Boʻzsuv kanali 800 mln. soʻm mablagʻ evaziga rekonstruktsiya qilindi

“Amudaryo davsuvmaxsuspudrat” davlat unitar korxonasi joriy yilning boshida jami qiymati 13 mlrd. 250 mln. soʻmga yaqin boʻlgan tender savdolarida  ishtirok etib, gʻolib boʻlgan edi. 2019-yil uchun ushbu mablagʻlarning 6,5 mlrd. soʻmdan ortiq qismi moliyalashtirilib, yil boshidan beri shu kungacha 6 mlrd. 420 mln. soʻmlik ish hajmi bajarildi. “K-1 Qipchoq”, “K-1 Qangli” kollektorlarini taʼmirlash va tiklash, Nukus tumanidagi “Darsan” suv isteʼmolchilar uyushmasi hududida kollektorlarini qurish, Jumurtov  ponton koʻprigining quyi qismida suv toʻgʻonlarini qurish kabi ishlar shular jumlasidandir. Shuningdek, Amudaryo tumanidagi “Chilpiq”, “Berdaq”, Nukus tumanidagi “Kret oʻzak” korrektorlarini  taʼmirlash va tiklash, tumanimizdagi “K-1-7” kollektorini rekonstruktsiya qilish,  Boʻzsuv kanalini rekonstruktsiya qilish va Mangʻit shahri ichidagi kollektorlarni taʼmirlash va tiklash ishlari ham “Amudaryo davsuvmaxsuspudrat” davlat unitar korxonasi tomonidan sifatli amalga oshirildi.

“Amudaryo davsuvmaxsuspudrat” DUKga Boʻzsuv kanalini rekonstruktsiya qilish uchun jami 800 mln. soʻm mablagʻ ajratilishi koʻzda tutilgan. Shundan joriy yilda 589 mln. soʻm mablagʻ ajratilib, shu kungacha kanalning 5  km. qismi toʻliq rekonstruktsiya qilindi.

Boʻz suv kanalidan tumanimizning Jumurtov, Jumur ovul, Oq oltin, Toʻlqin va Choykoʻl ovul hamda mahallalari hududida joylashgan aholi va fermer xoʻjaliklarining yer maydonlariga suv yetkazib beriladi. Jami uzunligi 15 km. boʻlgan, Amudaryodan suv olib, tumanimizdagi 4065 gektar yer maydonlariga suv yetkazib beruvchi mazkur kanalning rekonstruktsiyasi joriy yilning mart oyida boshlangan edi.

Korxona ishchilarining hamjihatliklaridagi mehnatlari natijasida 7 oy ichida rejadagi ish hajmi toʻliq bajarilib, mazkur kanalning suv oʻtkazuvchanlik darajasi bir necha barobar ortdi.

Kanal hududida qazish ishlarini olib borish bilan birga kanalning 2,15 km., 9,7km., 1,26 km., 1,19 km. hamda  1,31 km. qismlariga suv  inshootlarini qurish ham koʻzda tutilgan. Mazkur ishlar ham korxona tomonidan oʻz vaqtida va sifatli amalga oshirildi.

13-oktyabr kuni Boʻzsuv kanalning 9,7 km. kismidagi suv inshootining foydalanishga topshirish marosimi oʻtkazildi. Unda tumanimiz hokimi Sultonboy Yoʻldashev, tuman irrigatsiya, melioratsiya  va qishloq xoʻjaligi sohasi xodimlari ishtirok etdi.

Mazkur suv inshooti 210,8 mln. soʻmlik mablagʻ evaziga yangidan qurildi. Boʻzsuv kanalida qurilgan bu kabi yana 4 ta suv inshootlarining asosiy vazifasi suvni zarur miqdorda taqsimlash hamda vegitatsiya davrida qishloq xoʻjaligi ekinlarini oʻz vaqtida sugʻorish imoniyatini beradi. Shuningdek, suv inshootining ishga tushishi natijasida sugʻorish ishlari vaqtida daryodan kelayotgan suv maʼlum muddatga toʻsilib, belgilangan meʼyoriga yetganidan keyin hududdagi dalalarni elektr yoki dizel nasoslarisiz sugʻorish imkoniyati paydo boʻladi.

Gʻ.Yeshniyozov