Futbol qalblarni birlashtirdi

Bu yil Oʻzbekiston sporti, xususan, futbol tarixida oltin harflar bilan bitiladigan unutilmas yil boʻlib qolmoqda. Mamlakatimiz milliy terma jamoasining futbol boʻyicha Jahon chempionatidagi ishtiroki millionlab yurtdoshlarimiz qalbida cheksiz faxr va gʻurur tuygʻularini uygʻotmoqda.

23-iyun kuni boʻlib oʻtgan Oʻzbekiston – Portugaliya uchrashuvi ana shunday tarixiy voqealardan biri sifatida futbol muxlislari yodida muhrlanib qoldi. Dunyoning eng kuchli jamoalaridan biri sanalgan Portugaliya terma jamoasiga qarshi kechgan bahs nafaqat sport musobaqasi, balki xalqimizning futbolga boʻlgan mehr-muhabbati, birdamligi va Vatanga sadoqatini namoyon etgan ulkan voqea boʻldi.

Mazkur tarixiy uchrashuvni katta ekranda birgalikda tomosha qilish hamda milliy terma jamoamizni qoʻllab-quvvatlash maqsadida Amudaryo tumani Vaxum aholi punktidagi bolalar oʻyingohida ommaviy tomosha tadbiri tashkil etildi. Kechki soat 22:00 dan boshlab yuzlab futbol ishqibozlari, yoshlar, nuroniylar va keng jamoatchilik vakillari ushbu maskanga jam boʻlib, futbol bayramining bevosita ishtirokchisiga aylandilar. 

Ommaviy tomoshada Amudaryo tumani hokimi Sobir Xoʻjametov boshchiligida tuman rahbarlari ham ishtirok etib, xalq bilan bir safda milliy terma jamoamizga muxlislik qildilar. Bu esa sportning insonlarni birlashtiruvchi kuchini, xalq va rahbarlar oʻrtasidagi hamjihatlik hamda birdamlik muhitini yana bir bor namoyon etdi. Ayniqsa, yoshlarning faol ishtiroki, Vatan bayrogʻini baland koʻtarib, terma jamoamizni qoʻllab-quvvatlagani tadbirga oʻzgacha ruh va koʻtarinkilik bagʻishladi.

Futbol uchrashuvidan avval koʻtarinki ruhda kontsert tadbiri tashkil qilindi. Amudaryo tumani Madaniyat boʻlimi xonandalari ishtirokida tashkil etilgan kontsert dasturi tomoshabinlarga bayramona kayfiyat ulashdi. Vatan, doʻstlik va yoshlar haqidagi kuy-qoʻshiqlar yigʻilganlar tomonidan iliq kutib olinib, maydonda haqiqiy bayram muhiti hukm surdi.

Bolalar oʻyingohida haqiqiy futbol muhiti yaratildi. Maydon milliy bayroqlar, vatanparvarlik ruhidagi shiorlar va muxlislarning joʻshqin hayqiriqlari bilan yanada fayz oldi. Oʻyin davomida amudaryolik futbol ixlosmandlari milliy terma jamoamizni soʻnggi daqiqalargacha bir ovozdan qoʻllab-quvvatlab, yurtimiz futbolchilariga boʻlgan ishonch va sadoqatini namoyon etdilar. Har bir xavfli vaziyat, har bir hujum va har bir muvaffaqiyatli harakat katta hayajon bilan kutib olinib, tomoshabinlarning olqishlariga sabab boʻldi.

Mazkur futbol oqshomi nafaqat sport musobaqasini tomosha qilish, balki milliy gʻurur, vatanparvarlik va birdamlik tuygʻularini yanada mustahkamlagan unutilmas voqea sifatida amudaryoliklar xotirasida muhrlanib qoldi.

Bunday ommaviy tomoshalar nafaqat sportga boʻlgan qiziqishni oshirish, balki aholi oʻrtasida birdamlik va hamjihatlik muhitini mustahkamlashga ham xizmat qiladi. Futbol atrofida birlashgan yurtdoshlarimiz qalbida Vatanga muhabbat, milliy gʻurur va yurt ravnaqi uchun daxldorlik tuygʻulari yanada mustahkamlandi.

Portugaliya terma jamoasiga qarshi uchrashuv 5:0 hisobida hamyurtlarimizning magʻlubiyati bilan yakunlangan boʻlsa-da, bu natija maydondagi kurashning asl mazmunini toʻliq aks ettira olmaydi. Dunyoning eng kuchli jamoalaridan biriga qarshi bahs olib borgan futbolchilarimiz oʻyin davomida bor kuch-gʻayrati, mahorati va matonatini namoyon etib, soʻnggi daqiqagacha kurash olib bordilar. Har bir futbolchimiz maydonda Vatan sharafini munosib himoya qilish uchun jon-jahdi bilan harakat qilgani, ularning gʻalabaga boʻlgan intilishi va fidoyiligi har bir yurtdoshimiz qalbidan chuqur joy oldi.

Muxlislar ham natijadan qatʼi nazar, milliy terma jamoamizni olqishlab, ularga boʻlgan ishonch va qoʻllab-quvvatlovlarini namoyon etdilar. Chunki bugungi Oʻzbekiston terma jamoasi jahon futbolining eng nufuzli musobaqasida ishtirok etayotgan, xalqimiz orzu qilgan tarixiy yutuqqa erishgan jamoa sifatida barchamizning faxrimizdir. Muhimi, futbolchilarimiz maydonda taslim boʻlmadilar, kurashdilar, tajriba orttirdilar va kelgusi uchrashuvlar uchun muhim saboqlar chiqardilar.

Charos Arslonova, tuman hokimligining Axborot xizmati rahbari.