“QILIChBOY” MADANIYaT MARKAZIDAGI TOʻGARAKLARDA ISTEʼDODLI YoShLARGA SANʼAT SIRLARI OʻRGATILMOQDA

Qilichboy ovulidagi Madaniyat va aholi dam olish markazi nafaqat sanʼatsevarlar, balki ovul ahli uchun ham sevimli maskanga aylandi. Markazda tashkil etilgan toʻgaraklarda yoshlardagi isteʼdodlar kashf qilinib, ularning yanada shakllanishiga koʻmaklashilmoqda.

Oʻtgan yili qayta taʼmirlanib, zamonaviy qiyofaga keltirilgan markazda faoliyat koʻrsatayotgan “Ashula” va “Drama” toʻgaraklari 2017-yilda tashkil qilingan boʻlib, hozirgi paytda 40 nafardan ziyod isteʼdodli yoshlar sanʼat sirlarini oʻrganishmoqda. Ularga tajribali ustozlar Oʻktam Bozorboyev hamda Mirsaid Qodirovlar qoʻshiqchilik va aktyorlik mahoratini oʻrgatib kelmoqda. Toʻgarak aʼzolaridan D.Xudoyberganov, S.Bektursunova, Q.Matsafoyev, J.Bahromov, I.Madaminov, O.Oʻrozmetov, I.Ollaberganov va boshqalar turli tadbirlarda oʻz isteʼdodlarini namoyish etib, faol ishtirok etishmoqda.

Toʻgarakning isteʼdodli aʼzolari, ayniqsa, tuman miqyosida oʻtkazilgan “Nihol”, “Yagonasan, muqaddas Vatan!” koʻrik-tanlovlarida oʻz faolliklarini koʻrsatdilar.

“Qilichboy” madaniyat markazi tomonidan toʻgarak aʼzolari uchun sayohat uyushtirilib, Nukus shahridagi I.Savitskiy nomli sanʼat muzeyiga va Bolalar qoʻgʻirchoq teatriga tomoshaga olib borildi.

N.EShChANOVA,

tuman Madaniyat markazi xodimi.