"NURONIY" JAMGʻARMASI QORAQALPOGʻISTON RESPUBLIKASI BOʻLIMI TOMONIDAN "GʻAYRATLI KEKSALAR" ShIORI OSTIDA SPORT MUSOBAQALARI TAShKIL ETILDI

Mamlakatimizda "Inson qadri uchun" tamoyili asosida amalga oshirilayotgan  barcha ezgu ishlarning mazmun-mohiyatida xalqimizning hayotdan rozi yashashini taʼminlash, turmush tarzini ijobiy va yaxshi tomonga oʻzgartirish, qaysi yosh toifasida boʻlishidan qatʼiy nazar har bir insonning  ijtimoiy faolligini oshirish, ularning yashash, dam olish sharoitlarini zamon talablari darajasiga koʻtarishdek ezgu maqsadlar mujassam. Ayniqsa, oʻzlarining yoshlik shijoatini, kuch-gʻayratini el-yurt farovonligi yoʻlidagi fidoyi mehnat onlariga bagʻishlagan, bugungi kunda  keksalik pallasiga kirgan nuroniylarni har tomonlama qoʻllab-quvvatlashga qaratilgan chora-tadbirlar oʻzining ijobiy samarasini bermoqda.

Bu borada   Oʻzbekiston Respublikasi Prezidentining 2024-yil 25-noyabrdagi "Kambagʻallikdan farovonlik sari" dasturini amalga oshirishga faol nuroniylarni jalb etish chora-tadbirlari toʻgʻrisida"gi Qarori muhim dasturulamal  boʻlib xizmat qilmoqda. Mazkur Qarorga koʻra,  keksa yoshdagi fuqarolar uchun  sport tadbirlarini tashkil etish,  ularni  jismoniy tarbiya va  sport bilan shugʻullanishga jalb qilish, shuningdek, keksalarning sport tadbirlarida qatnashishi bilan bogʻliq xarajatlarni qoplab berishni tashkil etish  hamda  ularni sportga keng jalb qilish uchun  "Nuroniy" jamgʻarmasi hisobidan  har bir mahallaga  yiliga 10 mln soʻm miqdorida mablagʻ ajratish belgilangan edi.  Ushbu  Qaror  ijrosini taʼminlash maqsadida "Nuroniy" jamgʻarmasi Amudaryo tuman boʻlimi  tomonidan ishlab chiqilgan rejaviy jadvalga muvofiq tumanning deyarli barcha hududlarida istiqomat qiluvchi keksa yoshdagi fuqarolarning qiziqishlarini inobatga olgan holda tashkil etilayotgan maʼnaviy-maʼrifiy koʻngilochar   tadbirlarda va sport musobaqalarida barcha yosh toifasidagi keksalarning ishtirokini taʼminlashga alohida eʼtibor qaratilmoqda. Ayniqsa, nuroniylar oʻrtasida tashkillashtirilayotgan sport musobaqalarida qatnashish istagidagi fuqarolar safi kun sayin oshib bormoqda.

Ana shunday sport musobaqalaridan biri yaqinda Amudaryo tuman Maktabgacha va maktab taʼlimi boʻlimi tasarrufidagi 40-sonli umumtaʼlim maktabining sport maydonida ham oʻtkazilib, unda tumandagi ovul va mahallalarda tashkil etilgan keksa yoshdagi fuqarolardan iborat  nuroniylar futbol jamoalari oʻzaro bellashdilar. "Gʻayratli keksalar" shiori ostida, sportning mini futbol turi boʻyicha tashkil etilgan mazkur musobaqaning ochilish marosimida "Nuroniy" jamgʻarmasi Qoraqalpogʻiston Respublikasi boʻlimi boshligʻi Tursunbay Abdijabbarov, jamgʻarmaning Amudaryo tuman boʻlimi masʼullari, fuqarolarning oʻzini-oʻzi boshqarish organlari  xodimlari, shuningdek, aholi vakillari ishtirok etdilar.

Qizgʻin va qiziqarli bahslarga boy tarzda oʻtgan musobaqalarda  tumanning ovul va mahallalarida  tashkil etilgan nuroniylar mini futbol jamoalari aʼzolari, haqiqatdan ham gʻayratli keksalar gʻoliblik uchun  kurash olib bordilar. Musobaqa yakunlariga koʻra, oʻz oʻyinlari orqali yuksak sabr-toqat bilan epchillik, kurashchanlik namunalarini koʻrsatgan Kuyuk koʻpir ovul fuqarolar yigʻinining "Kuyuk koʻpir" mini futbol jamoasining gʻayratli keksa sportchilari faxrli 1-oʻrinni egalladilar.

2-oʻrin Beshovul MFYning "Beshovul" jamoasiga, 3-oʻrin esa Olmazor mahallasining nuroniy sportchilar jamoasiga nasib etdi. Oʻzaro hamjihatlik va doʻstona ruhda oʻtkazilgan musobaqa yakunida "Nuroniy" jamgʻarmasi Qoraqalpogʻiston Respublikasi boʻlimi boshligʻi Tursunbay Abdijabbarov gʻolib jamoalar aʼzolariga "Nuroniy" jamgʻarmasi Qoraqalpogʻiston Respublikasi  boʻlimi tomonidan tayyorlangan Diplom va qimmatbaho esdalik sovgʻalarini topshirdi.

ROBIYa  YOʻLDOShEVA.