Mini futbol boʻyicha DXX kubogi musobaqalarining tuman bosqichiga start berildi

Jamiyatning har tomonlama rivojlanishi uchun yosh avlodning sogʻlom va jismonan barkamol boʻlib ulgʻayishi muhim ahamiyat kasb etadi. Shu boisdan sport va jismoniy tarbiyani keng targʻib qilish, ayniqsa, oʻsib kelayotgan yoshlarni ushbu sohalarga jalb etish dolzarb masalaga aylangan. Zero, yoshlarni sport va jismoniy tarbiyaga jalb qilish – sogʻlom jamiyat poydevoridir.

Shu maqsadda ayni kunlarda butun mamlakatimiz boʻylab anʼanaviy “Davlat xavfsizlik xizmati kubogi” sport musobaqalarining hududiy bosqichlari oʻtkazilmoqda.  

8-aprel kuni Amudaryo tumanidagi 40-sonli umumtaʼlim maktabining sunʼiy qoplamali sport maydonchasida bu yilgi mazkur musobaqalarning tuman bosqichiga start berildi.

Ochilish marosimida tuman hokimi Sobir Xoʻjametov soʻzga chiqib, tumanimiz yoshlarining ushbu bellashuvlarda ishtirok etishga boʻlgan qiziqishlari tobora ortib borayotgani, sport musobaqalarining yosh avlodni har tomonlama yetuk, barkamol qilib tarbiyalashdagi oʻrni va ahamiyati toʻxtalib oʻtdi. Tuman hokimi oʻz nutqida amudaryolik yoshlar ushbu musobaqalarda respublikada eng peshqadamlar safida ishtirok etib kelayotgani xususida soʻz yuritib, yoshlarga bu yilgi bellashuvlarda ham omad va zafarlar tiladi hamda ularning Oʻzbekiston miqyosida chempionlikni qoʻlga kiritishlariga ishonch bildirdi.

Shuningdek, tadbirda soʻzga chiqqan masʼullar oʻsmir yigit-qizlarimiz “Davlat xavfsizlik xizmati kubogi” musobaqalarida Qoraqalpogʻiston miqyosida chempionlikni qoʻlga kiritib, Oʻzbekiston bosqichida munosib ishtirok etib kelayotganini alohida eʼtirof etdilar.

Shundan keyin tumanimizdagi 49 ta ovul va mahallalaridan kelgan oʻsmir yigit-qizlardan iborat jamoalar oʻrtasida sportning mini futbol turi boʻyicha “Davlat xavfsizlik xizmati kubogi” musobaqalariga start berilib, qizgʻin bahslar boshlab yuborildi.

Ilk uchrashuv Beshtom va Daryo boʻyi mahallasining oʻgʻil bolalar jamoalari oʻrtasida boʻldi. Oʻsmir qizlar oʻrtasidagi ilk bahsda esa Xolimbeg hamda Oq oltin ovuli jamolari oʻzaro bellashdilar.

Taʼkidlash kerakki, sport salomatlik va tarbiyaning asosidir. Sport nafaqat inson salomatligini mustahkamlashda, balki intizomli, sabrli va maqsadga intiluvchan shaxsni shakllantirishda ham muhim vositadir. Yoshligidan sport bilan shugʻullangan farzand jismoniy va maʼnaviy barkamol boʻlib voyaga yetadi. Sport yoshlarga oʻz vaqtini toʻgʻri taqsimlashga, zararli odatlardan yiroq boʻlishga va hayotda faol pozitsiyani egallashga yordam beradi.

Mamlakatimizda yoshlarni sportga faol jalb qilish maqsadida taʼlim muassasalarida sport toʻgaraklari tashkil qilinib, muassasalarning infratuzilmasi rivojlantirilmoqda. Futbol, voleybol, kurash, suzish kabi toʻgaraklarda minglab yoshlar boʻsh vaqtlarini mazmunli oʻtkazib, sportga oshno boʻlmoqda.

Bu borada turli musobaqalarning, shu jumladan mahallalarda muntazam oʻtkazilayotgan sport musobaqalarining ahamiyati ham katta boʻlmoqda. Bu orqali yoshlar oʻz iqtidorini namoyon etib, bir-biri bilan raqobatda yanada faol boʻlishga, sogʻlom turmush tarziga amal qilishga odatlanmoqda.

Aytish joizki, yoshlarni sport va jismoniy tarbiyaga jalb qilish nafaqat ularning sogʻligʻi, balki jamiyat kelajagi uchun ham sarmoyadir. Zero, sogʻlom yoshlar – kuchli davlatning tayanchidir. Davlat xavfsizlik xizmati kubogi uchun mini futbol boʻyicha oʻtkazilayotgan musobaqalar ham aynan ana shu maqsadlarga xizmat qiladi.

Charos Arslonova, tuman hokimligining Axborot xizmati rahbari.