Sogʻlom bola yili yangiliklari

Yosh isteʼmolchilar koʻrik-tanlovi

Shu yilning 14 fevral kuni NDPI qoshidagi 3-sonli Amudaryo akademik litseyida "Eng iqtidorli yosh isteʼmolchi - 2014” VI Respublika koʻrik-tanlovining birinchi bosqichi oʻtkazildi.

3-sonli Amudaryo akademik litseyi oʻquvchilari oʻrtasida oʻtkazilgan ushbu koʻrik-tanlovda 106 guruh oʻquvchisi Yulduz Tursunboyeva 1-oʻrinni, 204 guruh oʻquvchisi Shoira Bozorboyeva 2-oʻrinni va 204 guruh oʻquvchisi Sohiba Oʻrozboyeva 3-oʻrinni egallashga muvaffaq boʻldilar.

"Eng iqtidorli yosh isteʼmolchi - 2014” VI Respublika koʻrik-tanlovining birinchi bosqichi gʻolibi Yulduz Tursunboyevaga ushbu koʻrik-tanlovning tuman miqyosida oʻtkaziladigan ikkinchi bosqichiga yoʻllanma berildi.

Shoiraning yangi kitobi

"S6yemen aq bulttay p1klik jolin”. Bu tumanimizdan yetishib chiqqan yosh shoira Zulfiya Olloyorovaning badiiy ijoddagi yana bir dadil qadami. Shoira bungacha "Ufqqa qoqilgan ishq”, "Koʻngilning chor nagʻmasi”, "Dunyoliqda dunyo ranglari” sheʼriy kitoblarini nashr ettirib, oʻz muxlislariga taqdim etishga ulgurgan. "Qoraqalpogʻiston” nashriyotida, qoraqalpoq tilida chop etilgan shoiraning toʻrtinchi kitobida nozik koʻngil kechinmalari bilan birga ona Vatanga muhabbat va insoniy fazilatlar tarannum etiladi.

Chorva qishlovi betalofat oʻtmoqda

Bugungi kunda tumanimizda 30 dan ortiq xoʻjalik subʼektlari chorvachilik bilan shugʻullanmoqda. Chorvachilikda qoramollar zotdorligini taʼminlash, naslli qoramollar sonini koʻpaytirish maqsadida aholi punktlarida asbob-uskunalar bilan taʼminlangan 11 ta zooveterinariya punkti, 3 ta sunʼiy qochirish nuqtasi tashkil qilinib, aholi va fermer xoʻjaliklariga arzon narxlarda xizmat koʻrsatish tizimi yaratilgan.

Chorva qishlovi oldidan hayvonlarni veterinariya koʻrigidan oʻtkazish, kasal mollarni oʻz vaqtida ajratish va davolash, toʻplanib qolgan goʻngni chiqarish va zararsizlantirish, molxonalarni dezinfektsiya qilish, mollarni zoogigiyenik talablar asosida parvarish qilish va fermalarda dagʻal xashak, toʻyimli omixta yem, vitaminga boy beda va hoʻl oʻt kabi ozuqa bazasini yaratishga katta eʼtibor berilgani natijasida xoʻjaliklarda chorva qishlovi mavsumi betalofat oʻtkazilmoqda.