“Yoshlar – kelajagimiz” jamgʻarmasi krediti hisobidan Mangʻitda yangi stomatologiya klinikasi ish boshladi

31-yanvar kuni Mangʻit shahrida tadbirkor Botirjon Ermatov rahbarligidagi “Chelsea dent” oilaviy korxonasiga qarashli xususiy stomatologiya klinikasining ochilish marosimi boʻlib oʻtdi. Yoshlar ittifoqi tuman Kengashi qoshidagi “Yoshlar – kelajagimiz” jamgʻarmasining tuman boʻlinmasi tomonidan ajratilgan kredit evaziga ish boshlagan ushbu xususiy stomatologiya klinikasida mijozlar uchun barcha sharoitlar yaratilgan.

Ochilish marosimida soʻzga chiqqanlar Oʻzbekiston yoshlar ittifoqi tuman Kengashi tomonidan iqtidorli, tashabbuskor yoshlarni qoʻllab-quvvatlash, ularning oʻz qobiliyatlarini namoyon etishlari uchun shart-sharoitlar yaratish hamda Oʻzbekiston Pespublikasi Prezidentining 2018-yil 27-iyundagi “Yoshlar – kelajagimiz” davlat Dasturi toʻgʻrisida”gi Farmonida belgilangan ustuvor vazifalar ijrosini taʼminlash maqsadida tizimli ishlar amalga oshirilayotganini taʼkidladilar.

Xususan, 2018-yilning ikkinchi yarmida “Yoshlar – kelajagimiz” davlat Dasturi doirasida tuman boʻyicha 12 ta biznes loyihaga 2 mlrd 555 mln soʻm miqdorida imtiyozli kredit mablagʻlari ajratildi va 84 ta doimiy ish oʻrni yaratildi.

– Mamlakatimizda yoshlar uchun yaratilayotgan imkoniyatlar hayotimizni ijobiy tomonga oʻzgartirish, jamiyatga faol aralashish, ayniqsa, oʻz tadbirkorligimizni yuritish uchun keng yoʻl ochmoqda, – deydi yangi ish boshlagan klinika rahbari, tadbirkor Botirjon Ermatov. – Agar biz zamon bilan hamnafas yashashni istasak, bu imkoniyatlardan samarali foydalanishimiz, hayotimizning yorqin sahifalarini yaratishimiz kerak.

Oʻzbekiston Yoshlar Ittifoqining “Yoshlar – kelajagimiz” jamgʻarmasi tomonidan ajratilgan 100 million soʻmlik kredit va 30 mln. soʻm tadbirkorning oʻz mablagʻi asosida ish boshlagan ushbu stomatologiya klinikasi zamonaviy stomatologik anjomlari bilan jihozlangan boʻlib, 3 nafar oliy maʼlumotli stomatolog-shifokorlar, 2 nafar hamshira va 1 nafar oʻrta maxsus maʼlumotli tish texnigi hamda 1 nafar texnik xodim doimiy ish bilan taʼminlangan.

Aytish kerakki, “Yoshlar – kelajagimiz” davlat Dasturi doirasida yoshlarni tadbirkorlikka keng jalb etish, shu orqali ularning bandligini taʼminlash maqsadida 2019-yil davomida yangidan 85 ta loyihalarni amalga oshirish koʻzda tutilgan. Bu loyihalarni amalga oshirish maqsadida 19 mlrd. 383 mln soʻm mablagʻ ajratilishi rejalashtirilmoqda. Ushbu mablagʻ yoshlar tadbirkorligi sohasiga yoʻnaltirilgach, 505 ta yangi ish oʻrinlari yaratiladi.

Jamgʻarmaning tuman boʻlinmasi tomonidan yoshlar tadbirkorligini rivojlantirishga yoʻnaltirilayotgan xarajatlar koʻplab tashabbuskor yoshlarning oʻz iqtidorlarini namoyish etishlarida muhim omil boʻlishi tabiiy. Quvonarli tomoni shundaki, savdo va maishiy xizmat koʻrsatish shoxobchalarini hamda ishlab chiqarish subʼektlarini tashkil etish tashabbusi bilan chiqqan 23 nafar yosh tadbirkorga tuman hokimining qarori bilan 4 gektarga yaqin yer maydoni hamda umumiy maydoni 8 ming 183 kv. metr boʻlgan 20 ta foydalanilmay turgan boʻsh binolar ajratildi. Bu hududlarda yoshlar oʻz loyihalarini amalga oshirgach, 84 ta yangi ish oʻrinlari yaratiladi.

Yoshlar tadbirkorligini qoʻllab-quvvatlash va bandligini taʼminlashga qaratilgan bu kabi loyihalar, albatta yoshlar faolligini oshirish, tumanimiz iqtisodini yuksaltirish yoʻlidagi dadil qadamdir.

Pobiya YOʻLDOShEVA.