ТУМАНИМИЗНИНГ ИҚТИДОРЛИ, УМИДЛИ ҚИЗИ
Ёшлигиданоқ кўпгина ютуқларга эришаётганлар ҳақида эшитсак, ё ўқисак, ҳавас қиламиз-у бироқ ўша ютуқлар нечоғлик интилишлар, меҳнатлар эвазига қўлга киритилганини ўйлаб кўрмаймиз. Ҳаётга теран назар солсак, юртимизда ёшларнинг ўқиб-изланишлари, кўзлаган мақсад-режаларига эришиши учун яратилган имкониятлардан унумли фойдаланган ўғил-қизлар ҳавас қилгулик муваффақиятларга эришаётганига ҳар қадамда гувоҳ бўламиз.
Босув маҳалласида истиқомат қилувчи Анвар Камолов ва Малоҳат Қурбонбоевалар оиласидаги иккинчи фарзанд Соҳиба Тўрабоеванинг мактабга илк қадам қўйган давриданоқ илм олишга, ўрганишга интилиши кучли эди. Айниқса, юқори синфларга ўтгани сайин тил ўрганишга қизиқиши кучли эканини сезган инглиз тили фани ўқитувчиси Муҳаббат Бобожонова унга дарсдан ташқари ҳам сабоқлар бера бошлади. Натижалар эса қувонарли бўлди. Соҳиба асосий фан олимпиадаларида, турли кўрик-танловларда, иншолар танловларида фаол қатнашиб, фахрли ўринларни эгаллади. 2021-2022 ўқув йилида эса асосий фанлар олимпиадасида инглиз тили фанидан қатнашиб, туманда биринчи, Қорақалпоғистон босқичида совринли ўринни эгаллагани унинг ўзига бўлган ишончини оширди. Бўш вақтларида маҳоратли инглиз тили фани ўқитувчиси Нурбек Жуманиёзовнинг ҳам машғулотларига қатнаб, билимларини оширди. Натижада Соҳиба 2022 йилда Вазирлар Маҳкамаси ҳузуридаги ДТМ томонидан ташкил этилган синовларда қатнашиб, инглиз тилини билиш даражаси тўғрисидаги махсус В2 миллий сертификатини олишга муваффақ бўлди.
Мактабни муваффақиятли тугатган Соҳиба Ўзбекистон Миллий университетининг инглиз филологияси факультетига ҳужжат топширди ва сертификати эвазига тест синовларида инглиз тили блогидан максимал 93 баллни танловсиз олди. Жами 181,5 балл тўплаб, давлат гранти асосида талабаликка қабул қилинди. Бу унинг ота-онаси, яқинларини, мактабда таълим берган устозларини жуда қувонтирди.
Соҳиба ҳозирги кунда Ўзбекистон Миллий университети талабалари сафида илм олишда давом этмоқда.
Ёшлик ғайрат-шижоати ила интилиш – шубҳасиз, янги-янги муваффақиятларга йўл очади. Инглиз тили муаллимаси бўлиб, ўқувчиларга шу тилни чуқур ўргатишдек орзулари йўлида илм олаётган туманимизнинг умидли қизи Соҳиба Тўрабоевани 11 октябрь – Халқаро қизлар куни билан қутлаб, ҳаёт йўлларинг ойдин бўлаверсин, деб қоламиз.
Севара ИСМОИЛОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
