ZARBDOR 40 KUNLIK – PAXTAKORLAR UChUN MASʼULIYaTLI DAVR

Qishloq xoʻjaligi mehnatkashlari paxta hosildorligini oshirishda muhim davr hisoblangan avgust oyida har qachongidan ham eʼtiborli va masʼuliyatli boʻlishga harakat qiladilar. Negaki, bu oy hosil toʻplash va hosilga hosil qoʻshish oyi hisoblanadi.

Bu davrda paxtakor dehqonning gʻoʻza qator oralarini begona oʻtlardan tozalashga katta eʼtibor berishi lozim boʻladi. Chunki begona oʻtlarning koʻpayishi gʻoʻza rivojiga salbiy taʼsir koʻrsatadi, zararkunanda hasharotlarning koʻpayishiga sababchi boʻlib, koʻsaklar pishib yetilishini kechiktiradi.

Gʻoʻza parvarishida kechiktirib boʻlmaydigan agrotexnik tadbirlarning oʻz vaqtida va sifatli amalga oshirilishini tizimli tashkil qilish asosida koʻzlangan paxta hosilini yaratish maqsadida joriy yilning 16-iyulidan 25-avgustiga qadar “Hosilga hosil qoʻshishda zarbdor 40 kunlik” eʼlon qilindi.

Bu davrda gʻoʻza parvarishida belgilangan agrotexnik tadbirlarni oʻz vaqtida amalga oshirish, kasallik va zararkunandalarga qarshi samarali kurashish, oziqlantirish ishlarini yakunlash, gʻoʻzani sharbat usulida peshma-pesh sugʻorish hamda kultivatsiya ishlarini tizimli tashkil etish boʻyicha chora-tadbirlar ishlab chiqildi.

“Hosilga hosil qoʻshishda zarbdor 40 kunlik” davrida tumandagi mavjud gʻoʻza qator oralarini 4-marta kultivatsiya qilish, gʻoʻza zararkunandalariga qarshi kurashni kuchaytirish, har bir gektar maydondagi gʻoʻza uchun 3 tonnadan mahalliy oʻgʻit tashib chiqarish, gʻoʻzalarni 3-marta sharbat usulida sugʻorish, gʻoʻzani chilpish ishlarini yuz foiz tugallash ishlari reja qilingan boʻlib, shu paytgacha ularning ancha qismi toʻla amalga oshirildi.

Ayni kunda gʻoʻza qator oralariga ishlov berishda 365 ta kultivatorlardan unumli foydalanilmoqda. Bu ishlarning amalga oshirilishi tajribali mutaxassislardan tashkil topgan 90 ta otryad tomonidan toʻla nazorat qilib borilayapti.

Xalqimizda “Suv – gʻoʻzaning qoni va joni” degan gap bor. Buning haq gap ekanligini har bir paxtakor juda yaxshi biladi. Shu boisdan ham zarbdor 40 kunlik davrida tumanimizda gʻoʻzalarni sugʻorish ishlariga alohida eʼtibor berilayapti.

Paxtani sugʻorish – asosiy agrotexnik tadbirlardan biri boʻlganligi bois tumanimizda 18 ta sugʻorish otryadlari tashkil etildi.

Mavsum oldidan barcha maydonlarda sugʻorish ishlarini sifatli va oʻz vaqtida olib borish maqsadida fermer xoʻjaliklariga amaliy yordam berish uchun suv xoʻjaligi tashkilotlaridan 280 nafar, suv isteʼmolchilari uyushmalaridan 30 nafar xodimlar biriktirildi. Suvchilarga qulay sharoitlar yaratish maqsadida dala boshlarida 1017 ta chayla qurildi.

Bugungi kunda tumanda gʻoʻzani sharbat usulida sugʻorishga alohida eʼtibor berilayapti. Bu ishni amalga oshirishda gʻoʻzani sharbat usulida sugʻorish tizimini tashkil qilish maqsadida tayyorlangan 3050 ta sharbat handaklaridan unumli foydalanilayapti.

Bugungi kungacha tumanda gʻoʻzalar 3-marta oziqlantirilib, 5-marta biostimulyator bilan toʻliq suspenziya qilindi. Suspenziya qilish ishlarida 46 ta OVXlardan unumli foydalanildi.

Bu yil tumanimiz boʻyicha jami 36450 tonna paxta tayyorlanib, davlatimiz xirmoniga topshirilishi reja qilingan. Har yili oʻz soʻzining ustidan chiqib kelayotgan amudaryolik paxtakorlarning bu yil ham koʻzlagan marralarini egallashlariga ishonchimiz komil.

Qudrat ABDIKALIKOV, tuman hokimligining

Qishloq va suv xoʻjaligi boʻyicha bosh mutaxassisi.