Tomorqa yerlari nega ekilmayapti?

Bahor fasli kirib kelishi bilan yurtdoshlarimiz tomorqasiga ekin ekish tadorigini koʻra boshlashadi. Zero, tomorqa – daromad manbaidir. Buni yaxshi anglab yetgan Mangʻit shahridagi Farovon mahallasidagi koʻpchilik oilalar ayni kunlarda tomorqasida mehnat qilishmoqda. Fuqarolar yigʻini xodimlari ham uyma-uy yurib, bu borada targʻibot ishlarini amalga oshirmoqdalar.

Mahallaning “Kimyogarlar”, “Navbahor” va “Vatanparvar” koʻchalarida uyma-uy yurib, aholining tomorqa yerlaridan qanday foydalanishayotganini oʻrganganimizda biz fuqarolarda tomorqa yerlariga boʻlgan eʼtiborning tobora kuchayib borayotganini his qildik. Deyarli barcha xonadonlarda tomorqa yerlari sugʻorilgan, tekislanib, ekishga shay qilib qoʻyilgan.

Ammo, guruch kurmaksiz boʻlmaganidek, tomorqa yeriga umuman eʼtibor berilmagan xonadonlarga ham duch keldik.

Masalan, mahalladagi 5 ta xonadonda tomorqa yerlarini ekishga tayyorlash boʻyicha biron bir ish qilinmaganini koʻrib hayron boʻldik. Ular bilan yonma-yon yashayotgan qoʻshnilari tomorqasida oilasiga yetgulik oziq-ovqat yetishtirayotgan boʻlsa-yu, xuddi shu sharoit va imkoniyatlari bor boʻlgan bu tomorqalar oʻz holiga tashlab qoʻyilsa, buni qanday tushunish mumkin? Fuqarolar yigʻini xodimlari bunday ahvolga xonadon egalarining hali koʻchib kelmaganini yoki ularning mahallaga yaqinda qoʻshilganini bahona qilib koʻrsatishdi.

Aksincha, bunday hollarda yigʻin xodimlari ularni oqlash oʻrniga, bu masalani mahalla faollari yigʻilishida muhokama qilib, bu holat bir necha marta takrorlansa, tomorqani boshqa bir mahalladoshiga berishi kerak emasmi?

Biz yurtdoshlarimizdan tomorqa yerlarini oʻz holiga tashlab qoʻymasliklarini, fuqarolar yigʻinlaridan esa bu borada faol targʻibotchi boʻlishlarini soʻrardik.

A.Jumaniyozov.