Футбол қалбларни бирлаштирди

Бу йил Ўзбекистон спорти, хусусан, футбол тарихида олтин ҳарфлар билан битиладиган унутилмас йил бўлиб қолмоқда. Мамлакатимиз миллий терма жамоасининг футбол бўйича Жаҳон чемпионатидаги иштироки миллионлаб юртдошларимиз қалбида чексиз фахр ва ғурур туйғуларини уйғотмоқда.

23 июнь куни бўлиб ўтган Ўзбекистон – Португалия учрашуви ана шундай тарихий воқеалардан бири сифатида футбол мухлислари ёдида муҳрланиб қолди. Дунёнинг энг кучли жамоаларидан бири саналган Португалия терма жамоасига қарши кечган баҳс нафақат спорт мусобақаси, балки халқимизнинг футболга бўлган меҳр-муҳаббати, бирдамлиги ва Ватанга садоқатини намоён этган улкан воқеа бўлди.

Мазкур тарихий учрашувни катта экранда биргаликда томоша қилиш ҳамда миллий терма жамоамизни қўллаб-қувватлаш мақсадида Амударё тумани Вахум аҳоли пунктидаги болалар ўйингоҳида оммавий томоша тадбири ташкил этилди. Кечки соат 22:00 дан бошлаб юзлаб футбол ишқибозлари, ёшлар, нуронийлар ва кенг жамоатчилик вакиллари ушбу масканга жам бўлиб, футбол байрамининг бевосита иштирокчисига айландилар. 

Оммавий томошада Амударё тумани ҳокими Собир Хўжаметов бошчилигида туман раҳбарлари ҳам иштирок этиб, халқ билан бир сафда миллий терма жамоамизга мухлислик қилдилар. Бу эса спортнинг инсонларни бирлаштирувчи кучини, халқ ва раҳбарлар ўртасидаги ҳамжиҳатлик ҳамда бирдамлик муҳитини яна бир бор намоён этди. Айниқса, ёшларнинг фаол иштироки, Ватан байроғини баланд кўтариб, терма жамоамизни қўллаб-қувватлагани тадбирга ўзгача руҳ ва кўтаринкилик бағишлади.

Футбол учрашувидан аввал кўтаринки руҳда концерт тадбири ташкил қилинди. Амударё тумани Маданият бўлими хонандалари иштирокида ташкил этилган концерт дастури томошабинларга байрамона кайфият улашди. Ватан, дўстлик ва ёшлар ҳақидаги куй-қўшиқлар йиғилганлар томонидан илиқ кутиб олиниб, майдонда ҳақиқий байрам муҳити ҳукм сурди.

Болалар ўйингоҳида ҳақиқий футбол муҳити яратилди. Майдон миллий байроқлар, ватанпарварлик руҳидаги шиорлар ва мухлисларнинг жўшқин ҳайқириқлари билан янада файз олди. Ўйин давомида амударёлик футбол ихлосмандлари миллий терма жамоамизни сўнгги дақиқаларгача бир овоздан қўллаб-қувватлаб, юртимиз футболчиларига бўлган ишонч ва садоқатини намоён этдилар. Ҳар бир хавфли вазият, ҳар бир ҳужум ва ҳар бир муваффақиятли ҳаракат катта ҳаяжон билан кутиб олиниб, томошабинларнинг олқишларига сабаб бўлди.

Мазкур футбол оқшоми нафақат спорт мусобақасини томоша қилиш, балки миллий ғурур, ватанпарварлик ва бирдамлик туйғуларини янада мустаҳкамлаган унутилмас воқеа сифатида амударёликлар хотирасида муҳрланиб қолди.

Бундай оммавий томошалар нафақат спортга бўлган қизиқишни ошириш, балки аҳоли ўртасида бирдамлик ва ҳамжиҳатлик муҳитини мустаҳкамлашга ҳам хизмат қилади. Футбол атрофида бирлашган юртдошларимиз қалбида Ватанга муҳаббат, миллий ғурур ва юрт равнақи учун дахлдорлик туйғулари янада мустаҳкамланди.

Португалия терма жамоасига қарши учрашув 5:0 ҳисобида ҳамюртларимизнинг мағлубияти билан якунланган бўлса-да, бу натижа майдондаги курашнинг асл мазмунини тўлиқ акс эттира олмайди. Дунёнинг энг кучли жамоаларидан бирига қарши баҳс олиб борган футболчиларимиз ўйин давомида бор куч-ғайрати, маҳорати ва матонатини намоён этиб, сўнгги дақиқагача кураш олиб бордилар. Ҳар бир футболчимиз майдонда Ватан шарафини муносиб ҳимоя қилиш учун жон-жаҳди билан ҳаракат қилгани, уларнинг ғалабага бўлган интилиши ва фидойилиги ҳар бир юртдошимиз қалбидан чуқур жой олди.

Мухлислар ҳам натижадан қатъи назар, миллий терма жамоамизни олқишлаб, уларга бўлган ишонч ва қўллаб-қувватловларини намоён этдилар. Чунки бугунги Ўзбекистон терма жамоаси жаҳон футболининг энг нуфузли мусобақасида иштирок этаётган, халқимиз орзу қилган тарихий ютуққа эришган жамоа сифатида барчамизнинг фахримиздир. Муҳими, футболчиларимиз майдонда таслим бўлмадилар, курашдилар, тажриба орттирдилар ва келгуси учрашувлар учун муҳим сабоқлар чиқардилар.

Чарос Арслонова, туман ҳокимлигининг Ахборот хизмати раҳбари.