Vatan himoyasi – muqaddas burch

Bosh Qomusimizda: "Oʻzbekiston Respublikasini himoya qilish – Oʻzbekiston Respublikasi har bir fuqarosining burchidir. Fuqarolar qonunda belgilangan tartibda harbiy yoki muqobil xizmatni oʻtashga majburdirlar”, deb belgilab qoʻyilgan.

Ha, darhaqiqat, Vatanni himoya qilish har bir fuqaroning konstitutsiyaviy burchidir. Shu aziz ona tuproqni ne-ne ajdodlarimiz koʻz-qorachigʻidek asrab-avaylashgan. Najmiddin Kubro, Jaloliddin Manguberdi kabi bobokalonlarimiz vatan tinchligi, ozodligi, hurligi yoʻlida hatto oʻz boshini tikkanlar. Buyuk bobolarimizning izdoshlari boʻlgan jasur yigitlarimiz ham mustaqil Oʻzbekistonimizni koʻksini qalqon qilib, himoya qilmoqdalar. Ayni kunlarda  yurtimiz boʻylab 14-yanvar - Vatan himoyachilari kuni nishonlanmoqda. Shu munosabat bilan, baʼzi yurtdoshlarimizni suhbatga chorladik.

Komiljon Omonov, tibbiy koʻrik komissiyasi aʼzosi, katta shifokor:

- Tuman mudofaa ishlari boʻlimidagi chaqiruvchilarni tibbiy koʻrikdan oʻtkazish boʻyicha komissiya yil davomida ish olib boradi. 2013-yil 2 sentyabrdan, shu kungacha, navbatdagi 2014-yildagi chaqiruvga tayyorgarlik koʻrish maqsadida jami 1314 nafar chaqiriluvchilar tibbiy koʻrikdan oʻtkazildi. Shundan 851 nafar chaqiriluvchilar harbiy xizmatga yaroqli, deb topildi. 131 nafar yigit muddatli harbiy xizmatga, qolganlari safarbarlik  chaqiruv rezervidagi  xizmatga tayyorlandi. Ushbu raqamlar bu yilgi koʻrsatkich, xolos. Men har gal yigitlarimizni tibbiy koʻrikdan oʻtkazar ekanman, deyarli har bir yigitning koʻzlari vatanni himoya qilish istagi bilan yonib  turganini koʻraman. Bundan mening koʻksim togʻdek koʻtarilib, nihoyatda faxrlanaman.

Negaki, jasur, magʻrur, alpqomat yigitlarimiz bor ekan, yurtimiz tinchligiga hech kim raxna sola olmaydi!

Umidjon Oʻrinboyev, tuman mudofaa ishlari boʻlimining chaqiruv boʻlinmasi boshligʻi:

- Tuman mudofaa ishlari boʻlimidagi chaqiruvchilarni tibbiy koʻrikdan oʻtkazuvchi komissiya tomonidan chaqiriluvchilarning sogʻligi tekshirilgach, ularni jismoniy tayyorgarlik sinovidan oʻtkazamiz. Ammo, boʻlgʻusi askar uchun jismoniy layoqatning oʻzigina  yetarli emas. Shu bois, yigitlarning intellektual salohiyatini va bilim darajasini aniqlovchi test oʻtkaziladi. Shundan soʻnggina yigitlar harbiy xizmatga joʻnatiladi. Jismonan, maʼnan, aqlan yetuk yigitlargina vatan himoyasi yoʻlidagi bizning yuksak ishonchimizdir!

Sharifboy Oʻrozboyev, askar yigitning otasi:

- Mening oʻgʻlim Bahromjon, 2013-yilning fevral oyida Fargʻona viloyati, Margʻilon shahriga harbiy xizmatga joʻnab ketdi. Onam uni koʻzlarida yosh bilan kuzatib qoldi.

Mana sogʻlik boʻlsa, shu kunga ham bir yil toʻlay, deb turibdi. Oʻgʻlimizning xizmatdan qaytadigan payti ham yaqinlashib qoldi.

Men oʻgʻil oʻstirib, el xizmatiga qoʻshganimdan xursandman. Sababi, yurtimizning tinchligi, vatanimizning hurligi, koʻnglimiz, uyimizning xotirjamligi askar oʻgʻlonlarimizning vatanimiz sarhadlarini kunni kun, tunni tun demasdan himoya qilganligidadir! Men askar yigitning otasi boʻlganimdan faxrlanaman.

