Shohjahon – umidli shaxmatchi

Shaxmatni aql gimnastikasi, oʻtkir zehnlilar oʻyini, deb atashadi. Shaxmat haqida juda koʻp gapirish mumkin. Insonning aqliy kamolotida uning oʻrni muhim. Biroq negadir sportning boshqa turlariga qaraganda shaxmat bilan shugʻullanuvchilar kam. Buni toʻgaraklarda shugʻullanayotgan bolalar soniga qarab bemalol ayta olamiz. Mening nazarimda buning asosiy sabablaridan biri shaxmatda odamning qobiliyati boshqa turlaridagilarga qaraganda darrov namoyon boʻlmaydi, balki yillar mobaynida shugʻullanish kerak, qolaversa, shaxmat musobaqalari futbol, voleybol, tennis yo boks musobaqalari kabi televideniyada toʻliq namoyish etilmaydi, balki faqat xabar beriladi. Xabar esa soatlar mobaynida musobaqalarni tomosha qilgandagidek chuqur taassurot qoldirmaydi va oʻziga odamni jalb qilmaydi. Lekin qunt bilan shugʻullangan odam shaxmatda ham oʻzligini namoyon qila oladi. Fikrimning isboti sifatida Olmazor mahallasida yashovchi, hali maktabgacha taʼlim muassasasi tarbiyalanuvchisi Shohjahon Mamatsoliyevni aytishimiz mumkin. U 2018-yil 7-dekabrda boʻlib oʻtgan Qoraqalpogʻiston chempionatida faxrli ikkinchi oʻrinni egalladi. Umuman ularning oilasini shaxmatchilar oilasi desak, adashmagan boʻlamiz. Mamatsoliy aka va farzandlari shaxmat bilan muntazam shugʻullanishadi, turli nufuzli musobaqalarda yakka holda va oilaviy ishtirok etishib, koʻp bora sovrinli oʻrinlarni egallashgan. Nevara Shoxjahonning erishayotgan yutuqlari esa barchamiz ibrat olgulik. Kelgusida uning yurtimiz sport sharafini munosib himoya qiladigan shaxmatchi boʻlib yetishishini tilab qolamiz.

Nurbek OTAXONOV, QMU talabasi.