TUMANIMIZNING IQTIDORLI, UMIDLI QIZI

Yoshligidanoq koʻpgina yutuqlarga erishayotganlar haqida eshitsak, yo oʻqisak, havas qilamiz-u biroq  oʻsha yutuqlar nechogʻlik intilishlar, mehnatlar evaziga qoʻlga kiritilganini oʻylab koʻrmaymiz. Hayotga teran nazar solsak, yurtimizda yoshlarning oʻqib-izlanishlari, koʻzlagan maqsad-rejalariga erishishi uchun yaratilgan imkoniyatlardan unumli foydalangan oʻgʻil-qizlar havas qilgulik muvaffaqiyatlarga erishayotganiga har qadamda guvoh boʻlamiz.

Bosuv mahallasida istiqomat qiluvchi Anvar Kamolov va Malohat Qurbonboyevalar oilasidagi ikkinchi farzand Sohiba Toʻraboyevaning maktabga ilk qadam qoʻygan davridanoq ilm olishga, oʻrganishga intilishi  kuchli edi. Ayniqsa, yuqori sinflarga oʻtgani sayin til oʻrganishga qiziqishi kuchli ekanini sezgan ingliz tili fani oʻqituvchisi Muhabbat Bobojonova unga darsdan tashqari ham saboqlar bera boshladi. Natijalar  esa quvonarli boʻldi. Sohiba  asosiy fan olimpiadalarida, turli koʻrik-tanlovlarda, insholar tanlovlarida faol qatnashib, faxrli oʻrinlarni egalladi. 2021-2022 oʻquv yilida esa asosiy fanlar olimpiadasida ingliz tili fanidan qatnashib, tumanda birinchi, Qoraqalpogʻiston bosqichida sovrinli oʻrinni egallagani uning oʻziga boʻlgan ishonchini oshirdi. Boʻsh vaqtlarida  mahoratli ingliz tili fani oʻqituvchisi Nurbek Jumaniyozovning ham mashgʻulotlariga qatnab, bilimlarini oshirdi. Natijada Sohiba 2022-yilda Vazirlar Mahkamasi huzuridagi DTM tomonidan tashkil etilgan sinovlarda qatnashib, ingliz tilini bilish darajasi toʻgʻrisidagi maxsus V2 milliy sertifikatini olishga muvaffaq boʻldi.

Maktabni muvaffaqiyatli tugatgan Sohiba Oʻzbekiston Milliy universitetining ingliz filologiyasi fakultetiga hujjat topshirdi va sertifikati evaziga test sinovlarida ingliz tili blogidan maksimal 93 ballni tanlovsiz oldi. Jami 181,5 ball toʻplab, davlat granti asosida talabalikka qabul qilindi. Bu uning ota-onasi, yaqinlarini, maktabda taʼlim bergan ustozlarini juda quvontirdi.

Sohiba hozirgi kunda Oʻzbekiston Milliy universiteti talabalari safida ilm olishda davom etmoqda.

Yoshlik gʻayrat-shijoati ila  intilish – shubhasiz, yangi-yangi muvaffaqiyatlarga yoʻl ochadi. Ingliz tili muallimasi boʻlib, oʻquvchilarga shu tilni chuqur oʻrgatishdek orzulari yoʻlida ilm olayotgan tumanimizning umidli qizi Sohiba Toʻraboyevani 11-oktyabr – Xalqaro qizlar kuni bilan qutlab, hayot yoʻllaring oydin boʻlaversin, deb qolamiz.

Sevara ISMOILOVA.