Sirojiddin Tluboyev, talaba:

- Men 2012-yilning aprel oyidan 2013-yilning aprel oyiga qadar  muddatli harbiy xizmatni oʻtadim. Harbiy xizmat davomida barcha mashgʻulotlarga faol qatnashdim. Bilim va koʻnikmalarimizni sinash maqsadida oʻtkazilgan test sinovida yuqori ball toʻplab, mudofaa Vazirligi tomonidan beriladigan tavsiyanomani olishga  muvaffaq boʻldim. Harbiy xizmatdan kelgach, Qoraqalpoq Davlat Universitetining texnika fakultetiga hujjatlarimni topshirdim.

Xizmatda olgan tavsiyanomam tufayli menga oliy taʼlim muassasalarining bakalavriat taʼlim yoʻnalishiga kirishda toʻplash mumkin boʻlgan eng koʻp ballning 27 foizi miqdorida qoʻshimcha ball shaklida imtiyoz berildi. Men yuqori ball toʻplab, talabalik baxtiga musharraf boʻldim.

Oliygohga kirishimda, menga harbiy xizmatdagi dars jarayonlarida olgan bilimlarim yordam berdi. Buning uchun ustozlarimdan minnatdorman.

Men harbiy xizmatga borganimdan astoydil mamnunman. Nega  desangiz, Vatanimizni himoya qilib, muqaddas burchimni bajardim. Dunyoqarashim va bilimlarimni kengaytirib, shaxs sifatida yuksalganim esa, mening ulkan yutugʻimdir!

Bahrom Shomurodov, talaba:

- Men 2009-2010-yillar oraligʻida muddatli harbiy xizmatda boʻlganman. Xizmatni tugatgach, Toshkent Axborot Texnologiyalari Universitetining Nukus filialiga shartnoma asosida oʻqishga qabul qilindim. Bu yil bitiruvchi 4-bosqich talabasiman. Fuqarolik burchimni bajarib, harbiy xizmatda boʻlganligim, darslarni yaxshi oʻzlashtirayotganim uchun "Kamolot” YoIH menga shartnomamda belgilangan toʻlovning 35 foizini qopladi.

Davlatimiz va Prezidentimizning biz yoshlarga qaratayotgan eʼtibor va qilayotgan gʻamxoʻrliklaridan quvonchga toʻlmay boʻladimi?

Men shunday  ozod, obod va hur vatanda yashayotganimdan faxrlanaman! Oliygohni yakunlab, albatta, Vatanimiz ravnaqiga oʻz hissamni qoʻshaman!

Doniyor Yoʻldoshev, shartnoma boʻyicha xizmat qilayotgan askar:

- Bolaligimda televizor orqali harbiy libos kiygan yigitlarni koʻrsam, havasim kelardi. Ulgʻaygach, albatta  men ham askar boʻlaman, deb orzu qilardim.

Mana, yillar oʻtib, askar boʻlish baxtiga ham erishdim.

2012-yilning 19-fevral kuni Qashqadaryo viloyati Xonobod tumaniga muddatli harbiy xizmatga joʻnab ketdim. Xizmat paytimda jismoniy tayyorgarliklardan muvaffaqiyatli oʻtdim. Shu bilan birga, intellektual salohiyatimni ham oshirdim. Qoʻmondonlik menga harbiy xizmatda qolib, ishlashni taklif qilishdi.

2013-yil 19-fevral kuni harbiy xizmatdan uyga keldim. Shu yilning 23-fevral kuni shartnoma asosida - ishlash uchun harbiy xizmatga yana joʻnab ketdim.

Hozir armiya safida Vatanimga xizmat qilmoqdaman. Davlatimizning biz yoshlarga shunday imkoniyatlarni yaratib berganidan nihoyatda minnatdorman.

Men barcha yurtdoshlarimizni 14-yanvar - Vatan himoyachilari kuni bilan chin qalbimdan tabriklayman. Vatanimiz tinchligi barqaror, istiqlolimiz abadiy boʻlsin! 

(Foto - uza.uz)