Shohjahon Mamatsoliyev: Oʻzbekiston shaxmat olamida amudaryolik yangi yulduz

Har bir inson bu dunyoda oʻz yoʻli va maqsadi bilan yashaydi. Kimdir ilm-fanda kashfiyotlar qiladi, kimdir sanʼat dunyosida betak­ror asar yaratadi, yana kimdir sportda yuksak gʻalabalarga erishadi. Qahramonimiz – umidli yosh shaxmatchi Shohjahon Mamatsoliyev ham ana shunday iqtidorli sportchilardan biri.  

Shaxmat – bu intellektual sanʼat, strategik fikrlash va tezkor qaror qabul qilish maydonidir. Shaxmat taxtasida aql-zakovat, aniq hisob-kitob va mukammal tahlil ustunlik qiladi. Bolalikdan shaxmatga qiziqqan insonlar hayotda ham bir necha qadam oldinda boʻlishadi.  

Shohjahon 2011-yilning 9 ok­­­tya­­br kuni Amudaryo tumanida tugʻilgan. Qush uyasida koʻrganini qiladi, deganlaridek undagi sportga boʻlgan mehr ota-onasining tarbiyasi va oila muhitida shakllandi. Otasi Islombek Abdullayev “Amudaryotex” MChJ xorijiy korxonasida kadrlar boʻlimi bosh­ligʻi boʻlib ishlaydi, onasi Gulnoza Madaminova esa uy bekasi. Oilada shaxmatga boʻlgan qiziqish yuqori boʻlib, Abdullayevlar xonadoni “Oilaviy sportchi musobaqasi”da qatnashib, mamlakat miqyosida 1-oʻrinni qoʻlga kiritishgan.  

Shohjahon 5 yoshida bobosi Mamatsoliy Abdullayevdan shaxmat bilimlarini oʻrgana boshlaydi. 2017-yildan esa murabbiy Rahmatjon Rahimov qoʻl ostida Amudaryo sport maktabida professional mashgʻulotlarga kirishdi. Yosh sportchining mehnatsevarligi oʻz samarasini berib, tez orada turli musobaqalarda sovrinli oʻrinlarni qoʻlga kiritdi.  

Shohjahon hozirda tumanimizdagi 40-sonli maktabning 7-sinf oʻquvchisi. U taʼlimda ham oʻzini na­moyon etmoqda. Ayniqsa, matematika va ingliz tili fanlariga qiziqishi yuqori. Uning raqamlar, hisob-kitob va strategiya­ga boʻlgan qiziqishi shaxmatga boʻlgan mehri bilan chambarchas bogʻliq.  

Qahramonimiz 2022-yilda Oʻzbekiston chempionatida oʻz yosh toifasida 3-oʻrinni egalladi, shuningdek, Qoraqalpogʻiston chempioni maqomiga bir necha bor sazovor boʻldi. Bu gʻalabalar unga yangi imkon eshiklarini ochdi.  

2023-yilda Birlashgan Arab Amirliklarining poytaxti Abu-Dabida 14 yoshgacha boʻlgan oʻgʻil bolalar oʻrtasida oʻtkazilgan Osiyo chempionatida kuchli oʻnlikdan joy olib, 6-oʻrinni qoʻlga kiritdi. Natijada xalqaro shaxmat arenasida ham oʻz oʻrniga ega ekanini koʻrsatdi.  

Joriy yilning 13-20-yanvar kunlari 14-15 yoshli shaxmatchilar oʻrtasida Andijon viloyatida oʻtkazilgan Oʻzbekiston chempionatida shaxmatning blits turida 1-oʻrinni egallab, mamlakat miqyosida yetakchi yosh shaxmatchilardan biriga aylandi va sport ustaligiga nomzod koʻrsatkichini qayd etdi.

Shohjahon oʻz uslubida mustahkam himoya va hujumkorlikni uygʻunlash­tir­gan. Oʻyin vaqtida raqib­larining xatolarini kutish va ulardan ustamonlik bilan foydalanishning uddasidan chiqadi. Sevimli shaxmat figurasi – harakatchan va strategik imkoniyatlar yaratuvchi qoʻshinboshi farzin sanaladi.  

Shohjahon murabbiyi Azimjon Rahimov bilan 20-fevral – 3-mart kunlari Buxoro shahrida boʻlib oʻtgan Oʻzbekiston chempionatida ham muvaffaqiyatli ishtirok etib, kuchli oʻnlikdan joy oldi.

Qahramonimiz mashhur grossmeysterlar – Nodir­bek Abdusattorov va Mag­nus Karlsenlarning partiyalarini tahlil qilib, ularning uslublarini oʻrganishga harakat qiladi.  

Shohjahon Mamatsoliyev – tirishqoqligi, intizomi va shaxmatga boʻlgan ishtiyoqi bilan yuqori marralarni zabt etyapti. Kelgusida u xalqaro grossmeyster maqomini qoʻlga kiritishni va yurtimiz bayrogʻini jahon shaxmat musobaqalarida baland koʻtarishni niyat qilgan. Shubhasiz, bugungi shijoati va mehnati maqsadlarini amalga oshirishda mustahkam poydevor boʻlib xizmat qiladi.  

Shohjahonga kelgusi musobaqalarda ham katta muvaffaqiyatlar tilaymiz!

Shohzod Qurbonboyev.