Orzu yoʻling oydin boʻlsin, Qunduzoy

- Tengdoshlarim qanday fikrda, bilmadim-u oʻqituvchi-ustozlarimiz, hatto ota-onalarimizning ham tinmay pand-nasihat qilib, oʻqishga, hunar oʻrganishga undashlari har doim ham samara beravermaydi, - deydi Qunduzoy, – menimcha, ilm olishga, hunar oʻrganishga qiziqish, avvalo har bir odamning yuragida tugʻiladi. Ota-ona va ustoz yordami bilan biz uni rivojlantirib, oʻzimiz uchun sevimli mashgʻulotga aylantirib olamiz.

Qunduzoy hali juda yosh, umum-taʼlim maktabining  7-sinf oʻquvchisi. Lekin u hayotga teran boqadi, oʻta qiziquvchan, mulohaza  bilan ish yuritib, atrofidagilarni hayron qoldirgan holda jiddiy xulosalar chiqara oladi. Boʻsh vaqtini mazmunli oʻtkazishni yaxshi biladi u. Badiiy gimnastika bilan shugʻullanadi, kitoblar mutolaa qiladi, sheʼrlar ijod etadi. 16-sonli ixtisoslashgan umumtaʼlim maktabining ingliz tili sinfida oʻqiydi, "Barkamol avlod” bolalar markazining toʻquvchilik toʻgaragi mashgʻulotlarida qatnashadi. Intiluvchan, aʼlochi va faol boʻlgan Qunduzoy tengdoshlaridan farqli oʻlaroq, turli xil tadbirlar ishtirokchisi va gʻolibi, "Bilimlar bellashuvi”ning tuman bosqichida ingliz tili boʻyicha faxrli oʻrin sohibasi, sportning badiiy gimnastika turi boʻyicha oʻtkazilgan musobaqalarda eng nafosatli sportchi, "Yangi avlod - 2012”bolalar ijodiyoti festivali laureati, "Kamalak yulduzlari - 2013” bolalar  ijodiyoti festivali Respublika bosqichi gʻolibi sifatida tanilgan. Oʻqishda va ijoddagi yutuqlari uchun "Kamolot” YoIH Markaziy Kengashining maxsus sertifikat va Diplomi, Faxriy yorliqlari, Qoraqalpogʻiston Respublikasi hamda Oʻzbekiston Respublikasi xalq taʼlimi Vazirliklarining Faxriy yorliqlari hamda esdalik sovgʻalari bilan taqdirlangan. Ustozlari rahbarligida ingliz tilini qunt bilan oʻrganayotgan Qunduzoyning orzulari bir olam.

- Kelajakda tumanimiz ijodkorlarining asarlarini ingliz tiliga tarjima qilib, Amudaryo tumanimiz nomini jahonga tanitish mening orzuim, - deydi u.

Biz Qunduzoyga: "Orzu yoʻllaring oydin boʻlsin!”, deymiz.

Robiya YOʻLDOShEVA.

Kasblar

Kasblar koʻpdir dunyoda,

Bir-biridan ziyoda.

Xohlaganingni tanla,

Oldin ularni sana!

Biz juda koʻp bilamiz,

Har hil kasblar haqida.

Birma-bir tanishamiz.

Keling, ingliz tilida!

Shifokor soʻzi "Doctor”,

Der: "doimo toza yur”.

"Gardener” esa bogʻbon,

Bogʻ yaratar bir jahon.

"Policeman” tinchlikni

Muhofaza qiluvchi.

Oʻqituvchi – "teacher”

Tinmasdan oʻqinglar der.

"Builder” esa binokor,

Bu juda kerakli kor.

Oshpaz boʻladi – "cook”

Pishirar mazali "soup”,

"Dressmaker” esa chevar,

Chiroyli koʻylak tikar.

"Baker” atalar nonvoy,

Yopadi shirin shirmoy.

"Farmer” – bu bobo dehqon,

"Carrot” ekadi har on.

"Pilot” esa uchuvchi,

Osmonlarni kezuvchi.

"Firemen” oʻt oʻchiruvchi,

Hamda u qutqaruvchi.

"Reporter” esa muxbir,

Buni dilda saqlab yur!

Vatan

Hur  boshida humolar uchgan,

Osmonini tinchlik, erk quchgan.

Vatanimni sevarman jondan,

Toki oʻzim hayot ekanman,

Adabiyot-koʻrkam bir gulzor,

Unda bizlar gullar gʻunchasi.

Shu gulzordan olarman ilhom,

Chunki Vatan tanim ichra jon.

Qunduzoy Yusupova.