshirilmoqda. Sanoqli kunlardan keyin bobodehqonlarimiz yaxshi niyatlar bilan yerga urugʻ qadab, el rizqi moʻl boʻlishini tilab, duolar qilishadi. Bularning bari ming yillardan beri takrorlanib kelayotgan, xalqimizning maʼnaviyatiga singib ketgan azaliy va abadiy udumlardir. Zero, bahor kirib, Navroʻzi olam tashrif buyurgach, tabiat gullashga oshiqqani kabi odamzot ham yashashga, yashnatishga intiladi.

Yaqindagina xalqimizning eng ezgu maʼnaviy merosi – Navroʻz bilan bogʻliq mehnat bayrami – umumxalq hashari oʻtkazildi. Fidoyi va mehnatkash xalqimizni yanada jipslashtirib, oʻzaro doʻstlik, birodarlik, millatlararo totuvlik tamoyillariga munosib ravishda mehr-oqibat timsoliga aylangan ushbu umumxalq hasharidan soʻng nafaqat koʻngillar, balki har bir qarich yer obod boʻldi. Mahalla guzarlari, koʻcha va bogʻ-rogʻlar mehnat bayrami shavqidan yashnab ketdi. Navroʻz bayramining eng eʼzozli udumlaridan biri boʻlgan umumxalq xayriya hasharidan tushadigan mablagʻ esa butun mamlakatimizda, shu jumladan tumanimizda istiqomat qilayotgan kam taʼminlangan, ehtiyojmand, boquvchisini yoʻqotgan oilalar, nogironlar uchun moddiy farovonlik yaratish imkonini beradi. Bu – oʻzaro mehr-oqibatning, muruvvatning timsoli. Bu – xalqning eng ezgu orzu-umidlarini oʻzida mujassam etgan betakror mazmun, betakror mohiyat!

Hayotimizni bezab turgan Navroʻz bilan bogʻliq eng goʻzal mohiyat – yerga urugʻ qadash marosimi! Navroʻz kirishi bilan bundan necha ming yillar avval ham ota-bobolarimiz "Qoʻsh chiqarish”, "Qoʻsh haydash”, "Urugʻ sochish” kabi dehqonchilik ishi bilan bogʻliq marosimlarni oʻtkazganlar. Endilikda, zamonlar oʻtishi bilan bu  marosimlar chigit ekish, dehqonchilik fasli kabi mehnat bayramlariga aylandi. Bu marosimlarning barchasi Navroʻzi olamdan boshlanuvchi xalqimizni rizq-roʻz, qut-baraka tomon eltuvchi yoʻllardir.

Tumanimizning har bir ovulida, mahallasida, har bitta xonadonida allaqachon Navroʻz tantanalari boshlanib ketdi. Koʻngillarni quchgan ezgu tilaklar bilan ota oʻz farzandlari, farzandlar esa oʻzlari uchun bogʻ yaratmoqqa kirishdilar. Bu ajib tadorik dillarimizga xushnudlik va xotirjamlik baxsh etadi. Har birimizning oʻz bogʻimiz, oʻz daraxtimiz, oʻz gulzorimiz barq urib gullaydi. Bunday gullamoq hayotimizga fayz, turmushimizga obodlik boshlab keladi. Qutlugʻ Amu zaminini yashnatgan bogʻlar ertangi kunga – kelajakka ajib tarovat baxsh etadi.

Bu galgi Navroʻzni "Sogʻlom bola yili”da qarshi olamiz. Bunda ham oʻzgacha maʼno mujassam. Negaki, Navroʻz "Yangi kun” degan maʼnoni bildirsa, sogʻlom farzandlar ertangi kunimiz egalari, oilaning bebaho baxti va  yurtimiz kelajagidir.

Aziz yurtdoshlar! Ulugʻ va bebaho maʼnaviy qadriyatlarimiz gultoji – Navroʻzi olam barchangizga qutlugʻ boʻlsin! Har biringizning xonadoningizga Navroʻzga monand goʻzalliklar, nafosat, baxtiyorlik va shodlik tashrif buyursin!

Navroʻzi olam muborak, azizlar!

Rajabboy YOʻLDOShEV,

tuman hokimi.