Futbol fidoiysi Madrahim Rahimov tavalludining 70-yilligiga bagʻishlangan musobaqa oʻtkazildi

Mamlakatimizda amalga oshirilayotgan islohotlar zamirida xalqning turmush tarzini yaxshilash, maʼnan va jismonan sogʻlom muhit yaratish, salomatlikni mustahkamlash gʻoyasi yotibdi.

Shu bois ayni paytda jismoniy tarbiya va sportga eʼtibor davlat ahamiyatiga molik muhim ijtimoiy-siyosiy vazifaga aylangan. Sport nafaqat jismoniy va maʼnaviy sogʻlomlik asosi, balki hayotga katta umid bilan kirib kelayotgan yoshlarni turli zararli yot gʻoya va odatlardan asrash, ularga oʻz qobiliyati va isteʼdodlarini toʻla ruyobga chiqarish vositasi hamdir.

9-noyabr kuni Amudaryo tumani Navoiy mahallasida joylashgan futbol maydonchasida 38-sonli maktabning jismoniy tarbiya fani oʻqituvchisi Azamat Rahimov, tuman jismoniy tarbiya va sport boʻlimi boshligʻi Jasur Yaxshimov va xalq taʼlimi boʻlimi metodisti Nurbek Abdullayevlar tashabbusi bilan tumanimizda ancha yillar davomida oʻquvchilarga futbol boʻyicha murabbiylik qilgan faxriy trener Madrahim Rahimov tavalludining 70-yillik yubileyi munosabati bilan shahar maktablari oʻquvchilari oʻrtasida futbol musobaqasi oʻtkazildi.

38-sonli maktabning jismoniy tarbiya fani oʻqituvchisi Faxriddin Kamolov, maʼnaviy-maʼrifiy ishlar boʻyicha direktor oʻrinbosari Rustam Hamrayev, tuman xalq taʼlimi boʻlimi metodisti Nurbek Abdullayevlar hakamlik qilgan mazkur musobaqada Mangʻit shahridagi 9 ta maktab jamoalari ishtirok etishdi.

Musobaqa davomida 38-sonli maktabning musiqa fani oʻqituvchisi Ozoda Ahmedova rahbarligidagi raqs guruhi oʻquvchilari tomonidan badiiy chiqishlar qilinib, bolalar kuy-qoʻshiqlar va raqslar ijro etishdi.

Tadbirni tuman jismoniy tarbiya va sport boʻlimi boshligʻi Jasur Yaxshimov ochib berdi. Soʻzga chiqqanlar Madrahim Rahimovni tabarruk 70 yoshi bilan muborakbod etar ekan, yoshlarni sport bilan muntazam shugʻullanishga chaqirib, bu sohada Yurtimizda yoshlarga berilayotgan imkoniyatlar haqida toʻxtalib oʻtishdi.

Madrahim Rahimov 1949-yilda tugʻilgan. 1975-yilda Toshkent politexnika institutining qishloq qurilishi  fakultetini  tamomlagan.  Sportga, ayniqsa futbolga boʻlgan mehri uning butun hayoti mazmuniga aylangan. 1981-yilda sobiq sovet ittifoqi davrida oʻsha paytdagi eng nufuzli  musobaqalardan biri boʻlgan “Oltin boshoq” futbol musobaqasida faxrli 3-oʻrinni egallagan. Ancha yillar davomida tuman bolalar va oʻsmirlar sport maktabida futbol boʻyicha yoshlarga murabbiylik qilgan. Oʻquvchi-shogirdlari bilan birgalikda 2016-yilda Nukus shahrida oʻtkazilgan Qorqalpogʻiston bolalar ligasida 20 ta jamoa ichida faxrli 2-oʻrinni egallagan. Madrahim Rahimov tuman miqyosida oʻtkaziladigan koʻplab futbol musobaqalarida hakamlik qilib keladi. U oʻzi istiqomat qilayotgan koʻchada bolalarning erkin futbol oʻynashlari, ularning futbolga boʻlgan qiziqishlarini qoʻllab-quvvatlash va mashgʻulotlar olib borishlari uchun oʻz hisobidan futbol maydonchasi qurdirgan.

Otaxon 70 yoshga chiqqan boʻlsalarda, hali ham yoshlardek, kuch-gʻayrat va shijoatga toʻla. Uning maqsadi tumanimizda kuchli futbolchilarni yetishtirish va yoshlarning futbolga boʻlgan ishtiyoqini yanada kuchaytirishdir.

Musobaqa yakuniga koʻra, 36-sonli maktab jamoasi birinchi, 38-sonli maktab jamoasi ikkinchi, 30-sonli maktab jamoasi 3-oʻrinni egallashdi. Gʻolib jamoalar tadbir tashkilotchisi Azamat Rahimov tomonidan diplom hamda esdalik sovgʻalari bilan taqdirlandi.

Iroda Erdosheva,
Jamoatchi muxbir.